Oseas 3

₁Ca ñi qara'gaxala' liỹa 'naac caỹim:

Mo'e', ca rqo'chita ma'le aca 'aalo

nqo'itqate queca nauochaxaua chaqai nanatqa lo'o'.

Ca' chaqaida 'neeta da iqo'iichi quena Israel laseripi,

'eno'm que'uegue na ỹoqa'a qota'olqaipi

chaqai ỹa'ic ana naqaulata qoỹaanot na'maxare.

₂Ca na'le, ca' seshiujnaxana aso 'aalo sauaaque ỹoua,

ca' yi seshiueten na'le ỹovi' quince ỹamirolli' plata

chaqai aso nahirenaxanaxaqui trescientos treinta litro no'qaata nqaishin cana cebada.

₃Ca ma'le, ca' shinac: Ỹaatqajam shi'gom qami' ỹalamaxarete ma'le;

totaxan niyiquiñi' chaqai se nañaañichiguit ca liỹa ỹale,

chaqai ỹim qai'neeta saqamaxateta qami'.

₄Ma' mashic shi'gom ma'le da 'neetari' na Israel llaalqaipi

qaica ca lashi chaqai ca la'gaxala',

qaica ca lachitaxanataxanaxat chaqai ca imaqachin qa',

qaica ca looỹac na netaxaỹaxanqajanqaipi chaqai ca lashiilec na ni'iquipi quenaua la'aate'.

₅Ca ma' ime dá'ogue dajo, ca' rapil na Israel llaalqaipi,

ca' idaanaque ñi la'gaxala' ñí'maq qota'olec quena'maxare

chaqai so David só'maq lashi.

Quenaua co'uaataxante' na'xata'

ỹaatqajam neuogoq quepegue' ñi qara'gaxala'

chaqai ná'maq na'maxa ỹaantauec ñi'maxare.