So Jesús ỹapacauec queso Moisés
1Vichiguiño' qamiri ỹaqaỹa', ma' mashic qamiri lca'acse' ñi qota'a chaqai roỹaxanalo qamiri quiyim qamiri lalamqate', ca ỹaatqajam ra'ijlec so Cristo Jesús só'maq nelaatec quiyim qara'gaxala' quiyim retaxaỹa'pegue' ñi qota'a chicqochigui quiyim seuaqlec da na'qaatec. 2Ma' so Jesús ỹaatqajam qamaxaraic quiñi qota'a, ma' roỹaxana quedajo no'ueenataxanaxac, ca 'nejem so Moisés ỹaatqajam ỹaqamaxateta da lo'ueenataxanaxac quiyá'ogue yi la'a' ñi qota'a. 3Ca' so Jesús 'chichiguiñi quiyim paguec qaimaqachin queso Moisés, ma' 'nejem nqohin cá'maq no'xonshiguim ca 'imec paguec qaimaqachin quecá'maq 'imec. 4Canchaqaica 'imec 'ue cá'maq lo'ueenatec; qam ñi qota'a ñí'maq ỹaatqajam ỹo'uet ná'ogue nanchaqaina 'ue. 5Ca' chaqaida 'neeta so Moisés ỹaatqajam ỹaqamqata quená'ogue ná'maq ỹo'uet quiyi la'a' ñi qota'a; dá'maq lo'ueenatec qaidaata quiyim ỹa'xatetac dá'maq ỹa'xat ñi qota'a ma'le. 6Qam so Cristo ma' ñaalec paguec ỹaqamaxateta da lo'ueenataxanaxac quiyi la'a' ñi qota'a, yijo na'a' chaqainaua naua qomi' naua'maxare, no'm qolqatalec ña'ñaxatqa'chiguiñi queda qarpi'ỹaxac chi ỹovireta'a ca lqodoc, ñitoonqata'gue ma' 'ue da qanaquitaxac.
Ca nco'mataxac na lalamqateripi ñi qota'a
7Ca' vichiguiño' quedá'maq 'naac so Espíritu Santo quenaua naneresañi na'qaatqa:
No'm nagui 'xaiỹaque dá'maq 'naac ñi qota'a caqamiri,
8'neeto' ra'ñi nqai'ñii añi re'taxanatahi, 'nejem so 'auaxaic qomyipi na'le se na'xaỹaxan,
chaqai i'guen na'le ñi qota'a huaalec yi 'laua qaica qom.
9Ca' yi hua'ñi na' yi'guen so 'auaxaic qataa'illipi,
ca' quesá'ogue so cuarenta ñaxari iuana dá'maq shine'tegue na'le.
10Ca vichiguiño' so'ỹa na'le so qomyipi,
ca' shinac: “Se neme da lo'maxac ma' queeta'pegue' da chi la'deenataxanaxac,
chaqai se ỹa'maxaren iuanalo naua ñayicyaxaco.”
11Vichiguiño' so'ỹa na'le so qomyipi, ca' shinapega na'le so'maxare,
quiyim se inoxona'a aỹim ma'le quiyim ñco'mataxaua.
12Ca' qamiri ỹaqaỹa', richilliỹaño', 'neeto' lotqai 'ue caqamiri hueetagui ca nonogoxonaxac añi le'taxanata, ca ỹahotaque sqai quelec ñi qota'a nca'leetauec ma' sqai huelec ñi'maxare. 13Ta'ta'a quiyim quiitalec na'ñaxachita'ta' quenaua'que naua na'xata', tomallaqai queete' naua na'xata' nagui. Qaiyi qaica ca qaỹayin caqamiri quena nasauaxaset, ca ỹa'ñaxat añi le'taxanata quiyim se na'xaỹaxan. 14Ma' no'm ña'ñaxatqachiguiñi qolqatalec da qanaquitaxac 'nejem na' ñaqai 'avichiguiñi, soviraxatqa'ta ca lqodoc, ca' ñouanqau'a ma'le da 'neeta so Cristo.
15Ma' da na'qaatec 'neetasa':
Nagui no'm 'xaiỹaque da la'qaatec ñi qota'a,
'neeto' 'ñaxachii añi re'taxanatahi 'ñiitam so qomyipi se na'xaỹaxan.
16Ca ¿nega'ỹo' só'maq se na'xaỹaxano' na'le na' 'xaỹaque da la'qaatec ñi qota'a? Sá'ogue só'maq naqateco' na'le so Moisés quiyi 'laua Egipto. 17Chaqai ¿nega'ỹo' só'maq ỹovite' cuarenta ñaxari quiyim qanoquii'a quiñi qota'a? Ca chaqaiso só'maq 'ue na lasauaxaset, ca so'maxare sá'ogue ileu huaalec yi 'laua qaica qom. 18Chaqai ¿nega'ỹo' cá'maq 'naapego' na'le ñi qota'a quiyim se inoxona'a ma'le ñi'maxare quiyim nco'mataxaua? Sá'ogue só'maq se na'xaỹaxan. 19Ca' sa'deenaq quiyim se inoxono' na'le, ma' se na'xaỹaxan.
