Santiago 4

₁¿Negue' ca chicqa'gue da neloquiaxac chaqai da pa'guenaxac caqamiri? Chicqaugui da se no'uen nqo'itaxanqachic quiyim se neme reloquitac hueetauguilo qamiri. ₂Qamiri 'ue cá'maq viitaque, qam ma' sqai shichii 'ue caqamiri, ca' lauataxañii. Quecanchaqaica 'ue da rpa'guenaxanaxahi, qam ma' sqai coñiguit cá'maq viitaque, ca' pa'guenaxañii chaqai loguiitac. Qam se naqachiñii cá'maq viitaque, ma' sqa shiilahi ñi qota'a. ₃Chaqai no'm shiilaxañiỹaque, sqai coñiguit, ma' se ỹa'maxañi da rashiilaxanaxaguii, ma' viitaque quiyim tau'a nqai'ñii dá'maq chi rqo'itaxanqachiguii. ₄¡Qam qamiri sqa pacqajñiỹauec ñi qota'a! ¿Sqa 'yiiñio' da queca qom no'm que'uegue da lqo'itaxanqachic quená'maq huelec na 'laua, ca 'ec npa'guenaxaua ñi qota'a? Ma' canchaqaica qom no'm pile'oga da lqo'itaxanqachic quena huelec na 'laua, ca npa'guenaxaua ñi qota'a. ₅'Uo' ca 'neeta, vichiguiño' yaua naneresañi na'qaatqa 'nerac: “So Espíritu Santo só'maq ñi qota'a ỹanauguilo qomi', so'maxare nqo'talo chaqai ỹauoteguelo qomi'.” ₆Qam ñi qota'a quedá'maq chi lqouagaxa, ca' qarotauan. Ma' naua naneresañi na'qaatqa 'nerac: “Ñi qota'a reloxoiguit ca nemaqajnaxai, qam nqouaguegue ỹotauan ná'maq neneequesenaxai.” ₇Ca' vichiguiño' ỹaatqajam nañaañiỹot ñi qota'a, ca ỹaatqajam na'ñaxachiiguit so na'ỹaapec, ca' so'maxare 'eetapeguema ma'le qamiri. ₈Nqo'ñiỹot ñi qota'a, ca ñi'maxare nqo'ñiguita qamiri. Chaqai qamiri sauaqhuaiquipi nquiỹoiuec ná'maq mashic coñigui se no'uen. Chaqai qamiri ma' viitaque rqo'chiỹa ñi qota'a chaqai qai'neeta na huelec na 'laua, ca' co'taxachii' naua re'taxanatahi. ₉Ỹaatqajam chigoita, chaqai nohiñii chaqai naualaxaiñii. Sqa ỹalliguiritac, ta'ta'a quiyim niñitesañi naua rachiri. Chaqai sqai huaguichiguiñi, ta'ta'a quiyim chigoita. ₁₀Ne'xorishiñi'tot ñi qara'gaxala', ca ñi'maxare nanochishiguim quiyim choxoraiqa nqai'ne' qamiri.

₁₁Qamiri ỹaqaỹa', 'neeto' 'ue ca ỹa'xat ca se no'uen queeteguelec ca liỹa. Ma' ca se no'uen ca ỹa'xat queca lqaỹa, loqo'm ỹiquetapigui ca lasauaxaset, ca'maxare se no'uen da ỹa'xat quena naqataxaquipi chaqai napaqueteguelec. Chaqai no'm qami' michi'sac na naqataxaquipi, ca 'nejem qami' cá'maq imitac na nasauaxaset, qam se na'xaỹaxañita na naqataxaquipi. ₁₂Ma' 'oonoqui' ñí'maq ỹaanec dá'maq naqataxaquipi, ca' chaqaiñi ñí'maq imitac ná'maq nasauaxaset, chaqai chaqaiñi ñí'maq ca'laqataxan chaqai ralauataxan. Qam qami' ¿negue' queto' qami' quiyim michi'sac queca lasauaxaset ca riỹa'e'?

₁₃Ca' nagui na'xaỹaxañiỹa da shinac, ma' qamiri quen ná'maq 'ñiỹac: “Nagui loqo'm nete'e saxaquerajo qolaqpegue' yi na'a' loqo'm yi liỹa. Ca ma' sovitaxa, ca senqa'ño'yi 'óna ñaaxa, sahoqe ca qaremeenec, qaiyi 'ue aca qarauegue.” ₁₄Qam sqai huapigui qavillii quiyim sqa 'yiiñii negue' ca 'neeta ca liỹa na'xa'a. Ma' ¿nega'ỹo' ca 'nejem da nachaalataxac ca qom? Da'maxare 'nejem ca neue', ma' ncopaata re'oq, ca lotqai neuagaxatac. ₁₅Dá'maq 'ñiỹaiquet 'ñii'teguesa': “No'm chaqaida ỹa'maxarenta ñi qara'gaxala', no'm ñaq qarca'leetauec, ca so'ueetqo' dajo loqo'm da liỹa.” ₁₆Qam qamiri ỹaatqajam nemaqajnaxaqa naua ra'qaataxahi. Qam dá'ogue dajo maqajnaxac ỹaatqajam se no'uen. ₁₇Ma' ca qom ỹa'den ỹo'uet ca ỹa'maqachiguiñi, qam se ỹo'uet, ca' 'ue ca lasauaxaset.