So Isaac ỹaanem da no'ueenaxat da llicyaxague' saua Jacob chaqai so Esaú
1Ca' so Isaac co'na' mashic qo'xoỹom, ca' tot neuanñi. Ca' 'uo' so na'xa'a, ca roỹaxano' so Esaú só'maq 'auaxaic llaalec, ca 'naapego':
—¡Qami' ỹaalcolec!
Ca' so Esaú saato':
—¿Negue'ca, qami' ita'a?
2Ca 'naaco' so Isaac:
—Mashic 'yiiñi' quiyim mashic ỹim qo'xoỹom, ca' sqoue qaỹaloq yileu. 3Ca vichiguiño' sahotaque quiyim paraxañi' quiyi 'oochi, coñita aca ro'xoshiqui' chaqai ca roviqui', sha'apiguito' 'ue ca qadoxonqui' isecỹac. 4Ca ma'le, ca 'viichi' ca reuolqui', lo'daxaraic nqai'ñi', ma' 'yiiñi' ñaman. Ca nodo'iro', sa'ic ma'le. Ca ma'le, ca saañiraxarom da iqouagaxa tomaq saqa' yileu.
5Qam aso Rebeca na'xaỹaxantaho' co'na' so Isaac 'neetapega so Esaú. Ca co'na' tauec so'maxare quena no'ueenaxa reparaxanlec so leta'a. 6Ca aso'maxare 'naaco' queso Jacob só'maq llaalec na'aasa:
—'Ajñi', ỹaatqajam sa'qa'ta ñi qataa'i' na' retaqata'pegue' so rqaỹa'e' Esaú, 'naac: 7“Paraxañi', ca ma' 'ue ca qadoxonqui', ca 'viichi' ca reuolqui' lo'daxaraic. Ca ma' ime sa'ic, ca' saañiraxarom ma'le da iqouagaxa qara'deenta ñi qara'gaxala', tomaq saqa' yileu.” 8Ca vichiguiño', qami' ỹaalec, ỹaatqajam na'xaỹaxanchiriua' quedá'maq sa'xat: 9Quirepegue' ca qoloipi, ca nodo'iro caua dos quetaq llaalqolqai' 'uegaxasa'. Ma'le, ca' so'uet iuolec quená'maq naman ñi qataa'i'. 10Ca qami' do'ira'a ma'le quiyim ỹa'ic, qaiyi ỹaañiraxarom ma'le da lqouagaxa, tomaq saqa' ileu.
11Qam so Jacob 'naaco' caso late'e:
—So ỹaqaỹa 'xoic na laue na loshicmaxa, qam ỹim sqaica. 12Qam no'm ñi ita'a ipootau'a ỹim, ca' no'viñic, ca 'neetapigui lauel ma'le quiyim chi se'neetac. Ca' inaxalec ma'le aỹim cá'maq se no'uen chalego lecaic, ca' se nañaañim cá'maq lqouagaxa.
13Qam aso late'e 'naaco':
—Qami' ỹaalcolec, cajo se no'uen na'qaatec taalec aỹim ma'le. Qam qami' qui', 'viichi' dá'maq shinac quire'ogalo caua quetaq llaalqa.
14Ca' so Jacob eec, que'ogalo saua quetarolqai'. Ime, ca nodoora'alo aso late'e. Ca aso'maxare ỹo'uet so leuosec ỹaatqajam lo'daxaraic nqai'en só'maq nishiitaque so Isaac. 15Ime, ca' naqaterec sauá'maq ỹaatqajam la'maqatqa no'viiñi loho só'maq ỹi llaalec Esaú. Ime, ca' ỹanaxañiguilo so lanoq Jacob. 16Co'na'le, ca' ỹaxajlgoto naua lqai'laqate' chaqai na lqosot ná'maq hua'ñi na sqaica laue so Jacob. 17Ca' ỹaanem so leuolec chaqai so lo'ueenatec pan.
18Co'na'le, ca' so Jacob inoxona'a yí'maq neeta'ñi so leta'a. Ca 'naaco':
—¡Ita'a!
—Aỹim. ¿Negue' qami' ỹaalcolec? —'naaco' so Isaac.
19—Qa'sqai aỹim ná'maq ỹi qachaalqui' Esaú —'naaco' so Jacob—. Shi'gue so'uet dá'maq 'ñiisapega. Qouaquiric, ne'laxachirishiguim, nqa'aamiriñi, qui'i' quená'maq ỹoxonec isecỹac la'at. Ca nañaañi' ca rqouagaxa'e'.
20Co'na'le, ca' qainat queso Isaac:
—¿Negue' cá'maq 'neeto' ma' sqaỹalqo' naqachiriñi na'maxare, ỹaalcolec?
—Ñi qara'gaxala' ñí'maq qota'olec caqami' yotauan quiyim sqaỹaloq sanata —'naaco' so Jacob.
21Qam so Isaac 'naaco' queso'maxare:
—Noquiiquero ñaq sepoochi', qaiyi sa'den quiyim llic qami' ỹaalec Esaú.
22Ca' so Jacob nqo'neuo, qaiyi qaipot queso leta'a. Co'na'le, ca' so Isaac 'naaco':
—Ỹaatqajam Jacob da lavilshaxac, qam Esaú naua lqai'laqate'.
23Ca' ỹaatqajam se no'uenegue, ma' 'xoic na laue naua lqai'laqate', 'neete'm naua lqai'laqate' so lqaỹa Esaú. Qam co'na' sham ỹaanem da lqouagaxa, 24ca lotqai liỹa inat, 'naaco':
—¿Ỹaatqajam lliquetam quiyim qami' ỹaalec Esaú?
—Ajá'a, ỹim Esaú, —'naaco' so Jacob.
25Co'na'le, ca 'naaco' so leta'a:
—Ỹaalcolec, niỹoqoirishiguim na reuolqui', qaiyi sa'ic na la'at cá'maq qadoxonqui', ca' saanem qami' ma'le da iqouagaxa.
Ca' so Jacob ỹaanem so loq so leta'a chaqai ỹodou'a so lataxa. Ca' que'e chaqai ne'et so Isaac. 26Ca na' ime, ca 'naaco':
—Noquiiquero, yqo'goqoi', ỹaalcolec.
27Ca co'na' nqo'neuo so Jacob quiyim nqo'goq, ca' so Isaac ncoỹaxanalo saua loho. Co'na'le, ca' ỹaanem da lqouagaxa, 'naaco':
Ajá'a, chaqaina na ỹaalec lahita dajo.
'Ec na lahita ca no'ueenaxa,
taalec nqai'en ca lqouagaxa ñi qara'gaxala'.
28Ñi qota'olec ỹaanem qami' ma'le ca ỹaxat chicqo'ot na piguim,
chaqai da no'uen laỹaxac ca qadañicshiqui' quena 'laua,
'xoic ca ỹaanem qami' trigo chaqai 'xoic ca lataxa.
29Chaqai 'xoic ca qomyipi ro'ueenataxanot qami' ma'le;
chaqai na ỹoreta'oguit qomyipi ỹa'dooto qami' ma'le naua le'cootal.
Ca 'viiquiñi'sac ma'le na rqaỹachi'ipi;
¡chaqai ỹa'dooto qami' naua le'cootal!
Cá'maq ishiuen qami', ca' qaỹa'ue ca nouaxanaxaset,
qam cá'maq re'xoriñi', ca' qai'xoren.
30Ca' so Isaac co'na' ime ỹaanem da lqouagaxa so Jacob, ca ỹaatqajam chi inoxoneco' so Jacob quiyí'maq neeta'ñi so leta'a. Ca noviro' so Esaú reparaxantac. 31Ca so'maxare qai'neeta ỹo'ueeto' so leuolec lo'daxaraic. Ca' ỹodou'a so leta'a, ca 'naaco':
—Ne'laxachirishiguim, itaa'i'. Qui'i' quena loxonec na qachaalqui', ca' nañaañi' ca rqouagaxa'e'.
32Ca' qainato' queso Isaac, 'naaco':
—¿Negue' aqami'?
Ca so'maxare 'naaco':
—Aỹim Esaú ná'maq ỹi qachaalqui'.
33Ca' so Isaac ỹaatqajam 'uo' da le'laxa. Ca co'na' retaqa, ca i'loxola'ueque naua la'qaatqa:
—Ca ¿nega'ỹo' só'maq eeco' reparaxan, ca nodouo so anoq? Ỹim sa'ic sá'ogue na' saqa' novichiro, ca' saanem da iqouagaxa. Ca' nagui so'maxare no'ueeno'ot da qouagaxa.
34Ca co'na' so Esaú 'qaachigui dá'maq 'naac so leta'a, ca' noỹen, naualqategueñi.
—¡Qami' itaa'i', ỹim qai'neeta nañaañirim ca rqouagaxa'e'!
35Qam so Isaac 'naaco' queso'maxare:
—Shi'gue noviro so rqaỹa'e', ca yayin. Ca' saanem sá'ogue só'maq taalec quet qami'.
36—¡Chaxaso' ma' qoỹanegue leenaxat Jacob! —'naaco' so Esaú—. ¡Ma' mashic dos yachiguiñi nagui! 'Au youora'gue dá'maq qaỹaqatqajantari' taalec aỹim nesallaxa, chaqai nagui lotqai rouootaxana'gue da ñqouagaxa. Ca ¿qaico' ca liỹa rqouagaxa'e' no'ueenaxachirauec caỹim?
37Ca' so Isaac 'naaco' queso'maxare:
—'Anta, mashic saanem so Jacob quiyim so'maxare ỹapacauec caqami', chaqai saanem quiyim lelaatqaipi ná'ogue na lauo' laseripi, chaqai sahotaque quiyim 'xoic ma'le ca trigo chaqai ca lataxa queso'maxare. Ca ¿negue' queto' cá'maq shinta'gue caqami' nagui, ỹaalcolec?
38Qam so Esaú 'ue da lepagaxallic, 'naaco':
—¿Sqai shichi'o' 'ỹaañirec ca liỹa rqouagaxa'e', qami' itaa'i'? ¡Rqouaquitegue aỹim qai'neeta!
Ca lotqai liỹa noỹen naualaxañi.
39Ca 'naaco' so Isaac queso'maxare:
Qoỹoqo'ta ma'le cá'maq ñi'sa'ñi quecá'maq no'uen 'laua
chaqai quena ỹaxat chicqashiguim quena piguim.
40Ca' cá'maq chi lecachi' 'goxoñita ma'le,
ca' qami' lelaatec ma'le ñi rqaỹa'e';
qam ma' vichita quiyim qami' quesaxan,
ca' souec qami' ma'le queso'maxare.
So Jacob 'eetapeguem so Esaú
41Ca' queco'na'le, ca' so Esaú noquii'a so Jacob sauaxat da nqouagaxa qoỹaanem queso leta'a. Ca ra'deenataxantac, ca 'naaco': Mashic tot qaỹaloq ime ñi qareta'a, ca ma' ỹovita da lqodoc. Ca ma'le, ca' salauat ñi ỹaqaỹa Jacob.
42Ca co'na' aso Rebeca ỹa'den dá'maq ỹahotaque ỹo'uet so Esaú, ca roỹaxane'oga so Jacob. Ca 'naaco':
—'Anta, ñi rqaỹa'e' sham ỹa'ue lovi', ca ralauachi'. 43Vichiguiño' qami' ỹaalec, na'xaỹaxañiriua'; chaqa'ma' 'iichi' quet 'itegue da Harán, ca na'ñi ca ỹaqaỹa Labán. 44Ca ñira'anyi, toco' ma' ime'uegue da lonogoxonaxac ñi rqaỹa'e', 45chaqai coua'e dá'maq 'ñitetegue. Ca ma'le, ca' sa'ue ra'xaỹaxaqui', qaiyi rapilli'. ¡Ma' se sa'maxaren ña'laxaterañi naua dos ỹaalqa queca 'oonoqui' na'xa'a!
46Co'na' ime, ca' aso Rebeca 'naaco' queso Isaac:
—Mashic tot yalo'guit da shinta sauaxate' nauajo hitita lase quenauá'maq o'ñiguita ñi Esaú. Ca no'm ñi Jacob 'ue aca loua quena hitita lasellipi 'neete'm yauajo quená'maq na'ñi najo Canaán, ca' paguec la'maxa quiyim yileu.
