Santiago 3

₁Qamiri ỹaqaỹarolqa, 'neeto' 'xoic ca napaxaguinataxanaq caqamiri, ma' mashic 'yiiñii quiyim qomi' mashic sapaxaguinataxanqatac paguec lecaic ca qanouaxanaxaset ma'le, mesqai shinqata na qariỹaripi. ₂Ma' qomá'ogue 'xoic na qaro'maxaquipi. Qam no'm 'ue ca se ỹo'maac quiyim 'ue ca ỹa'xat, ca' ỹaatqajam 'maxaraic ỹale, ma' ỹaatqajam ỹa'den quiyim nollaañi dá'ogue da no'ueenataxac. ₃'Nejme' qomi' quena' sanaxagui na lap caua la'gaqa ca shipgaq, qaiyi na'xaỹaxanalo qomi' quiyim sashaxanqatac ná'ogue na loshicmaxa. ₄Sa'ajnaq qai'neeta ana qom lahi' huaxaỹaqse. Ma' ỹaatqajam late'ogue' chaqai ỹaatqajam quesaxan ná'maq nonot ỹamaqata, qam só'maq lo'o ishit quiyim canchaqai 'neeta'gue ỹashaxantac, qam ỹaatqajam cocho'qui' so ỹashiltalcoqui'. ₅Ca' chaqaida 'neeta ñi qaro'legaxanaxat. Ñi'maxare 'ec qaica ca lemaqachic quenaua liỹa' qarouenqa, qam napacqajnaxai quiyim retaqa. ¡Ca 'oochi lodegaxat ishit ỹavic, 'eno'm cocho'qui' ca norec, qam cá'ogue ỹavigaxat! ₆Ca' ñi qaro'legaxanaxat 'neetari' meca norec. Ñi'maxare imaalec ná'ogue na se no'uen neetaugui na qaroshicmaxa, ca' na'axat ná'ogue na qaroshicmaxa. Qam dajo lauaq ỹachigoxotetapegueu'a ca norec sqaica lqodoc, ca' ỹavigaxatetac da qanachaalataxac. ₇Ca qom ishit ỹo'xoiqachit ná'ogue na lashic na iseripi, chaqai na ỹo, chaqai na nqai'ec, chaqai na iseripi huaxaỹaqsec, chaqai mashic ỹo'xoiqachit, ₈qam qaica ca ishit ỹo'xoiqachit ñi qaro'legaxanaxat. Ñi'maxare ỹaatqajam se no'uen, chaqai se nañaañiguit quiyim qoỹoiquentac, chaqai no'qajlec quená'maq ralauataxan. ₉Ma' qaiñiita ñi qaro'legaxanaxat ta'chiguit quiyim semaqachinaq ñi qota'olec, chaqai quiyim seshiuenaq ca qom, cá'maq nadenaxatalta' ñi'maxare na' ỹo'uet. ₁₀Quiñí'maq 'oonoqui' qodap quiyim chicqotapougui da qaremaqajnataxanaxac chaqai da qarishiuenaxanaxac. Qamiri ỹaqaỹarolqa, se ỹa'maxañi quiyim 'neetari' dajo. ₁₁Aca 'oono'lli' ni'llivioxoqui quiyim ne'paxantashiguim ca huaxaỹaq, ca ¿ishito' quiyim lo'daxaraic ca huaxaỹaq, chaqai chim? ₁₂Qamiri ỹaqaỹarolqa, aca hígo lashi, ¿peeta'a ishito' quiyim ma' 'ue aca la, ca' ñaxatec aca leenaxat aceituna? Chaqai aca nanecse uva quiyim ñaxatec aca la, qam ¿hígo? Ca qaican ỹapaguec caca 'oono'lli' ni'llivioxoqui se ishit chicqangui ca huaxaỹaq nochaua chaqai lo'daxaraic.

₁₃No'm 'ue ca 'óna caqamiri ỹajnaxaraic chaqai ỹaatqajam 'xoic ỹa'den, ca no'uen quiyim ỹachaxan da ỹa'maqachiguiñi no'ueenataxac chaqai da neneequesenaxac dá'maq chicqaugui da la'deenec. ₁₄Qam no'm 'ue caqamiri ca hueetagui añi le'taxanata ca lauelgaxanaxac chaqai quiyim 'ue ca naquitetaque, ca sqa taiguit quiyim nemaqajan queda la'deenaxanaxa, ma' no'm 'neetari' dajo, ca chi rayinaxantac chaqai se icoñiguit dá'maq lliqueta. ₁₅Ma' dajo mesqaida dá'maq na'deenaxanaxa chicqo'ot ñi qota'a, ta'ta'a quiyim na'deenaxanaxa huelec na 'laua, chaqai chi la'deenataxanaxac ca qom, chaqai chaqaiso so na'ỹaapec chicqo'ot. ₁₆Ma' cá'maq hueeta'ñi ca npa'guenaxanaxa chaqai cá'maq 'ue ca naquitetaque, ca' chaqaica hua'ñi ná'ogue na se no'uen, chaqai qaica ca na'maxa. ₁₇Qam quecá'maq hueeto'ot dá'maq na'deenaxanaxa chicqo'ot ñi qota'a, ỹaatqajam 'maxaraic da no'ueenataxac, chaqai hualaqhuaic, 'naxanaxaraic, chaqai 'xaỹaxanqachaqaic, 'xorenataxanaxai, chaqai ỹo'uet na ỹa'maqachiguiñi. Se nañoqotaxai chaqai qamaxaraic. ₁₈Chaqai ná'maq nquipiteta'pegue' da na'maxa, chaqaina ná'maq ỹantegueñi da na'maxa, qaiyi no'uen da nachaalataxac na qomyipi.