Malaquías 2

₁₀¿Ca mesqai 'oonoqui'o' cá'maq sachigoxosqaugui qareta'a, ca chaqaiñi ñi qota'olec ñí'maq qomá'ogue qomi' lo'ueenatqaipi? Ca' ¿chi'negue ma' chi ñayinqatecta', ca' seualaxainqatac da 'deenaxac ỹo'ueeto' na'le ñi qota'olec queso 'auaxaic qareta'allipi? ₁₁Yi Judá se na'xaỹaxana ñi qota'olec, ca' chalego la'aaqa' naua qaỹo'ueeteta'pe quiyi Jerusalén chaqai quiyi Israel. Yi Judá chi iualaxainari' da lco'taxa ñi no'ueenaxanaxaqui na' re'xorenataxan ñi qara'gaxala', chaqai na ỹalliripi quiyi Judá icona quiyim loua ana 'aallipi nqouagaxainot na nashiilec nqolac. ₁₂¡Saxanchi' ñi qara'gaxala' ỹapalaxatac ná'ogue na qomyipi ná'maq ỹo'ueetetac dajo, canchaqaica quena'maxare, 'eno'm cá'maq nodootaho ca lachitaxanataxanaxat quiñi qara'gaxala' sqaica lqalanec.

₁₃Qam qamiri paguec lecaic dá'maq 'viichitac: ma' 'paxanaxachiijlec ada ncopatoxonaxalate quiñi qara'gaxala' quena rachiripi quena' noỹiñitac, ma' ñi qara'gaxala' tot netooñi'chiguit quena' 'ue ca rachitaxanataxanaxachii. ₁₄¿Qam qaiyiita nataxañitac qamiri negue' cá'maq 'neeta quiyim se icoñiguit? Ma' ñi qara'gaxala' iuanchigui quiyim se ipaguigui nqai'ñi' dá'maq 'auaxaic ra'qaachiqui' cañi roua'e', na' ñaqai chita'gue o'ñichiguit, na' ñaqai qami' ne'nec. ¡Ỹaatqajam qamiri huegaxaua' leta'al, na' qami' 'ỹaañirec da ra'qaachiqui', nallichiralta', 'ñirac quiyim raqamqaite'! ₁₅Ca ¿mesqai qaiñiito' ñi qota'olec ñí'maq lo'ueenatec na roshicmaxa'e' chaqai na ra'alli'? Ca ñí'maq qota'olec ỹahotaque quiyim 'ỹaañitot ca qachaalquenaxanaxaqui'. Ca' ¡qamiri cochiiỹa dá'maq nachaalataxaguii, ca 'neeto' sqai pacqajñigui cá'maq ra'qaachiguii na' ñaqai qami' ne'nec caca roua'e'!

₁₆Ñi na'gaxala', ñí'maq qota'olec quena Israel, ñí'maq sqaica lqalanec, 'naac: ¡Ỹaatqajam 'maxachii'tegue da nachaalataxaguii, chaqai 'neeto' se raqamaxahi; ma' ỹim se yqo'ta cá'maq nalachiguit aca loua, ca ma' ỹo'uet dajo, ca' chi napio'xotaalta'!

₁₇Ñi qara'gaxala' mashic nco'teuec quiyim 'qaatapegalo qamiri; qam qamiri qaiyiita nataxañitac: ¿Nega'ỹo' cá'maq shinqac quiyim nco'te'guesopa quiyim 'qaatapegalo qomi'? Ma' qamiri 'ñiỹac ñi qara'gaxala' nqo'ta ná'maq ỹo'ueetetac na se no'uen, chaqai netoonta'guelo naua'maxare. ¡Qamiri 'ñiitapega quiyim ñi qota'olec mesqai hueeta'ñi yi ỹa'maqachiguiñi!