Ỹaatqajam ya'ỹoqotagui so Jesús
1Ca' vichiguiño' qomi', ma' mashic 'xoic na qom seuqatañigui re'qoota da lpi'ỹaxac, ca 'maxaraic quiyim saxanaxañi ná'ogue ná'maq qara'paxat chaqai ná'maq nasauaxaset qara'peetapigui. Ca ñi'guenaxashiguim, qolaxalec da qanalliquinaxac quedá'maq seloxoiqa'gue. 2Ỹaatqajam ya'ỹoqotagui so Jesús só'maq chicqo'ot da qarpi'ỹaxac chaqai nachinñi nqai'en. So Jesús ỹaatqajam na'ñaxachiguit da qohine'tegue na' qaipateno, chaqai se na'xaỹaxana dá'maq 'neeta quiyim nayiloxo lahi' dá'maq 'nejem dajo nelauaxa. Ma' ỹa'deenta quiyim ma' ime'uegue da le'xoric, ca 'ue ca netoonaxac chaqai ỹa'maqachiguiñi. Chaqai nqa'xanñi queda loic quiyi nqa'xanqa' ñi qota'a.
3Ca vichiguiño' ñaqai cocho'qui' 'yiiñiỹapega dá'maq 'neeto' na'le so Jesús na' na'ñaxachiiguit da neualaxainataxac queso qomyipi hualoxonyipi, qaiyi queeta da na'ñaaqataxaguii, se rolavitegueñi. 4Ma' caqamiri saqa'leca ca ỹovirau'a quiyim qaỹalauat quiyim reloquita'pegue' na nasauaxaset. 5¿Qamiri peeta'a mashic couahi'e da laqataxac ñi qota'a, 'nejem ca qom quiyim qatetapegalo caua lalamaxarete' llaalqa? Naua naneresañi la'qaatqa ñi qota'a 'neracsa':
Qami' ỹaalcolec, 'neeto' lotqai liỹoqoira'piguit da lapaxaguinataxanaxac ñi qara'gaxala' quiyim 'ec nelaxa qami',
chaqai se nayiloxoñi' quiyim qaỹoviraqta'a qami'.
6Ma' ñi qara'gaxala' ỹaatqajam ỹapaxaguin cá'maq nqo'ta,
chaqai ỹouaxan cá'maq mashic icoñiguit quiyim llaalec.
7Ca' qamiri na'ñaxachiiguit ca nouaxanaxaguii, ma' ñi qota'a 'neeta'guelo quiyim qamiri lalamaxarete' llaalqa. ¿Peeta'a 'uo' ca ñaalec quiyim se qaỹapaxaguin queca leta'a? 8Qam ñi qota'a no'm se ỹapaxaguine' qamiri quedá'maq 'neeta'gue ná'ogue na llaalqaipi, ca' sqai qamiri lalamaxarete' llaalqa, ta'ta'a quiyim chaqai qamiri peua'. 9Chaqai qai'neeta na' ñaqai qomi' ñaaqaipioqui', ca' na qareta'allipi quena 'laua ña'xaỹaxanqa'talo quena' qarapaxaguin. Ca' ¿chi'negue queta' sqai paguec ña'xaỹaxanaxa ñi qota'a se re'xogui, qaiyi 'ue ca qarca'laxa? 10Saua 'auaxaqa re'qoochiguilo qareta'al cocho'qui' ỹapaxaguinque qomi' dá'maq ipeetera'a 'maxaraic 'ueenataxac. Qam ñi qota'a ỹapaxaguinque qomi' dá'maq ỹaatqajam qara'maxa, ma' ỹahotaque co'teete' qomi', shinqatam ñi'maxare co'teeta. 11Llic ma' qaica quet ca nouaxanaxanaxat qarqo'ta quiyim qaỹouaxane' qomi'. Ta'ta'a quiyim seuetaq quena' ñaqai chita'gue. Qam quena' ncopa, ca' re'oq dá'maq 'neeta da napaxaguinataxac ca qom quiyim ỹaatqajam na'xaỹaxanta. Ca da nachaalataxac ỹaatqajam co'teeta chaqai 'ue da la'maxa.
Da lichic queca qom no'm liỹoqa'piguit da la'qaatec ñi qota'a
12Vichiguiño' qamiri na'ñaxate' nqai'ñii naua rqai'laqachiri mashic nco'terec chaqai naua re'cootallii mashic tot ra'ñiiguelo, 13chaqai daañiỹaque so nayic ỹalamqata, qaiyi imeuec cá'maq nipia' se ra'ñiigue chaqai tot liỹa namaqatari'.
14Nquipichiỹa'pegue' daañiỹaque quiyim huaguii'chiguit ná'ogue na qomyipi, ỹaatqajam co'teeta nqai'ñii da nachaalataxaguii. Ma' no'm sqaica da lco'taxa da chaalataxac, ca' qaica ca iuana ñi qara'gaxala'. 15Richilliỹaño' quiyim 'neeto' 'ue ca se icoñiguit da lotaanaxanaxac ñi qota'a ỹachaxantac, qaiyi qaica ca 'nejem aca nanecse chim quiyim na'axat chaqai idoon nqai'en aca liỹa. 16Chaqai caqamiri qaica quet cá'maq nocachita'piguit aca se loua, chaqai se liỹoqa'piguit cá'maq chicqo'ot ñi qota'a. Ma' chaqaido' da 'ne'tegue na'le so Esaú: ñi'chiguito' nqai'en so 'oonoqui' na'ic co'na' imen dá'maq qaỹaqatqajantari' taalec queta'le so'maxare, ma' 'auaxaic ñaalec. 17Chaqai qamiri 'yiiñita dá'maq 'neeto' na'le dajo co'na' ime, ca co'na' ỹovita so na'xa'a co'na' so Esaú ỹahotaque icoñiguit só'maq no'uen ñicyaxac qoỹaanem queso leta'a, ca' se qaicoñiguit. Ca 'eno'm 'xoic noỹenaxac, qam tot ỹanata ca la'maqa' quiyim ỹadalaxat dá'maq shi'co' ỹo'uet.
18Sqai 'nejme' qamiri so llaalqaipi so Israel co'na' nqo'neu'a aso re'qoochigui qa' ladocai, ỹaviquetaugui queso norec lauaq, chaqai so napalaxa, chaqai so nonot lodegaxat. 19Chaqai sqai 'xaiỹa ca lelamaxa aso npe'te chaqai da lavillaxac ñi qota'a na' retaqatac quesaua'maxare. Ca só'maq 'qaataco' na'le, ca ne'xoresene'tot quiyim tot liỹa qaretaxaỹa. 20Dajo 'neeta ma' so'maxare se nalo'guit dá'maq naqataxac, ma' 'naaco': “Cá'maq co'ueu'a najo qa' ladocai, ca chaqa'ma' qaỹalauat, qaỹodoota'a na qa', loqo'm aca naqui; 'eno'm chi isecỹac, qam qaiyiita.” 21Ỹaatqajam chalego lichic só'maq qara'iita'a, vire'ta so Moisés 'naaco': “Ỹaatqajam yi'loxoltari' quena ỹoqolonaxa.”
22Qam qamiri mashic nqo'ñiu'a aso quemaralec ladocai leenaxat Sión, yí'maq na'a' lodegaxat ñi qota'a ñí'maq sqaica lqodoc nca'leetauec, yí'maq qohinac Jerusalén hueeta'gue da piguim, yí'maq hueete'e ná'maq ỹaatqajam 'xoic nelaatqaipi piguim laseripi, 23lapoota'ta' imaqachintac ñi qota'a, chaqai ná'maq lapoota'ta' llaalqaipi ñi qota'a ná'maq qoỹeretañi queda piguim. Ca mashic nqo'ñiu'a ñi qota'a ñí'maq imit ma'le ná'ogue, chaqai ná'maq lqui'illipi na qom huagaxaraic, ná'maq nachinñi nqohin quiñi qota'a. 24Ca mashic nqo'ñiu'a so Jesús ma' chaqaiso só'maq qaretaxaỹaxanqajnec quedá'maq dalaxaic 'maqataxac quiyim ña'maxataxa'e' ñi qota'a, chaqai quecá'maq hua'ñi ca qareletaxanalo saua leuo' so Jesús. Saua'maxare ỹaatqajam napacalgoto saua leuo' so Abel quiyim ra'qaataxanalo qomi'.
25Vichiguiño' ỹaatqajam richilliỹaño' 'neeto' lotqai 'ue ca se icoñiguit ñí'maq retaqatapegalo qomi'. Ma' sqaica ca qohit quesó'maq se na'xaỹaxano' na'le ñi qota'a na' qatetapega so qomyipi quenajo 'laua, ca ¿huose'queto' qohite' qomi' no'm se ña'xaỹaxanaxa ñí'maq qota'a neteltapegalo qomi' neeta'gue da piguim? 26Da lavillaxac ñi qota'a na'le ỹaatqajam i'loxol nqai'en na 'laua; qam nagui lotqai 'naac: “Lotqai liỹa i'loxol nqaishin, qam mesqainaata na 'laua, ma' qai'neeta na piguim.” 27Ca no'm 'naac “lot liỹa”, ca sa'deenaq quiyim ná'ogue ná'maq ishit i'loxol nqohin quená'maq lo'ueenatqaipi ñi qota'a qanaqat, ca no'ueenañi ná'maq sqaica ishit idaxan. 28Da lo'ueenataxanaxac ñi qota'a quiyim ỹoiquentac ná'ogue najo, dá'maq ỹaanema qomi', chaqaida dá'maq se qaishit qaidaxan. Ca saanqatecshiguim da qana'aachic quedajo, chaqai semaqachinqatac ñi qota'a, ñañaanqa'tot, sa'deenqatapega cá'maq ỹa'maxarenta. 29Ma' ñi qota'olec 'neetari' ca norec ravicqataxan.
