Se na'maxat so qomyipi quiyi Israel
4Ñi qara'gaxala' 'naac:
Ỹim se yqouaguegue na llaalqaipi,
ma' na'maxare chicqaugui da nedequenaxac.
5Aso late'e nedequen;
na'laxatañi quiyim qaimaqachin na' 'naac:
Ỹim shic, sedaanaque cá'maq nqo'ta aỹim,
cá'maq nañaañim ca noq pan chaqai ca ỹaquip huaxaỹaq,
ca qagreta laue chaqai ca lino,
ca aceite chaqai ca ñi'taxat lataxa.
6Vichiguiño' sapo'ñigui cana le so nayic añi'maxare,
ca sa'ue ca ỹapoxonaxat quenaua lahil,
qaiyi qaica ca lliguec.
7Que'uegue ma'le ná'maq nqo'ta añi'maxare,
qam se ỹovirelec;
'xoic da limiitaxanaxac ma'le,
idaantaque, qam se ỹanata.
Ca ma'le, ca 'naac:
Sopila ca 'auaxaic ỹoua,
ma' queca'maxare paguec ya'maqachiguiñi na'le quenagui.
8Qam añi'maxare qaica ma' ỹa'deena'a quet
quiyim ỹim ná'maq saantapeguem na'le
na trigo, na aceite, chaqai na lataxa;
chaqai ỹim ná'maq ñqo'naxatetashiguim da lesallaxa
quena plata chaqai na 'oro ná'maq ro'ueenataxana quena lashiilqaipi.
9Ca' vichiguiño' liỹa secona
ma'le na trigo chaqai na lataxa
ma' ỹovirelec quiyim raqataxan,
ca' llapoon na qagreta laue chaqai na lino
ná'maq saanem na'le quiyim napogoñi.
10Ca ỹa'ajantac nqaishin ná'maq lqo'itqate añi'maxare,
ca re'oq nqaishin na loshicmaxa sanaxantauec.
¡Qaica quepaxat ma'le dá'maq shine'tegue!
11Sa'ue ma'le ca lqodoc da laỹaac,
chaqai naua lemaqachico quena' dalaxaic ñi shiraigo,
chaqai quenaua na'xata' co'mataxaqui',
chaqai ná'ogue na lemaqachiquipi.
12Ñaqaguijñi na lanaxanqa' 'uva loma' chaqai na higo loma',
quená'maq 'neetapega quen añi'maxare:
Najo ná'maq qanañan,
nañaañim ná'maq ỹim lqo'itqate.
Qam aỹim ñigui nqaishin ca lo'oochaxa leesat,
ca ỹa'ic ma'le na isecỹac neuec.
13Sa'ue ma'le da nouaxanaxaset quesá'ogue so 'auaxaic na'xataripi
na' ỹahotaque na lichiinaxanaxat quena lashiilqaipi,
na' ỹa'ue na no'ueetaxat lichicshaqate chaqai ana lqola,
ma' ỹahotaque queeta'pegue' ná'maq nqo'ta añi'maxare,
ca' coua'e aỹim.
Ỹim na'gaxala', se'taxajñi da ỹa'qaatec.
Ñi qota'olec i'xoren so lalamaxareteripi Israel laseripi
14Ỹim so'uet ma'le quiyim nqo'chiiua':
ca se'xategue da 'laua qaica qom,
ca ỹaatqajam ñineequesene'tot, ca sa'llaxat añi le'taxanata.
15Ca ma' ime, ca' sopilaxatem na lanaxanqa' 'uva loma',
ca' yi ca'megue ne'xoyaqa' ñigui nqaishin
quiyim chicqochigui ma'le ca naquitaxac añi'maxare.
Ca' quiyi ma'le, ca' saachiguit aỹim 'nejem cá'maq na' ñaqai nogot,
'nejem cajo na'xa'a na' ca'e yi Egipto.
16Ca ma'le, ca' 'naac caỹim: Ỹaatqajam qami' ỹoua.
Ca totqai 'naac caỹim: Baal, qami' ỹashiilec.
Ỹim na'gaxala', se'taxajñi da ỹa'qaatec.
17Ca totqai naugui ma'le na qadapi'
na leenqateripi na nashiilqaipi,
ca' tot qaica ma' liỹa quet 'xachi'sac.
18Ca' quecajo na'xa'a, ca so'uet ca iqouagaxa quena Israel,
sa'ue ca ña'deenaxac quena iseripi neuec,
ana qo'o chaqai na nqai'ec;
sopoxoỹaxachigui chaqai ñaqata'a quenajo 'laua
na no'xoshic, na lecat chaqai na lauataq,
qaiyi na ỹalamaxareteripi llaalqaipi so Israel i'maqajlem, nco'matec.
19Qami' Israel, ỹim so'uet sqaica lqodoc quiyim qami' ỹoua,
qami' ỹalamaxarete ỹoua, ma' chaqaida 'neeta da nouaỹaxac,
ma' sqaica nqai 'nejem da iqo'iichi caqami'.
20Ỹim so'uet quiyim qami' ỹoua chaqai ỹaatqajam saqamaxachite',
ca qami' ma'le, ca' ya'yiiñi' quiyim ỹim na'gaxala'.
21Ỹim na'gaxala', se'taxajñi da ỹa'qaatec:
Ca' ỹim ma'le quecajo na'xa'a sasaachiguit na piguim,
chaqai na piguim saachiguit na 'laua;
22na 'laua saachiguit na trigo, na lataxa chaqai na aceite,
ca naua'que nemerashiguim ma'le, 'nerac: Ñi qota'olec danaxan.
23Sa'yiñi ma'le yi ỹalamaxareteripi quena 'laua,
qaica ca taỹa'gue, qaỹimeta;
ca' yqouaguegue ma'le añi leenaxat se qanqouaguegue,
chaqai shinac ma'le quiñi leenaxat se ỹalamaxaret iuo': Ỹaatqajam qami' ỹalamaxaret.
Ca ñi'maxare 'naac ma'le caỹim: Ỹaatqajam qami' qota'olec caỹim.
