Job 5

₁Qami' Job, raualqai', sha'apiguito' 'ue ca saachiguit qami'.

Ca ¿nega'ỹo' ca nelaatec piguim le'ec 'guiñitot?

₂Nañaañichiguit da nqui'ic loqo'm da ne'xoric,

da'maxare ỹaatqajam qaica ca 'negue, qam ỹaueca'a qami' da nelauaxa.

₃Ỹim seuana na qaica ca ỹa'den noquiiquetashiguim da lesallaxa,

qam da lomajshaxac sqaỹaloq 'guiñi, ca' na'laañi.

₄Qaica ca ỹotauan na llaalqaipi;

quiyim hueetauguilo naua netaxaỹaxaqui' se qana'xaỹaxana,

chaqai qaica ca qoshiilec.

₅Na la na lanecsec ỹa'ic na nqopaaqatqoipi,

naqat, ỹachigoxotetapougui na leesat,

chaqai na 'ec ỹalauat laquip pa'guen da lesallaxa.

₆Na se no'uen sqai ñaxajshiguim quena 'laua,

da ne'xoric sqai chicqañi:

₇chaqaina na ỹale ná'maq chicqaugui da ne'xoric,

'nejem na norec chicqañigui aca raqataxai poqo.

₈Queta' ỹim qami', ca sopilot queta'le ñi qota'olec,

ca ñañaanot queta'le.

₁₅Ñi qota'olec nca'laxatec ca 'xoraic

quiyim se qoỹaxanac quena hualoxonyipi;

₁₆chaqaiñi ñí'maq lpe'eet ná'maq qaica ca lquesaxanaxa,

¡ñi'maxare ishit ỹapogui na lap na hualoxonyipi!

₁₇Chalego la'maxa queca qom quiyim qaretaxaỹa'a quiñi qota'olec;

totaxan liỹoqoira'piguit quiyim ỹoviraqchiraxaua' ñí'maq qaica ca lqalanec.

₁₈Ma' no'm ñi'maxare ỹo'uet ca ncoñiraxa, qam nataren chaqai ỹaxajlec;

chaqai no'm da lqai'laxat da rouaxanaxana, qam qai'neeta ỹa'ue da na'maxa.

₁₉Chaqai ỹaatqajam se neme quiyim ro'ootaxanteguelec qami' quenaua lichico,

chaqai sqai ỹaxanegue quiyim ỹoviro'ot qami' ca se no'uen.

₂₆Ỹovira'a nqai'en qami' cá'maq ỹaatqajam qachaaxa'e' quiyim qami' qo'xoỹom,

'ec aca la ỹiita.

₂₇Cá'maq soviraqa'guit qarapaxaguinegue quiyim chaqaida 'neeta dajo.

Na'xaỹaxañita dajo, chaqai qami' 'guiñi'.