So Abraham chaqai so Abimelec
1Ca' so Abraham ca'o' na'le yí'maq neeta'ñi, ca' nqo'na yi 'laua leenaxat Néguev. Ca' naugui yi na'a' leenaxat Gerar, hueetañiguilo naua lavinñi' yaua Cades chaqai yi Shur. 2Ca co'na' neeta'anyi, ca 'naaco' quen quiyim lqaỹa aso loua Sara. Ca co'na'le, ca' so Abimelec, nashi quiyi Gerar, relaataxane'oga quiyim qanauego aso Sara, ma' ỹahotaque quiyim loua. 3Qam queso pe so Abimelec 'uo' so le'guemataxac quiyim qohinapego' quiñi qota'olec: Rillivi' ma'le, ma' ñí'maq 'aalo coñita 'ue loua.
4Qam so'maxare ma' saqa' ỹovichiguit aso'maxare, ca 'naaco': Qami' ỹa'gaxala', ¿peeta'a vi'saque lauachi' cá'maq saqa'leca ca ỹo'uet se ỹa'maxañi? 5Ma' chaqaiñi ñí'maq Abraham ñí'maq 'naac quiyim lqaỹa añi 'aalo, chaqai añi'maxare qai'neeta 'naac lqaỹa ñi'maxare. Ca' chaqaida dá'maq 'neeta quiyim seuelec, ca' qaica ca so'uet se ỹa'maxañi.
6Ca' queso le'guemataxac, ca' qohinapego' quiñi qota'olec: Ỹim sa'deenta quiyim qaica ca vi'saque na' 'viichi' dajo. Vichiguiño' sqai saxanegue quiyim vichira'guit añi 'aalo, qaiyi qaica ca rasauaxashichi' caỹim. 7Qam nagui pilaxachireco' añi loua cajo ỹale, ma' ñi'maxare ỹa'qaataxanqajnec, qaiyi nqouagaxainlec qami' ñi'maxare, qaiyi rca'llirec. Qam no'm sqo pilaxachirec, ca qami' chaqai ná'ogue ná'maq neeta'ñi najo ileu ma'le.
8Ca' queso liỹa na'xa'a na' ñaq nete'etam, ca so Abimelec ne'laxashiguim, ca roỹaxanougui so lelaatqaipi, ca ra'qaataxana quedá'ogue da le'guemataxac. Ca co'na' 'xaita dajo saua'maxare, ca no'chi'. 9Co'na' ime, ca' so nashi Abimelec roỹaxane'oga so Abraham. Ca 'naaco':
—¡'Ajñi' dá'maq 'ñiteteguelo qomi'! ¿Negue' cá'maq se ỹa'maxañi shine'tegue qami', quiyim taalec nqai'ñi' aỹim chaqai ná'ogue na ñalliripi da chalego lecaic nasauaxaset? 10¿Negue' cá'maq 'neeto' ca ra'deenataxanaxaqui' co'na' 'viichi' dajo?
Dajo 'naaco' na'le so Abimelec queso Abraham. 11Ca' so Abraham 'naaco':
—Ỹim shintapega quiyim na qomyipi quenajo sqaica ca 'negue nqai'en ñi qota'olec, chaqai shintapega quiyim qayalauat queta'le sasougui añi ỹoua. 12Qam ỹaatqajam llic quiyim ỹaqaỹa añi'maxare, ma' llaale ca ita'a, qam mesqaca'ogue aca qarate'e. 13Ca na' yachilen ñi qota'olec quiyim shique'e yi la'a' ca ita'a, ca' sashiila añi'maxare quiyim quecá'maq soviraxague 'naac quiyim ỹim lqaỹa.
14Ca na'le, ca so Abimelec ỹopilaxatem so Abraham aso loua Sara. Chaqai ỹa'ue aso lame qagretaipi, huacaipi, na'aquipi chaqai so la'aipi. 15Ca 'naapego':
—'Ena na ña'laua, nca'a'iraque cá'maq paguec rqo'chita, ca' ñiralec.
16Qai'neeta 'naaco' caso Sara:
—Ná'maq saanem da rqaỹa'e' ỹaatqajam 'xoic lecaic añi laseuete. Na'maxare nala'guit quiyim quepaqataxanlec queca se no'uen na'qaataxaqui', qaiyi ná'ogue ná'maq neeto'ot qami' sqaica ca la'qaatec se ỹa'maxañi taalec nqai'en aqami'.
17Co'na'le, ca' so Abraham nqouagaxainot ñi qota'olec, ca ñi'maxare imeuec nqai'en so Abimelec chaqai aso loua. Qai'neeta imerec nqai'ne' saua lelaata, qaiyi ishit 'ue ca llaalegue'. 18Ma' sauaxato' aso Sara, ca ñi qara'gaxala' ỹo'uet quiyim qaca aca ishit co'o quesó'maq 'aallipi neeta'ñi yi la'a' so Abimelec.
