1Ma' da naqataxaquipi chicqo'ot na'le so Moisés 'ec chi la'al cá'maq chalego loyac naỹa'quena, ca' mesqai dá'maq ỹaatqajam no'ueenataxac. Ca' vichiguiño' na naqataxaquipi se ishit ỹa'maxajñi ca qom shim nqo'neu'a ñi qota'a, chicqochigui na qoỹaantapego nachitaxanataxanaxat naua'que ñaxari. 2Ma' quetqai ná'maq naqataxaquipi ishit nachinñi nqai'en ca qom, ca' na nachitaxanataxanqateripi tot qoyiquetalec qoỹaantapego. Ma' ná'maq 'ue na ỹaantapego, quiyima' qaico'taxat, ỹa'deenta quet quiyim tot qaica ca lasauaxaset. 3Qam dá'maq 'neeta najo nachitaxanataxanaxat chi ỹo'leenta'a nqai'en na lasauaxaseteripi quiyi ñaaxa, 4ma' naua leuo' na toorollipi chaqai na quetaq louaaripi ỹaatqajam se ishit naqat na nasauaxaseteripi.
5Ca' vichiguiño' so Cristo, co'na' ỹahotaque nacpegue' na 'laua, ca 'naaco' na'le quiñi qota'a:
Sqai coñichiguit na nachitaxanataxanqateripi, chaqai na qoỹaantapego iseripi,
ta'ta'a quiyim 'maxachiriñi na ỹoshicmaxa.
6Sqai 'maxariñi' na nachitaxanataxanaxat qaỹavigaxat quena iseripi, chaqai ana qoỹaantapego quiyim qanaqat na nasauaxaset.
7Ca na'le, ca shinac: “Nagui ñanac, sahotaque so'uet cá'maq vi'saque, qami' qota'olec,
ma' chaqaida dá'maq ra'qaachiqui' naneretañi caỹim.”
8'Auaxaic 'naac so Cristo quiyim ñi qota'a se ỹa'maxaren chaqai se ỹacoñiguit na nachitaxanataxanqateripi chaqai na qoỹaantapego iseripi chaqai na qoỹaano qaỹavigaxat quiyim naqat na nasauaxaset, 'eno'm chaqaina ná'maq relaataxanlec na naqataxaquipi quiyim qaỹo'uet. 9Ca' na' ime, ca 'naac: “Nagui, ca' ñanac, ca qaiyi so'uet cá'maq vi'saque, qami' qota'olec.” Qam da leloxoỹaxac dajo 'neetasa': Quiyim qanaqat na nachitaxanataxanqateripi qaỹavigaxatetac, ca' ñigui nqohin dajo dalaxaic nachitaxanataxanaxat. 10Ca' ñi qota'a qarco'taxat, ma' so Jesucristo ỹo'ueeto' na'le dá'maq ỹahotaque ñi qota'a co'na' ỹaanec so loshicmaxa quiyim qaỹalauat, ca' imaauec nqai'en dá'maq qaỹahotaque.
11Ca' ná'ogue na letaxaỹaxanqajnec na judioipi quena' retaxaỹa'pegue' ñi qota'a, na'maxare queetalec da lo'ueenataxanaxac quenaua'que naua na'xata' chaqai queetalec quiyim piltalec ỹaantapego ana nachitaxanataxanqate, 'eno'm najo nachitaxanataxanqateripi se ishit naqat na nasauaxaseteripi. 12Qam so Jesucristo na' nañaanalta' sauaxat na nasauaxaseteripi, ca tot liỹa nañan. Ime, ca' nqa'xanñi queda loic ñi qota'a. 13Ca' quiyi hua'ñi, ca nauaanta'a ca na'xa'a quiyim qaillo'oto naua lapiaate' na npa'guenaxauaripi. 14Ma' so Jesucristo ỹachigoxochichigui aso 'oono'lli' lachitaxanataxanqate, ca chaqa'ma' sqaica lqodoc quiyim nachinchiguiñi da no'ueenataxac ná'maq mashic co'taxat. 15Chaqai chaqaiso so Espíritu Santo qai'neeta i'taxajñi coqomi' dajo, ma' dá'maq 'avichiguiñi la'qaatec 'neetasa':
16Ñi qara'gaxala' 'naac:
Ca ña'maqataxac shi'ntegueyi ma'le quecauajo na'xata':
Sellaaguilo añi le'taxanata naua ỹaqataxaco,
chaqai shichiñi quiyi la'deenataxanaxac loma'.
17Chaqai ime, ca lotqai 'naac:
Tot so'leentapega na lasauaxaseteripi chaqai ná'maq se no'uen ỹo'ueetetac.
18Ca' chaqaida 'neeta quena' qaỹapalaxat na nasauaxaset, ca tot qaỹouen ca liỹa nachitaxanataxanaxat quiyim qaỹapalaxat na nasauaxaset.
Ñoquiigaxau'a quet ñi qota'a
19Ca' vichiguiño' qamiri ỹaqaỹa', nagui, ca paguec qaica ca huapiguilo naua qovilli' quiyim senoxonaxau'a yi noma' qaica ishit ỹovira'a, chicqochigui nqohin na' qaỹocorerec saua leuo' so Jesucristo. 20Qolqatalec da dalaxaic qanayicyaxac, da ñicyaxac chicqaugui da nca'laxa, dá'maq ỹauategue so'maxare, ca'lauec nqai'en queso napoxonaxat na' ỹaanec dá'maq chi nachaalataxac. 21Ca' chaqaiso so Jesús só'maq chalego lecaic qaretaxaỹaxanqajnec reloqota'a ca la'a' ñi qota'olec. 22Ca' vichiguiño' ñoquiigaxau'a quet ñi qota'a, qam ỹaatqajam selloqochigui ca qaneneequesenaxac añi qare'taxanata chaqai ỹaatqajam 'chichiguiñi nqaishinaq ca qarpi'ỹaxac. Ma' ñi'maxare nachinñi nqai'en añi qare'taxanata, qaiyi totqai 'ec ñaqa 'ue ca qarasauaxaset, chaqai mashic nquiỹogoñi na qaroshicmaxa quená'maq no'uen huaxaỹaq. 23Ca' ña'ñaxatqa'tegue da qanaquitaxac quedá'maq seuaqlec, sqai saxanaxañi, ma' ñi qota'a ipacqajanchigui dá'maq ỹachaxantac ma'le coqomi'. 24Ca' sedaanqaque ca la'maqa' quiyim ñotauanqata'ta', qaiyi ñi'xoresenaqta' chaqai so'ueetaq cá'maq ỹa'maqachiguiñi. 25Sqai qolaxa'uegue dá'maq lanatec ná'maq se ỹalecapogo quenaua qalapoxoco. Ta'ta'a quiyim ña'ñaxatqata'ta' paguec nagui, ma' mashic sa'deenaq cajo na'xa'a loviraxaqui so qara'gaxala' tot qoỹoxoguit.
26Ma' no'm chaqai shinaxague qolqatalec dá'maq qarasauaxaset, quiyim ma' ime sa'deenaq dá'maq lliqueta, ca tot ishit quet quiyim 'ue quet ca qoỹaano quiyim qaỹapalaxat ca nasauaxaset. 27Chaqaidaata quiyim chalego lecaic da qana'xalenataxac ma' qaimit ná'ogue najo, chaqai ca chalego lauaq norec cá'maq ỹavigaxat, quiguiñi nqai'en ma'le ná'maq npa'guenaxauaripi ñi qota'a. 28Co'quena' 'ue ca se na'xaỹaxana na naqataxac chicqo'ot so Moisés, chaqai no'm 'vii caua dos loqo'm tres quiyim natene'ejta' ca la'qaategue' quiyim ỹa'xate' ca'maxare, ca' ca'maxare se qai'xoren quiyim qaỹalauat. 29Ca ¡huose'quet sqai hueetapigui qavillii quiyim paguec lecaic ca nouaxanaxaset cá'maq 'eco' co'ueetapigui so llaalec ñi qota'a, chaqai liỹoqa'piguita saua leuo', chaqai quiyim ishiuentac so ne'Espíritu ñi qota'a ñí'maq re'xorenataxantac! Sauajo neuo' chaqaisaua sauá'maq i'taxachiriñi da 'maqataxac, chaqai chicqochiguilo quiyim co'teete' nqohine' saua'maxare. 30Sa'deenaq quiyim ñi qara'gaxala' 'naac: “Chaqaỹim ná'maq so'uet ca nouaxanaxaset ca qom, chaqai chaqaỹim ná'maq seshiuetenaxan.” Chaqai qai'neeta 'naac: “Najo ra'gaxalarii ỹo'uet ma'le na nouaxanaxaset na lalamqateripi.” 31¡Chalego lichic quiyim seuqo'oto naua lqai'laqate' ñi qota'a ñí'maq chaqai 'neetari' nca'leetauec quiyim 'ue ca naqajñi!
32Qam o'lliinchiỹau'galo qamiri saua 'auaxaqa ñaxari na' ñaqai chita'gue qaicoỹarelgoto qamiri, na' ỹaatqajam 'ue da la'ñaxac qavillii quiyim na'ñaxachiiguit da re'xoriguii quedá'maq chalego lecaic ne'guenaxaguii. 33Ma' 'ue caqamiri na qaishiuentac, chaqai qaiuanchigui qaỹoqocatac, chaqai na liỹa nouanau'a da re'xoriguii quená'maq qohinta'gue dajo. 34Chaqai qamiri 'ue da re'xorenataxanaxahi quená'maq qaicoñiretari', chaqai vire'ta quiyim 'ue da netoonaxaguii quiyim na'ñaxachiiguit quiyim qarouootaxanegue ca roviñiguii, ma' qamiri 'yiiñita quiyim 'ue ca hueeta'gue da piguim roviñiguii paguec loyac chaqai sqaica lqodoc. 35Ca' vichiguiño' qaica ca ro'chiitaque, ma' chalego lecaic ma'le ca nishiuetenaxaguii. 36Qamiri viñitac quiyim 'ue ca la'ñaxac qavillii, qaiyi shichii 'viichii cá'maq ỹahotaque ñi qota'a, chaqai quiyim coñiguit cá'maq ỹachaxantac ñi'maxare. 37Ma' naua naneresañi la'qaatqa ñi qota'a 'neracsa':
Sqaỹaloq novi' cá'maq naỹa'quena, ỹaatqajam sqaỹaloq,
chaqai sqaica laỹaloxo.
38Qam cá'maq ỹim secoñi'chiguit quiyim chaqaica cá'maq 'maxaraic da no'ueenataxac, ca' da lpi'ỹaxac chicqochigui da lca'laxa.
Qam no'm pilec, ca' se ishit quiyim ñitoonta'pegue ca'maxare.
39Qam qomi' sqai shinqata ná'maq pilec, ca' qaỹopoxoỹaxachigui. Ta'ta'a quiyim shinqata ná'maq 'ue da lpi'ỹaxac, qaiyi qaỹa'maxatetac da qanachaalataxac.
