Dá'maq ỹahotaque so Sedequías queso Jeremías
1So Nabucodonosor só'maq nashi quiyi Babilonia ỹano quiyim nashi quiyi Judá so llaalec so Josías, leenaxat Sedequías, ỹana'ñi yi loma' so Joacim llaalec, leenaxat Jeconías. 2Qam vire'ta so Sedequías chaqai so lotauaripi chaqai so qomyipi se na'xaỹaxana so la'qaatec ñi qara'gaxala' ỹichiñi nqai'en so letaxaỹaxaqui Jeremías.
3Ca' so nashi Sedequías ila' so Jucal, llaalec so Selemías, chaqai so netaxaỹaxanqajnec Sofonías, llaalec so Maasías, quiyim querepegue' so Jeremías, ca 'nerapega: “Nqouagaxaiñirelgoto qomi' quiñi qara'gaxala' ñí'maq qota'olec coqomi'.” 4So Jeremías saqa' ỹaatqajam qaicoñi', ca' so'maxare ñaq ỹouootegueri', ỹouootapigui so qomyipi. 5Ca' so nalliripi so faraón nenoxonec quiyi Egipto. Ca na' ỹa'den dajo so caldeoipi na' ñaq nalauateta'pegue' yi Jerusalén, ca' eec, ca'e yi'maxare.
6Co'na'le, ca ñi qara'gaxala' quepegue' so Jeremías, ca 'naapega quiyim 'naac 7ñi qara'gaxala' quesaua nelaatqa:
—'Ñiỹapega ñi nashi quiyi Judá ñí'maq nelate' qamiri quiyim yinate', quiyim so nalliripi so faraón só'maq naqueta ỹahotaque rotauañii, pil queda Egipto. 8So caldeoipi liỹa rapil ma'le, ca lotqai queu'a na na'a' Jerusalén, ca' loxonec ma'le, ca copata'a. 9Ỹim na'gaxala' sa'ue da ỹaqataxac: Qaica nemaqajnaxaguii, chaqai sqai 'ñiitapega quiyim so caldeoipi chaqa'ma' eec, qam sqaida. 10Ca no'm qamiri qadoxoñiguii so nalliripi so caldeoipi quená'maq ñaq nalauatetac, ca sqo vito'olqai' saua ỹale' que'maaxaqa no'ueendañi quiyi nco'matqa', ca' chaqaisaua sauajo ỹale' ma' na'ñaxate', ca' copatera'a ma'le najo na'a' lodegaxat.
Da ncoñiitaxac so Jeremías
11Ca na' so nalauataxairipi caldeoipi mashic sham eec ca'e yi Jerusalén, ma' mashic nepalata so nalliripi so faraón, 12ca' so Jeremías ca'e yi na'a' lodegaxat ma' sham quepegue' yi na'laua so Benjamín, ca ỹo'uet quiyim qaneuagaxachigui na nouenqaipi quená'maq chi la'aayaxaua. 13Ca na' ỹovita ñi lasom qaỹamata'gue Benjamín, ca 'ue so ỹale leenaxat Irías, llaalec so Selemías chaqai laual so Hananías, so'maxare nashi queso neloxoỹaripi, nollaañi so Jeremías, ca 'naaco':
—¡Qami' sham 'irougui na caldeoipi!
14Ca' so Jeremías 'naaco':
—¡'E', mesqai llic, mesqai saugui na caldeoipi!
Qam so Irías se na'xaỹaxan, ta'ta'a quiyim coñi', ca ỹauegueu'a so na'gaxalateripi. 15Ca' saua'maxare ro'ỹita so Jeremías, ca relaataxandelec quiyim qaỹouaxan chaqai qaicoñi' quiyi la'a' so Jonatán, só'maq lere lo'o, ñi lauo' ñigui nqohin quiyim ncoñiitaxanaxaqui. 16Ca' so Jeremías qainaxa'ñigui añi ncoñiitaxanaxaqui pa'ỹaañi ñí'maq 'xoic so na'xataripi hueeta'ñigui.
17Ca' so nashi Sedequías relaataxane'oga so Jeremías quiyim qaỹauego quiyi la'a'. Ca co'na' ỹoviro so Jeremías quiyi la'a' so nashi, ca' so nashi inat, nemoote'tot 'naaco':
—¿Tegue' chaqaica ca la'qaatec ñi qara'gaxala'?
Ca' so Jeremías 'naaco':
—Ajá'a, 'ue, ca da'maxare 'neetasa': Qami' nashi, qami' noxonec ma'le quiñi nashi quiyi Babilonia.
18Ca' so Jeremías qai'neeta inat so nashi Sedequías:
—¿Negue' cá'maq se no'uen so'uet caqami', loqo'm quena rotauachi'ipi, loqo'm quena qomyipi quiyim qayillaugui ana ncoñiitaxanaxaqui? 19¿Negue' cá'maq hueesa'gue nagui caua netaxaỹaxaqui' cauá'maq i'taxatesegueñi quen quiyim ñi nashi quiyi Babilonia sqai naga'alo qamiri chaqai na na'lauahi? 20Ca' nagui qami' ỹashi, ñaq na'xaỹaxañirañi, ca 'viichi' dá'maq sashiilaxantaque sa'xat nagui. Totaxan yopilaxachira'a yi la'a' so Jonatán só'maq lere lo'o. 'Ase' no'm yileua'anyi.
21Ca co'na'le, ca' so nashi Sedequías relaataxanlec quiyim so Jeremías ncoñiiteguesec, qam chaqai hueeta'ñi yi nasoxoc so neloxoỹaripi, ca quiyi na'xa'a lotqai qaỹodou'a ca 'óna pan quena pan lo'ollipi. Ca' dajo qohinta'gue na' ñaqa 'ue na pan quiyi na'a' lodegaxat. Ca' chaqaida 'neetari' so Jeremías na' hueeta'ñi yi nasoxoc so neloxoỹaripi.
