So lauo' ñi qota'a quena 'laua chaqai cá'maq neeta'gue da piguim
1Ca só'maq 'auaxaic 'maqataxac 'vii naua no'ueenataxaco quena' qaimaqachin ñi qota'a, qam huaugui aca no'ueenaxanaxaqui neetalec na 'laua. 2Qam so no'ueenaxanaxaqui na' qaỹo'uet ỹaatqajam qaỹa'maxachichiguiñi, ca só'maq pa'aata'guit so 'auaxaic napoxonaxat, leenaxat noma' co'teeta. Ca' neeta'ñi aso ncoỹeraxanaxaqui chaqai so pan lomala' hueetalec na pan mashic qoỹaanot ñi qota'a. 3Ca' queda lahi so liỹa napoxonaxat, ca' 'ue yi liỹa noma' leenaxat qaica ishit ỹovira'a. 4Hueetaugui aso ncopatoxonaxalate 'oro, aso'maxare ncopatoxolate na nichiinaxanaxat. Chaqai aso lahi' so naqataxaquipi, aso'maxare sá'ogue qaỹa'meenlec quena 'oro, so'maxare hueetañigui aso nehoma 'oro hueetagui so pan leenaxat nega'ỹo' ná'maq najo. Qai'neeta hueeta'anyi aso lashilete so Aarón só'maq liỹa no'ualauco' na'le, chaqai saua qari naneretalgoto saua na'qaatqa queso 'maqataxac. 5Ca' quena pa'aashiguim caso'maxare, ca' neesalec saua nadenqatqa qomi' reloqoso'ot ñi qota'a. Ca' naua laua' saua'maxare ipeguentalgoto só'maq hua'ñi quiyim qaỹapalaxat na nasauaxaset. Qam qomi' nagui se seshitaq quiyim ỹaatqajam sa'xataq dá'maq leloxoỹaxac da'maxare.
6Qohine'teco' na'le dajo na' qaỹa'maxajñi sojo 'imec, ca' na netaxaỹaxanqajanqaipi inoxontapougui naua'que naua na'xata' só'maq 'auaxaic noma' quiyim ỹo'uet da lo'ueenataxanaxac quiyim qaimaqachin ñi qota'a. 7Qam yí'maq liỹa pa'aauo noma' qaisoota so lashi na netaxaỹaxanqajanqaipi ishit inoxona'a, qam 'oonoqui' inoxono quiyi ñaaxa; chaqai quiyim inoxono, ca i'xatetauo na isecỹac leuoripi quiyim ỹaano, qaiyi qaỹapalaxat ná'maq chi lo'maxaseteripi chaqai ná'maq lo'maxaset na liỹa qomyipi. 8Ca quedajo, ca' so Espíritu Santo qara'deenaxanaxanegue quiyim só'maq 'auaxaic noma' ñaqai queeta quiyim qaro'ueenataxantapougui quiyim qaimaqachintac ñi qota'a. Ca' saqa' qaỹauachigui ca ñigo quiyí'maq liỹa noma' leenaxat qaica ishit ỹovira'a. 9Dá'ogue dajo 'ec ca chi naloqojnaxanaxaqui quenauá'maq na'xata' seuqatauguilo nagui. Ma' ná'maq nachitaxanataxanqate chaqai aná'maq liỹa qaỹavigaxat huaugui so'maxare quiyim qoỹaanot ñi qota'a, naua'maxare se ishite' quiyim nachinñi nqai'ne' da la'deenataxanaxac ná'maq queetalec dajo. 10Ma' da'maxare chaqaidaata dá'maq re'qoochigui nqui'ỹaxac, chaqai da 'taxac chaqai ná'maq ỹoreta'oguit quiỹoxoc, quená'maq chi no'ueenataxac na qaroshicmaxa. Ca' dajo ñaqa 'ue nqai 'negue, toco' ma' ñi qota'a ỹadalaxat da no'ueenataxac na'maxare.
11Qam nagui mashic novi' so Cristo, ca' chaqaisoota só'maq 'oonoqui' qaretaxaỹaxanqajnec quenauá'maq no'viiñi novite'. Qam acá'maq no'ueenaxanaxaqui ro'ueenataxantapougui so'maxare quiyim netaxaỹaxanqajnec, aca'maxare paguec loyac chaqai paguec 'maxarai, chaqai se no'ueenata quena qom, ma' sqai naalec na 'laua. 12Ca' so Cristo mashic inoxona'a yi noma' leenaxat qaica ishit ỹovira'a. Qam se ỹodoosauo caua leuo' ca quetaq llaalec chaqai ca huaqui llaalec, ta'ta'a quiyim ỹaando sauá'maq chi leuo'. Ca' chaqaida 'neeto' quiyim imaauec 'oonoqui' inoxono, ca 'uo' na'le nqai'en da qarca'laxa sqaica lqodoc. 13Ma' nauá'maq leuo' na huaqui llaalec chaqai na quetaq llaalqaipi chaqai na lo ana huaqui llaale quena' qaỹavigaxat, ca qaỹochigoxolec ná'maq 'ec napio'o, na'maxare llic 'ue da lquesaxanaxa quiyim quiỹota chaqai quiyim co'taxateta ná'maq pa'aauec. 14Ca no'm chaqaida 'neeta dajo, ¡huose'quet sqai paguec lquesaxanqa' saua leuo' so Cristo! Ma' chicqochigui da lquesaxanaxa so Espíritu sqaica lqodoc quiyim so Cristo chi nañaanot ñi qota'a, 'nejem aca nachitaxanataxanqate quiyim ỹaatqajam co'teeta. Ca' saua leuo' co'taxate' yi qara'deenataxanaxac loma' quenauá'maq qarasauaxasete' rauecqataxansa'a da nelauaxa, qaiyi seshitaq so'ueenataxanqot ñi qota'olec se neme nca'leetauec.
15Ca' vichiguiño' so Jesucristo chaqaiso só'maq retaqalgoto qomi' nagui queda dalaxaic 'maqataxac. Ma' vichiguiño' 'uo' na'le da lelauaxa so Cristo, qaiyi qaỹapalaxate' saua nasauaxasete' hueesaugui só'maq 'auaxaic 'maqataxac, chaqai quiyim ná'maq mashic roỹaxana ñi qota'a ishit icoñiguit cá'maq lalamaxat qaica lqodoc ỹachaxantaco' na'le ñi'maxare. 16Ma' quiyim qaỹo'uet aca lere lomalate cá'maq nalamaxaret quiyim qoỹaan, qam ipaquetaque quiyim qaỹa'deenta ileu cá'maq ỹo'uet, qaiyi acá'maq lere ishit ipaquichigui nqohin cá'maq hueetalec. 17Ma' cajo 'maqataxac qaica quet cá'maq 'negue, no'm ñaq nca'leetauec cá'maq ỹo'uet, ta'ta'a quiyim mashic ileu. 18Ca vichiguiño' só'maq 'auaxaic 'maqataxac co'na' qaỹo'uet, qai'neeta ỹouen quiyim qaỹocoraqta'pe saua neuo'. 19So Moisés co'na' ime ỹa'xatem so qomyipi dá'ogue da laqataxaquipi ñi qota'a, ca icono' so qagreta laue toc chaqai aso lasote aso peue leenaxat hisopo. Ca illijñi quesaua leuo' na huaqui llaalec chaqai na quetaq llaalec ỹalequeta'guit na huaxaỹaq. Ime, ca' iñitaxajlec aso lere hueetalgoto saua laqataxaco ñi qota'a, chaqai sá'ogue so qomyipi. 20Co'na'le, ca 'naaco' queso qomyipi: “Nauajo neuo' chaqainaua nauá'maq i'taxachiñi da na'maqataxac ñi qota'a ramaxasoxonlec taỹauguilo nqai'ne' qamiri.” 21So Moisés qai'neeta iñitaxajlec queso leuoripi so no'ueenaxanaxaqui chaqai ná'maq qaro'ueenataxantapega hueetaugui so'maxare quena' qaỹo'uet da qouagaxainaxac. 22Ca' dajo llicyaxac na naqataxaquipi ỹa'xat quiyim sham ná'ogue ná'maq qaỹo'uet ỹouen quiyim qaỹahote'elo naua neuo' quiyim 'ue ca qaico'taxat. Chaqai qaica ca chi qaỹapalaxateta ca lasauaxaset quiyim se qaỹocoraqta'pe caua neuo'.
Dá'maq nañaanaxac so Cristo ỹapalaxat na nasauaxaset
23Ca vichiguiño' 'ue da nouenaxanaxa queca qoỹaano quiyim qaiñitaxajlec, ca' qaiyi qaico'taxat na nouenqaipi, qam dajo ma' chi lqui'i cá'maq hueeta'gue da piguim. Qam na nouenqaipi hueeta'gue da piguim ỹouen cá'maq paguec loyac qoỹaano quiyim qaiñitaxajlec quena'maxare. 24Ma' so Cristo se inoxonougui aca no'ueenaxanaxaqui lo'ueenata ca chaqai qom, ma' so'maxare chi lqui'i acá'maq ỹaatqajam no'ueenaxanaxaqui. Ta'ta'a quiyim ỹaatqajam inoxonot na piguim, ca' nagui, ca inoxona'a ñi qota'a quiyim retaqalgoto qomi'. 25So la'gaxala' na letaxaỹaxanqajanqaipi na judioipi, so'maxare 'oonoqui' inoxona'a yi noma' qaica ishit ỹovira'a quiyi ñaaxa quiyim ỹaano qaiñitaxajlec nauá'maq se lalamaxarete' leuo'. Qam queso Cristo, ca' sqai piltalec quiyim nañaano. 26Ma' quetqai chaqaido' 'neeta dajo, ca 'xoic quet quiyim qaỹalauat chicqochi'ñi na' ñaqai chita'gue qaỹo'uet na 'laua. Qam nagui ma' mashic imiguilo nqohine' naua na'xata', ca re'oq so Cristo nachaxan 'oonoqui', ca' dá'ogue ỹomachigui. Ma' chi nañaanalta' so'maxare, qaiyi naqat ná'ogue na nasauaxaset. 27Ca' chaqai 'nejem quiyim ná'ogue na qom 'oonoqui' ileu, ime, ca nauaanaque ca na'xa'a quiyim qanimit ná'ogue najo, 28ca' chaqaida 'neeta nqai'en so Cristo quiyim 'oonoqui' nañaanalta', qaiyi naqat ná'ogue na nasauaxaset. Ime, ca' lotqai liỹa nachaxan, qam tot naqat na nasauaxaset, ta'ta'a quiyim nca'laxatec ná'maq nauaantaque so'maxare.
