Jueces 7

₁Ca' so Gedeón mashic qoỹanegue quiyim leenaxat Jerobaal, ca' sá'ogue só'maq liỹaripi so'maxare ñaq qoỹoqo'chiguit so na'xa'a, qa' chaqa'ma' ne'laxashiguim, ca' eec, ca na' ỹovita aso latogot ne'paxantashiguim na le'ec na'ñi yi Harod, ca' renojñi. Ca' yi renotqa' so Madián llaalqaipi pa'a'tegue da rapiguim, nejlec so ca'megue que'tot aso quemaralec qa' ladocai, leenaxat More.

₂Ca' ñi qara'gaxala' 'naaco' queso Gedeón:

—Ỹaatqajam 'xoico' na naviqui' qomyipi. Ca' no'm doxonaxan nqaishin na Israel llaalqaipi, ca ma'le, ca' 'neetapega quiyim chi nca'laxatalta'. ₃Ca' 'ñirapega na qomyipi quiyim no'm 'ue ca no'chi, ca 'maxaraic quiyim pila'a ca la'a'.

Ca' chaqaido' da 'ne'tegue so Gedeón quiyim i'guen so nalliripi. Ca' ỹovi' veintidos mil so pilo ỹalliripi, ca' diez mil so ỹalliripi no'ueenañi. ₄Qam ñi qara'gaxala' 'naac queso'maxare:

—Ñaqaiyiita 'xoic na'maxare. Ne'taxasom nqai'ñi' quiyi huaxaỹaq. Ca' quiyi hua'ñi ma'le, ca' se'guen, ca' ỹaataq ma'le cá'maq eec chaqai cá'maq sqai eec.

₅Ca' so Gedeón ne'taxanaxasom so qomyipi queso huaxaỹaq. Ca' ñi qara'gaxala' 'naaco':

—Ỹoochire'oga cá'maq ỹimqata'ña na huaxaỹaq cada napoquena 'ec ỹahote'e da pioq ne'taxac, quená'maq ỹa'yiichiriñi naua le'cootal quiyim ne'et.

₆Ca só'maq ỹimqata'ña na huaxaỹaq cada napoquena, ca inaqataugui na lap ỹahote'e da 'ec pioq ne'taxac, ỹovi' trescientos, ca sá'ogue so liỹaripi ỹa'yiichiriñi naua le'cootal quiyim ne'et. ₇Co'na'le, ca' ñi qara'gaxala' 'naaco' queso Gedeón:

—Quenauajo trescientos ỹalliripi, ca ñca'laxaterec ma'le qamiri, ca ỹim ñalauajñi ma'le na Madián llaalqaipi. Ca' ná'ogue na liỹaripi pilo nqai'ñi'.

₈Ca' so Gedeón ilaro sá'ogue so liỹaripi quiyim pila'alo naua la'aate' na'derañi. Qam na' saqa' pil so qomyipi, ca' lapoon, icona so nehomallipi chaqai aso lpe'tellipi. Ca' no'ueenañi liỹaatac so trescientos ỹalliripi nca'acseripi, ca naalec so quemarelec pa'aashiguim. Ca' so na'ñi so Madián llaalqaipi pa'a'nquira, ñiichi'ñigui so ca'megue.

₉Ca' queso pe, ca' ñi qara'gaxala' ỹilen so Gedeón quiyim ne'laxashiguim, ca eec, nalauate'e' so Madián llaalqaipi:

—Ma' ỹim so'uet quiyim qadoxonqui' ma'le. ₁₀Qam no'm 'ue ca rqolonaxa'e' quiyim nalauachire'e', ca' 'au quirepegue' yi neeta'ñi, riỹa'isac ñi Fura ñí'maq qachaaqainachiqui'. ₁₁Ca' na'xaỹaxañira'a ma'le na la'qaatqaipi yi'maxare. Ca ma'le, ca 'ue ca rquesaxanaxa'e' quiyim nalauachi'.

Ca' so Gedeón renojñi, quepegue' so qomyipi, nauequeta'pegue' só'maq llaaqainatec. Ca' ỹaatqajam ỹovirero queca lauaanaxanqa' so qomyipi qanpa'guenta'pegue'. ₁₂Ca' sojo Madián llaalqaipi chaqai so Amalec llaalqaipi chaqai so qomyipi chicqa'gue da lqodoigue ỹaatqajam nalo'tegue so ca'megue, 'ec ana piñai. Ỹaatqajam 'xoic ana lalo nauaanaxanaxa late'e, 'ec na lo'uaxanaxa hueeto'ot na lqodoc aso huaaxai. ₁₃Ca' so Gedeón co'na' tot qoỹoqaque cá'maq lauaanec so npa'guenaxauaripi, ca' 'xaỹa so 'óna neetaho quena nouaataxanaq, ra'qaataxantapega so liỹa quecá'maq 'neeto' ca le'guemataxac. 'Naaco':

—Se'guematetapega quiyim 'ue so pan chicqaugui ana cebada naqalecqotaho naatau'a na senqata'ñi. Ca na' taachigui ca 'imec na'daañi, ca' i'guenaxajñi.

₁₄Ca só'maq qara'qaataxantapeguem 'naaco':

—¿Negue' queto' ca liỹa? Qaicaata ca lecat so Gedeón, llaalec so Joás, Israel le'ec. Ca' ñi qota'olec peeta'a ỹaanem so Gedeón quiyim loxonec na Madián llaalqaipi chaqai ná'ogue na liỹaripi.

₁₅Ca' so Gedeón co'na' 'xaỹa so qaichoxotetac ne'guemataxac chaqai da leloxoỹaxac, ca so'maxare nqouagaxainot ñi qota'olec. Ime, ca' pila'a ca nco'matqa' so llaalqaipi so Israel. Ca 'naaco' queso qomyipi:

—¡Ne'laxachishiguim, ma' ñi qara'gaxala' ỹaanema qomi' quiyim qodoxonec ná'ogue na Madián llaalqaipi!

₁₆Ca chaqa'ma' iuagaxachigui so trescientos nalliripi, tres lapooqote' nqai'en. Ca' ỹaanem ana lpe'te qagreta loua' lasote chaqai ana nehoma 'laua hueetagui na lcoỹeraxanaxat ỹaviquetaugui. ₁₇Ca 'naaco' queso nalliripi:

—Ma' sovitegue da lahi na nco'matqa' na qanpa'guenaxaua ỹaatqajam na'ijñii'tegue aỹim, ca' denaxachichigui cá'maq shine'tegue. ₁₈Ma' ỹim chaqai ná'maq iỹaripi spe'taxagui ana qarpe'te, ca' pe'taxañii qamiri qai'neeta quenaua lahil na co'matqa'. Ca' qamiá'ogue raualqaiỹagui, qamiá'ogue 'ñiỹac: ¡Qariỹaatac ñi qara'gaxala' qota'olec chaqai ñi Gedeón!

₁₉Ca' so Gedeón chaqai so cien nalliripi na' ỹovijtegue da lahi yi co'matqa', co'na' sham qaỹadalaxat so neloxoỹaripi queso pe lauel. Ca co'na'le, ca qaipi'chigui so npe'tellipi qagreta loua' lasote, chaqai ỹopoxoỹaxachigui aso nehoma 'laua lo'qoota'a. ₂₀Ca' saua tres lapooqote' sá'ogue neuagaxat chaqai pe'taxan chaqai ỹopoxoỹaxachigui aso lo'qoota'a nehoma 'laua. Chaqai lo'qoota'a queda nemaq ca lcoỹeraxanaxat, ca' ana lpe'te lo'qoota'a queda loic. Ca' ỹaualqatagui, 'neeta'gue:

—¡Da lauataxac chicqochigui ñi qara'gaxala' qota'olec chaqai ñi Gedeón!

₂₁Ca ma' na Israel llaalqaipi se reda quenaua lauaanaxanqate', ca' so ỹalliripi na'ñi yi Madián ỹaualqatagui, ca' 'eet. ₂₂Ca' so trescientos Israel llaalqaipi queetalec quiyim pe'teetapigui ana lpe'te qagreta loua' lasote. Ca' ñi qara'gaxala' ỹo'uet quiyim chi nalauajta' so Madián llaalqaipi chaqai quiyim 'eet, taigue da Bet-sita queso nayic queda Zerera. Ca' chi ỹovireta'a yi lqodoc yi Abel-mehola, huaqate'e' yi Tabat.