So Baruc retaqalec so nerqaipi quiñi no'ueenaxanaxaqui
1Na' ỹovite' cuatro ñaxari quiyim so llaalec so Josías, leenaxat Joacim, ỹoiquentac quiyim nashi yi 'laua Judá, ca ñi qara'gaxala' ỹilen so Jeremías, ca 'naapega: 2Coñita aca lere, ca 'chirelec ná'ogue ná'maq ỹa'qaatqaipi taỹalec yi Israel chaqai yi Judá chaqai na liỹa qomyipi, chicqochi'ñi na' sa'ue da ỹa'qaatec caqami' na' ñaqai neetaho so Josías, chi ỹovireta'a nagui. 3Sqoue ỹaxanñi dá'maq se no'uen ỹo'ueetetac ná'maq neetalec na Judá ma' ỹa'den ná'ogue ná'maq le'xoric sahotaque selata, ca' sapalaxat na se no'uen ỹo'ueetetac chaqai na lasauaxaset.
4Co'na'le, ca' so Jeremías roỹaxana so llaalec so Nerías, leenaxat Baruc, ca 'naapega quiyim ỹiriñi dá'ogue dá'maq 'naac ñi qara'gaxala', ca' so Baruc ỹiriñi caso lere. 5Ime, ca' so Jeremías ỹa'ue da laqataxac queso Baruc, 'naac:
—'Ajñi' dá'maq shintari' quiyim se seshit shicpegue' añi no'ueenaxanaxaqui quiñi qara'gaxala'. 6Vichiguiño' qami' qui'o' ma' ipalata'oga ca na'xa'a nqopaaqataxaqui na qom, ca taqairelec ná'maq selachirelec 'chiriñi, qaiyi 'xaỹa da la'qaatec ñi qara'gaxala' na qomyipi chaqai ná'ogue na noviro chicqa'ogalo naua na'aate' quiyi Judá. 7Sqoue quiyim ỹashiila ñi qara'gaxala' chaqai ỹaxanñi da se no'uen lo'ueenataxanaxac ma' chalego lecaic dá'maq lonogoxonaxac ñi qara'gaxala' quiyim ỹadentalec na'maxare.
8Ca' so Baruc ỹo'uet dá'ogue dá'maq qohinapega queso netaxaỹaxaqui Jeremías, ca' quepegue' ñi no'ueenaxanaxaqui, ca' retaqalec da la'qaatec ñi qara'gaxala'.
9Ca' quesaua cinco ñaxari chaqai nueve shiriguiri quiyim nashi quiyi Judá so llaalec so Josías, leenaxat Joacim, ca' quelec quiyim nqopaaqachit quiñi qara'gaxala' so neeta'ñi yi Jerusalén chaqai ná'maq chicqa'ogalo naua liỹa' na'aate' quiyi Judá. 10Ca' so Baruc quepegue' yi paguec pa'aauo nasoxoc añi no'ueenaxanaxaqui quiyi ñigo quiñi qaỹamata'gue dalaxaic lasom, ca' quiñi lauo' so Gemarías só'maq llaalec so Safán, só'maq lere lo'o, ca retaqalec aso lere hueesalec saua la'qaatqa so Jeremías, 'qaatac nqai'en sá'ogue so qomyipi.
So Baruc retaqalec aso lere, 'qaatac nqai'en so na'gaxalateripi
11So Micaías, só'maq llaalec so Gemarías, chaqai laual so Safán, 'xaỹa dá'ogue dá'maq la'qaatec ñi qara'gaxala' quesó'maq retaqateguelec so Baruc. 12Ca' quepegue' yi la'a' so nashi quiñí'maq lauo' so lere lo'o, neetaugui lapoota'ta' sá'ogue so nashillipi: Elisama só'maq lere lo'o; Delaía só'maq llaalec so Semaías; Elnatán só'maq llaalec so Acbor; Gemarías só'maq llaalec so Safán; Sedequías só'maq llaalec so Hananías, chaqai so liỹa nashillipi. 13So Micaías ỹa'xat cá'ogue cá'maq 'xaỹa co'na' so Baruc retaqalec aso lere, 'qaatac nqai'en so qomyipi. 14So nashillipi ila' so Jehudí só'maq llaalec so Netanías, laual so Selemías chaqai liỹa laual so Cusi, quiyim 'naapega so Baruc quiyim ỹodo aso lere só'maq retaqateguelec na'le, 'qaatac nqai'en so qomyipi. Ca' so Baruc icona aso lere, ca' quepegueto saua'maxare. 15Ca saua'maxare 'nerac:
—Nqa'aamiriñi, ca' taqairelec aná'maq lere.
Ca' so Baruc retaqalec aso lere. 16Ca', chi retaqalec, ca no'chata' na' 'xaỹa, ca' queda lqolonaxa, ca retaxaỹata' 'nerecta':
—Sahoqe la'xaỹaxac ñi qarashi quedá'ogue dajo.
17Ime, ca' qohinac queso Baruc:
—Ñigo', 'xachi' cá'maq 'neeto' na' 'chiriñi dá'ogue dajo.
18Ca' so Baruc 'naaco':
—Ñi Jeremías ñí'maq 'naac shiriñi dá'ogue, ca' ỹim shiriñi canajo lere.
19Co'na'le, ca' qohinac queso Baruc:
—Ca' ¡qami' chaqai ca Jeremías 'iichii nañoxochiñi chaqai qaica ỹa'den cá'maq ñiita'ñi!
So nashi Joacim copata'a aso lere
20So nashillipi illa'ñi aso lere ñi lauo' so Elisama só'maq lere lo'o, ca querepegue' yi la'a' so nashi, ca' ra'qaataxanta quedá'ogue dajo. 21Ca' so nashi ila' so Jehudí quiyim que'oga aso lere quiyi la'a' so Elisama só'maq lere lo'o. Ca co'na' so Jehudí noviraxato aso lere, ca' so Jehudí retaqalec, 'qaatac nqai'en so nashi chaqai so lotauaripi lapoota'ta'. 22Qam ma' viichigui so shiraigo quena' novi' na no'oomaxa, ca' so nashi neetaugui ñi lauo' quena' no'oomaxa, ca' 'ue so npoqo lahi' hueetañigui ana poqo ỹaviquetaugui. 23Ca quena' so Jehudí ỹomate' saua tres loqo'm cuatro llico retaqalgoto, ca' so nashi ichaxauec queso lecatoqui', ca' inaxañigui so lole' lahi', ca ỹavigaxat. Ca' chaqaida 'neeta'gue, chi ỹovireta'a quiyim imeuo aso lere. 24Ca' so nashi chaqai vire'ta so lotauaripi, só'maq 'qaatapega sá'ogue só'maq qaretaqateguelec, ỹaatqajam qaica ca lqolonaxa chaqai ñaqai 'ue quet ca nqui'ic nqai'en. 25Ca' so Elnatán, so Delaía chaqai so Gemarías ne'xoresentetot so nashi quiyim se copata'a aso lere, qam so'maxare se na'xaỹaxan. 26Ta'ta'a quiyim ỹilen so Jerameel só'maq 'auaxaic nashi llaalec chaqai so Seraías, llaalec so Azriel, chaqai so Selemías, llaalec so Abdeel, quiyim qaiconlec so Jeremías chaqai so leraxanqajnec Baruc. Qam ñi qara'gaxala' ỹoxochiñi.
So Jeremías liỹa qoỹichiñi saua la'qaatqa
27Ca' na' ime quiyim so nashi copata'a aso lere hueesalec saua la'qaatqa so Jeremías, ỹichiño' na'le so Baruc, ca' ñi qara'gaxala' ỹilen so Jeremías, 'naaco': 28Coñita ca liỹa lere, ca 'chiriñi sá'ogue só'maq hueetalec aso 'auaxai só'maq copata'a ñi Joacim, nashi quiyi Judá. 29Ca 'ñiraco' ma'le: Ñi qara'gaxala' 'naac: Qami' copachira'a aso lere chaqai taqaira'a ñi Jeremías sauaxat quiyim ỹiriñi ñi nashi quiyi Babilonia ỹaatqajam llic novi' nopoxoỹaxajñi najo 'laua chaqai qaica nqai'en ca qom chaqai na isecỹac. 30Vichiguiño' ỹim na'gaxala' shinac caqami' Joacim, nashi quena 'laua Judá: Qami' qaica qachaalqui' nqa'xanñigui ma'le añi nqa'xanaxaqui so nashi David. Ca ma' rillivi', ca vi'sa'guit ca npa'ỹaaxa chaqai ana loñi quiyi pe. 31Chaqai qami' chaqai na qachaalaxai'ipi chaqai na rotauachi'ipi sa'ue ma'le ca nouaxanaxaset da lasauaxaset. So'uet quiyim taalgoto qamiri chaqai ná'ogue ná'maq neeta'ñi na Jerusalén chaqai ná'ogue na 'laua Judá, ná'ogue na ne'xoric sa'xateta'guit, dá'maq qamiri se na'xaỹaxañiỹa.
32Co'na'le, ca' so Jeremías icona aso liỹa lere, ca' ỹaanem so Baruc só'maq leraxanqajnec, ca' ỹiriñi cá'ogue cá'maq 'naac so Jeremías, sá'ogue só'maq hueetalec aso lere só'maq copata'a na'le so nashi Joacim. Ca' so Jeremías 'xoic so liỹa ỹoqoto, 'nejem só'maq 'auaxai lere.
