1Ca' vichiguiño' nagui quiyim ñaqai qaỹachaxantac quiyim seshitaq senoxonaxauo quiyim qanco'mataxaua ñi qota'a, ca' qaretelañi, 'neeto' 'ue ca se inoxono ma'le caqamiri. 2Ma' qai'neeta mashic qaỹa'xatema qomi' da na'qaatec chicqaugui da nca'laxa, 'nejem qomi' na'le so'maxare na' qara'qaataxanem. Qam queso'maxare 'ec qaica ca 'negue da na'qaatec, ma' 'qaatapega, qam sqai huelec. 3Qam qomi' ma' mashic seuaqlec, ca qomi' senoxonaxauo ma'le queca co'mataxac 'neetapega na'le ñi qota'a na' 'naaco':
Vichiguiño' so'ỹa na'le so qomyipi,
ca' shinapega so'maxare quiyim se inoxona'a aỹim ma'le quiyim ñco'mataxaua.
Qam ñi qota'a shi'co' ỹomat na'le da lo'ueenataxanaxac na' ỹo'uet na 'laua. 4Ma' 'ue na hua'ñi quenaua naneresañi na'qaatqa ỹa'xate' so pa'aatec na'xa'a quesaua siete na'xata', 'neracsa':
Ñi qota'a nco'mateco' na'le quená'ogue na lo'ueenatqaipi na' ỹovire'oga so pa'aatec na'xa'a quesaua siete na'xata'.
5Ca lotqai liỹa 'naac yi naneretañi na'qaatec:
Se inoxona'a aỹim ma'le quiyim ñco'mataxaua.
6Qam 'ue ma'le ca inoxona'a cajo co'mataxac, ma' só'maq 'auaxaic 'xaỹa da na'qaatec chicqaugui da nca'laxa sojo qomyipi se ishit inoxono, ma' se na'xaỹaxan. 7Vichiguiño' ñi qota'a pilalec ichoxotetac cajo na'xa'a, ca' chaqaina najo na'xa'a. Ma' ñi qota'a ỹachigoxochichigui da la'qaatec so David na' shi'gom ỹoxe'ueque saua na'xata' quiyí'maq shi'gue naneretañi na'qaatec 'naacsa':
Nagui no'm 'xaiỹaque da la'qaatec ñi qota'a,
'neeto' 'ñaxachii añi re'taxanatahi.
8Ma' quetqai so Josué inoxona'a nqai'en ca nco'mataxac so Israel llaalqaipi, ca ¿negue' quet ca 'neeta quiyim ñi qota'a 'ue quet ca ỹiquetapigui liỹa na'xa'a? 9Ca' ñaqa 'ue cajo na'xa'a co'mataxaqui naataho, qaỹahotaque nco'mataxaqui na lalamaxareteripi ñi qota'a. 10Ma' cá'maq inoxona'a ca nco'mataxac ñi qota'a, ca' nco'matec quena lo'ueenatqaipi, 'nejem ñi qota'a na' nco'matec quena chi lo'ueenatqaipi. 11Ca' ña'ñaxataq, qaiyi senoxonaxau'a cajo co'mataxac, 'neeto' lotqai 'ue ca queetalec da 'neetari'o' na'le so qomyipi se na'xaỹaxan.
12Ma' da la'qaatec ñi qota'a nca'leetauec chaqai 'ue da lquesaxanaxa. Chaqai paguec llaaxa quená'ogue na lecat dos llaaxa', chaqai ishit ỹovirau'a na pa'aauo se re'xogui quena qom chaqai quedá'maq hueetagui da nachaalataxac, vire'ta ná'maq paguec pa'aauo quena qom; chaqai ichoxot ca na'deenataxanaxac, chaqai quecá'maq 'ueenataxac hueetagui añi ne'taxanata. 13Qaica quet cá'maq ishit nañoxotetegueñi quiñi qota'a quená'maq lo'ueenatqaipi ñi'maxare. Ma' ná'ogue na'maxare re'qoota chaqai ỹanetec nqai'en ñí'maq ra'iitalec na'maxare, ñí'maq 'ue ca na'xa'a, ca ñachaataxau'a quiyim sa'xataq ca qaro'ueenataxanaxac.
So Jesús só'maq ỹapacauec la'gaxala' na netaxaỹaxanqajanqaipi quiyim qaretaxaỹa'pegue' ñi qota'a
14So Jesús só'maq llaalec ñi qota'a chaqaisoota qaretaxaỹaxanqajnec quiyim inoxona'a retaxaỹa'pegue' ñi qota'a. Vichiguiño' ỹaatqajam ña'ñaxataq qolqatalec dá'maq seuaqlec na'qaatec. 15Ma' só'maq qaretaxaỹaxanqajnec, so'maxare ishit i'xorene' qomi', ma' qaica ca qarquesaxanaxa. Ma' so'maxare qai'neeta 'xoico' na'le da le'xoric, ma' 'xoic da ne'guenaxaquipi ỹoreta'oguit, 'nejme' qomi', qam so'maxare qaica ca lasauaxaset. 16Vichiguiño' qaica quet cá'maq qaro'chiitaque quiyim ñqo'naxau'a yi nqa'xanqa' ñi 'naxanaxaraic qota'olec, qaiyi nqouagueguelo qomi', chaqai queda lqouagaxa, ca' qarotauan quiyim 'ue ca qareuogoxo.
