Job 4

Qami' Job, ỹaatqajam re'qoota quiyim se ra'maqairiñi

quiyim 'ue ca retaxaỹa qami',

qam se ya'maxañi quiyim yi'maqata.

₃Qami' ma' 'xoic quen na paxaguiñi'sac,

chaqai 'ñaxachi'sac na sqaica ca lquesaxanaxa;

₄qami' ná'maq 'ñaxachi'sac quen quiyim ne'laxashiguim cá'maq huaañi,

chaqai coñisa'guit cá'maq sham huaañi,

₅¿qaullirapeguem quiyim 'ue da ne'guenaxaqui'

chaqai qaica ca rquesaxanaxa'e'?

₆Qami' ma' ỹaatqajam qami' qamaxaraic lo'ueenataxanqajnec ñi qota'olec,

qami' ỹale ỹalamrete' naua ra'deenataxanaxagohi',

¿negue' quet cá'maq 'neeta quiyim qaica ca rpi'ỹaxaqui'?

₇'Deenataxañirac, sha'apiguito' quiyim 'ue ca no'viñira'gue quedajo

quiyim queca qaica ca lasauaxaset, qam ỹoviro'ot ca le'xoric.

₈Quedá'maq sovira'guit yapaxaguinegue,

quiyim ná'maq ỹo'ueetetac da nalauataxanaxac chaqai da se no'uen,

ca'maxare icoñiguit ma'le da laseue' dá'maq ỹo'ueetetac.

₉Ñi qota'olec queda lonogoxonaxac 'ec pe'telec na'maxare,

ca ná'ogue nomachichiguiñi.

₁₀'Eno'm noỹen loqo'm ronoqo 'ec ca sauaxaic leta'allipi,

qam ñi qota'olec i'maxañi nqai'en ỹaqaguite' naua louee.

₁₁Nilliviñi ma'le 'ec ca sauaxaiquipi sqaica ca loxonec,

chaqai na llaalqaipi neuagaxatac.

₁₂Ỹaatqajam nemooteto quiyim 'ue ca ỹa'xaỹaxac,

ỹaatqajam nemooteto, ca 'ec sham se sa'xaỹa da lelamaxa.

₁₃Ca na' pe na' ỹovitot da lelaxac na qom,

ca' 'ue so i'guemataxac se i'taxategue ca ilaxac.

₁₄Ca' novitot aỹim da iqolonaxa,

ca ná'ogue na ỹoshicmaxa i'loxol.

₁₅'Ue so nonot 'ec pi'chigui na ỹashic,

ca' chi yapochaxateta.

₁₆Ca 'ec 'ue so hueete'eyi,

seuane'ta so lqui'i,

qam se seuañigui na lashic.

Ca nachicochiguiñi... Ime, ca' sa'xaỹaque so nivillaxac, 'naacsa':

₁₇¿Peeta'a ishit ca qom 'maxaraic ca no'ueenataxac quiyim hueeto'ot ñi qota'olec?

¿Peeta'a ishit co'teeta qaca aca lete quiyim hueeto'ot ñí'maq no'ueetqo'?

₁₈Ca vire'ta na lelaatqaipi piguim laseripi mesqaica cá'maq ỹaatqajam qaipi'ỹa'a,

ma' vire'ta na nelaatqaipi piguim laseripi qaica ma' 'ue quet ca qaica ca la'axaset quiñi qota'olec.

₁₉¡Huose'quet quena chaqai qom ma' paguec qaica ca lquesaxanaxa,

'ec ca 'imec 'laua qaỹa'yiñi queca lamoxoiqa',

ca ca'maxare ishit qaipataxañi, 'ec ca pit hueetaugui ca nooỹac!

₂₀Ca' cajo qom quiyi nete'eta chaqai quiyi avit, ca qanopoxoỹaxajñi,

ca' ỹaatqajam ileu, qaica ca 'negue nqohin.

₂₁Ca' da nachaalataxac imeuo, 'ec ca neuaaraxanaxat qaỹachipiaxat;

ca' ileu, qam saqa' ỹovi' quiyim 'ue ca la'deenec.