Génesis 26

₁Ca' quesauajo na'xata' ỹaatqajam 'xoico' da nouenaxanaxa queca na'ic quesá'ogue so 'laua, 'nejmo' quesaua na'xata' na' ñaqa 'ue so Abraham. Vichiguiño' so Isaac quepegue' yi Gerar yí'maq neeta'ñi so Abimelec só'maq lashi na filisteoipi. ₂Hua'ño'yi, ca' ñi qara'gaxala' nachaxano' so'maxare. Ca 'naaco': Totaxan 'itegue da Egipto. Ñira'ño' cá'maq ỹim shicapi'ñi. ₃Qam nagui ñaqai ñi'salec najo 'laua. Ca' ỹim iỹaatac qami' chaqai yqouaquiraxaric, ma' qami' chaqai na qachaalaxai'pi saanem ma'le najo 'laua. Ca' sepacqajanchigui dá'maq ỹa'qaatec na'le queso qataa'i' Abraham. ₄Ca' ỹaatqajam 'xoic nqaishin ma'le ca qachaalaxai'pi 'ec ana huaqajñi quena piguim, ca' saanem ma'le ná'ogue najo 'laua. Chaqai ná'ogue na ỹoreta'oguit qomyipi quena 'laua 'ue ma'le ca la'maxa chicqochigui ma'le ca qachaalaxai'pi. ₅Ma' so Abraham na'xaỹaxanchiua' ipacqajanchiguilo naua ilaataxanaxaco, ỹaqataxaco chaqai naua ỹapaxaguinataxanaxaco.

₆Ca' so Isaac na'ño' yi Gerar. ₇Ca co'na' so qomyipi na'ñi yi'maxare inato' negue' cá'maq 'neeta so'maxare caso Rebeca. Ca' so Isaac 'uo' da lqolonaxa quiyim 'naac loua, ca 'naaco' quiyim lqaỹa. Ma' ỹaatqajam lo'yaxana aso Rebeca, ca so'maxare 'neetapiguio' lauel quiyim qaỹalauat sougui aso loua.

₈Ca 'vio' saua na'xata' neeta'ñi yi 'laua, ca 'uo' so na'xa'a so Abimelec ra'iitauco' cañi nqote ñi lauo'. Ca iuane'to' so Isaac qa'aalta'pegue ineequesentac aso loua Rebeca. ₉Co'na'le, ca roỹaxaneu'ga, ca 'naaco' queso'maxare:

—Qa' ỹaatqajam llic roua'e'o' añi'maxare. Qam ¿chi'neco' ma' 'ñirac rqaỹa'e'?

Ca' so Isaac 'naaco':

—Ma' ỹim shintapega qayalauat queta'le sauaxat ada'maxare.

₁₀Ca 'naaco' so Abimelec:

—¿Chi'neco' ma' 'ñitetegue dajo coqomi'? Mashic saqa'leca cocho'qui', ca' 'ue ca lapa'ñi' añi roua'e' coqomi', ca qami' vite queta'le ca qarasauaxaset.

₁₁Ca' so Abimelec 'naapego' sá'ogue so lauo' laseripi:

—No'm 'ue ca se ỹa'maxata'gue sojo ỹale, loqo'm aso loua, ca' qaỹalauat.

₁₂Ca danaxano' na'le queso ñaaxa so Isaac queso 'laua, ca' chalego loyac na' lapoon so lanec ala, ma' ñi qara'gaxala' no'ueenaxat so lanec. ₁₃Ca' ỹaatqajam nesallaxanec chi ỹovireta'a quiyim 'xoic na na'aateteripi. ₁₄Mashic ỹapaguelec aso lalo qagreta chaqai aso huaca chaqai so lelaatqaipi, vire'ta qaipa'guen queso filisteoipi. ₁₅Co'na' ñaq nca'leetauec so leta'a Abraham, ca' so lelaatqaipi so Abraham ỹo'ueeto' aso li'ỹa. Qam co'na' ncopa, ca' so filisteoipi ỹapo'nquio', no'xataxatejlec quena 'laua. ₁₆Ca co'na' mashic shi'gom, ca' so Abimelec 'naaco' queso Isaac:

—Mo'e', oquire'e najo, mashic paguec qami' nesallaxanec coqomi'.

₁₇Ca' so Isaac eec, quepegue' so ca'megue quiyi 'laua Gerar, ca' naalec yi'maxare. ₁₈Ca lotqai ỹa'uo' aso li'ỹa só'maq shi'co' quen ni'ỹa na' ñaqa 'ue so leta'a Abraham, ca' co'na' mashic ileu, ca ỹapo'nquio' so filisteoipi. Ca' ỹanco' dá'maq chaqai'eno' leenaxat nqai'en so leta'a. ₁₉Ca 'uo' so na'xa'a so lelaatqaipi so Isaac ỹo'ueetetaco' aso li'ỹa queso ca'megue, ca ni'ỹaalco' ca la'uaxac se neme ne'paxantashiguim. ₂₀Qam so neloxoỹaripi caso qagreta quiyi Gerar nco'ỹa'e'o' so neloxoỹaripi caso qagreta lalo so Isaac, ma' 'neraco' quen quiyim looỹague' sojo huaxaỹaq. Ca' vichiguiño' so Isaac ỹanco' leenaxat co'uaqa' asojo ni'ỹa, ma' qanco'uaquio' na'le aso'maxare. ₂₁Ime, ca' so lelaatqaipi so'maxare lotqai ni'ỹa aso liỹa ni'ỹa. Ca co'na' ỹomat, ca lotqai liỹa nco'ỹata', ca' so Isaac ỹamata'gue leenaxat pa'guenqa' asojo ni'ỹa.

₂₂Ca' so Isaac eec qoỹoqo'tegue da taigue quiyi'maxare, ca lotqai ni'ỹa aso liỹa ni'ỹa. Ca' mashic tot qanco'uagui aso'maxare. Ca' ỹanegue leenaxat neuagaxa, ma' 'naaco': Nagui ñi qara'gaxala' ỹo'uet da qareuagaxa quena senqata'ñi quiyim ñqo'naxashiguim.

₂₃Ca' quiyi, ca' so Isaac eec, taigue da Beerseba. ₂₄Ca' queso pe, ca qanachaxana so'maxare quiñi qara'gaxala'. Ca 'naaco':

₂₅Co'na'le, ca' so Isaac no'xonshiguim aso lcopatoxonaxalate quiyi'maxare, ca' nqouagaxaina da leenaxat ñi qara'gaxala'. Ca naalec yi'maxare, ca' so lelaatqaipi ỹo'uet aso li'ỹa.

₂₆'Uo' so na'xa'a, ca' so Abimelec chicqochi'ñi yi Gerar, ỹahotaque retaxaỹa'pegue' so Isaac. Liỹaataco' so nauochaxaua Ahuzat chaqai so Ficol só'maq lashi so nalliripi. ₂₇Ca' so Isaac 'naaco' quesaua'maxare:

—Qamiri se rqo'chiiua', chaqai vire'ta yo'yiỹauec quiyi na'lauahi, qam ¿chi'negue ma' naguii na'ajnaxañiua'?

₂₈Ca saua'maxare 'neraco':

—Seuanaxa quiyim ñi qara'gaxala' liỹaatac qami', ca 'ue da qana'deenaxac quiyim ña'deenaxa'e' qami'. Ca dá'maq qana'deenaxac ma'le 'neetasa': ₂₉quiyim qami' sqo 'viichi' ca se no'uen coqomi', ma' qomi' sqaica ca shinaxague caqami', chaqai se yilaxasqatapega qami' na' ca'e nqaishinaq qami' yi qana'laua, chaqai nagui ñi qara'gaxala' 'ue da lqouagaxa caqami'.

₃₀Ca' so Isaac ỹo'ueeto' so nqui'ỹaxac lodegaxat, ca saua'maxare qui'ỹe' chaqai ne'te'. ₃₁Ca' queso liỹa nete'e na' ne'laxachishiguim, ca' ỹo'ueete' da na'maqataxague'. Co'na' ime, ca' so Isaac 'naaco':

—Hua' ỹa'maqata.

Ca saua'maxare que', npoyiguinto so'maxare, ca nauochaxaua'.

₃₂Ca' chaqaiso' sojo na'xa'a, ca novirero saua lelaatqa so Isaac, ỹahote la'xaỹaxac quiyim ỹoviriri'ña ca huaxaỹaq caca ni'ỹa ni'ỹaasac. ₃₃Ca' so Isaac leenaxato' nqai'en aso ni'ỹa Seba, loqo'm 'maqatqa'. Vichiguiño' yijo na'a' ñaqai leenaxat Beerseba, loqo'm ni'ỹa 'maqatqa'.

₃₄Ca co'na' so Esaú ỹovite' cuarenta ñaxari, ca' loua aso leenaxat Judit, aso'maxare llaale so Beeri, hitita le'ec. Chaqai qai'neeta loua aso Basemat, llaale so liỹa hitita le'ec, leenaxat Elón. ₃₅Ca' sauajo dos 'aalo se ỹa'maxagui lauel nqai'ne' saua ni'ỹoqoro' Isaac chaqai aso Rebeca.