Mateo 10

₁Co'na'le, ca' so Jesús roỹaxanalo saua doce lapaxaguinatqa, ca' ỹaanema da lquesaxanqa' quiyim ỹo'derauec na ne'ec lecmaxaic, chaqai quiyim ỹomaterec ná'ogue nanchaqaina nalolaxa chaqai na ne'ne'.

₂Ca' nauajo nauá'maq leenqate' sauá'maq doce lelaatqa: Simón, ca' da liỹa leenaxat Pedro; chaqai so lqaỹa Andrés; Jacobo chaqai so lqaỹa Juan, llaalqa so Zebedeo; ₃Felipe, Bartolomé, Tomás chaqai so Mateo só'maq icona'piguit na'le ana nishiuete so nashi quiyi Roma; Jacobo, llaalec so Alfeo; Lebeo chaqai qai'neeta leenaxat Tadeo; ₄Simón só'maq chicqaugui na leenaxat cananista; chaqai so Judas Iscariote só'maq ỹaano' na'le so Jesús.

₅So Jesús ilate' saua doce lapaxaguinatqa, ca 'uo' da laqataxac, 'neetasa':

—'Neeto' quiipegueto naua 'lauari sqai neetalgoto na judioipi. Chaqai sqai viriu'a na na'aateripi huaugui yi 'laua Samaria. ₆Ta'ta'a quiyim quiipegue' na llaalqaipi so Israel, ma' na'maxare 'neetari' ana qagreta ỹo'meetajlec. ₇Ca 'xachitapeguem quiyim tot qoỹoxoguit da lo'ueenataxanaxac ñi qota'a neeta'gue da piguim quiyim ỹoiquentac ná'ogue najo. ₈Machiuec na ralolaxaiquipi, liỹa nca'leuec nqai'ñii ná'maq mashic ileu, imeuec nqai'ñii ná'maq mashic rishiita na loshicmaxa, o'yiỹauec na ne'ec lecmaxaic. Qaca aca laseuete quiyim coñiguit dajo nquesaxanaxa, ca' sqaca laseuete nqai'ñii quiyim 'ueenataxañiỹa.

₉Sqai 'xachii aca qadamii chicqaugui na 'oro, loqo'm ana plata, loqo'm na cobre, ₁₀chaqai aca noviñichii lahi' queca nayic. Chaqai 'oonoqui' ca nelamaxaguii 'xachii, chaqai sqai 'xachii caua qapelachirii, chaqai aca rashillichii. Ma' ca 'ueenataxanaxai ỹaatqajam qui'iigui ca lo'ueenataxanaxac.

₁₁Ca quiyim viriu'a ca na'a', loqo'm quenaua na'aaterolqai', ca' daañiỹaque ca la'a' ca qom mashic qaipi'ỹa'a. Ca ñiỹa'ñi ca la'a', chi ỹovireta'a quiyim oquiỹa'e ca'maxare. ₁₂Ca ma' noxoñiu'a ca na'a', ca' quinaxañii, 'ñiỹacsa': “'Uo' ma'le ca ra'maxahi.” ₁₃Ca cá'maq la'a' ca'maxare, no'm ta'chiguit quiyim ỹacoñiguit, ca no'ueenaqchii'ot dajo niquinaxanaxac chicqaugui da na'maxa. Qam no'm sqa taiguit quiyim icoñiguit, ca' rapilaxachitec da riquinaxanaxaguii. ₁₄Chaqai no'm se qaicoñiguita chaqai se qana'xaỹaxanalo qamiri, ca' oquiỹa'e cajo na'a', loqo'm cajo na'aateripi. Ca ochigoxoiuec na namoxoỹaxa quenaua qapiaachiri. ₁₅Ca ỹaatqajam llic da shinac caqamiri quecajo pa'aatec na'xa'a ma' ñi qota'olec imit ná'ogue najo, ca' ca nouaxanaxaset cajo na'a' paguec lecaic ma'le ca nouaxanaxaset queso qomyipi na'ñi na'le yi Sodoma chaqai yi Gomorra.

₁₆¡Ñaqai 'ajñii! Ỹim selate' qamiri, 'nejme' aqamiri aca qagreta, quiichicñigui nqohin na lavinñi ca iseripi toxonaxairipi. Qam na'deenaxanqachiñii, 'ñiitari' ca nanaic, qam sqa vii ca rovirii, 'ñiitari' ca coviguiñic. ₁₇Ỹaatqajam richilliỹaño', ma' na qomyipi ỹaanero qamiri ma'le quena nashillipi, ca' qaỹouaxanta'pe qamiri ma'le cana lapoxoqui na judioipi. ₁₈Ca vire'to' ma' viriỹau'a ná'maq reloqota'alo naua 'lauari chaqai ná'maq lashillipi na'maxare, ma' qamiri ỹalamaxarete', qaiyi shichii ya'xachitac quena'maxare chaqai quena sqai judioipi. ₁₉Qam ma' qoỹaanero qamiri quena nashillipi, sqai 'yiiñitaque cá'maq 'ñiỹac, loqo'm quecá'maq reloqo'tegue ca ra'qaachiguii. Ma' quiyim ỹovita ca laloqo' quiyim taxahi, ca' ñi qota'olec ỹo'ueete' ma'le caua ra'qaataxahi. ₂₀Ma' sqai qamiri nauá'maq taxahi ma'le, ta'ta'a so ne'Espíritu ñi qota'a ñí'maq viilec ñí'maq retaqa ma'le caqamiri.

₂₁Na qomyipi ỹo'uet ma'le ca nalauataxac cá'maq chi lalamaxaret lqaỹa, chaqai ná'maq neta'allipi ỹo'uet ma'le ca nalauataxac cá'maq chi lalamaxaret llaalec. Chaqai na ñaalqaipi npa'guene'e' ma'le ca leta'a, ca relaataxanlec quiyim qaỹalauat. ₂₂Ná'ogue na qomyipi noquii'alo qamiri ma'le ma' 'xachitac da ỹeenaxat. Qam cá'maq na'ñaxachichiguiñi, chi ỹovireta'a ca lqodoc aca lqauaxaqui, ca' chaqaica cá'maq qanca'laxatec. ₂₃Ca noma' qarocañiỹac queca na'a', ca' 'iichii, quiipegue' ca liỹa. Ma' ỹaatqajam llic da shinac caqamiri, quiyim najo ỹale llaalec novi' ma'le, ma' saqa' nomachishiguim ná'ogue na na'aateripi quená'maq la'a' so Israel llaalqaipi.

₂₄Ca' qaica quet cá'maq napaxaguinatec napacalec quet ca napaxaguinatqo', chaqai ca nelaatec se ỹapacauec quecá'maq na'co'. ₂₅Vichiguiño' ca napaxaguinatec ỹa'maqachigui quet lauel quiyim ỹovireta'a quiyim 'nejem ca napaxaguinatqo', chaqai ca nelaatec ỹovireta'a quiyim 'nejem ca na'co'. Ca no'm cá'maq nashi queca na'a' qaỹamata'gue lashi na se re'xogui lecmaxaiquipi, ¿mesqai pagueco' la'aaxa cá'maq qaỹamata'gue na llaalqaipi ma'le?

₂₆Ca' vichiguiño' 'neeto' ro'chiitapega ca qom. Ma' sqaica quet cá'maq 'ueenataxac quiyim se qaichoxotec, chaqai qaica quet cá'maq qoỹo'tetegueñi ỹovireta'a quet quiyim se qaỹa'den. ₂₇Dá'maq shinac caqamiri quena napalaxa, ca qamiri 'xachii quiyim viita'ñi ca re'qojlec; chaqai cá'maq ñimootaxantec quiyim sa'xatema qamiri, ỹaatqajam nichiñigue ma' na'xachiuec queca lelaq ca 'imec. ₂₈Ca se ro'chiỹa cá'maq ishit ỹalauat na noshicmaxa, qam se ishit ỹalauat yi pa'aauo chaalataxac. Ta'ta'a quiyim ro'chiỹa ñi qota'olec ñí'maq ishit ỹalauat na qaroshicmaxa chaqai so qara'al inaxañigui ca norec navicqatqa' na hualoxonyipi.

₂₉¿Se qaimeene' caua dos qo'oole laseuete' aca 'oono'lli' chiróla? Ma' qaca quet aca 'oono'lli' cana'maxare najñi quena 'laua, no'm ñi qota'a ñí'maq viilec se ỹa'maxarenta. ₃₀Ma' vire'ta na lqahic laue quiñi 'óna caqamiri ỹaatqajam naloqojneguesec. ₃₁Ca' se ro'chii qamiri, ma' qamiri paguec aca rashivichii caca 'xoic qo'oole.

₃₂Ca ná'ogue ná'maq ra'qaataxanem na qomyipi quiyim queetalec aỹim, ca ỹim qai'neeta sa'xat ma'le quiñi ita'a qota'olec neeta'gue da piguim. ₃₃Qam cá'maq se ra'qaataxan quena qomyipi quiyim queeta'pegue' aỹim, ca' ỹim qai'neeta se sa'xat ma'le quiñi ita'a qota'olec neeta'gue da piguim.

₃₄'Neeto' 'neetapigui qavillii quiyim ñoda'a ca leuagaxa na qomyipi quena 'laua. Ma' se ñodo ca neuagaxa, ta'ta'a ca neloquiaxac. ₃₅Ca' ỹim ñanac, qaiyi ca ỹale npa'guene'e' ca leta'a, chaqai aca 'aalo npa'guente'e' acá'maq chi late'e, chaqai aca nate npa'guene'e' acá'maq chi ni'ỹoqoro. ₃₆Ca ma'le, ca' quiñi 'óna chi npa'guenaxaua cá'maq chi lauo' le'ec.

₃₇Cá'maq ỹapacqajnauec ca lqo'iichi queca leta'a, loqo'm caca late'e caỹim, ca'maxare sqa taiguit quiyim ỹalamaxaret. Chaqai cá'maq ỹapacqajnauec ca lqo'iichi queca llaalec, loqo'm caca llaale caỹim, ca ca'maxare sqa taiguit quiyim ỹalamaxaret. ₃₈Chaqai cá'maq queetalec aỹim, no'm se ishit quiyim 'eno'm ileualec aỹim, ca' sqa taiguit quiyim ỹalamaxaret. ₃₉Ca cá'maq ỹahotaque nca'laxatec dá'maq chi nachaalataxac, ca na'laxatañi. Qam cá'maq na'laxatañi da nachaalataxac soualec quiyim queeta'pegue' aỹim, ca' chaqaica cá'maq qanca'laxatec ma'le.

₄₀Cá'maq icoñi'chiguita qamiri, ca icoñi'chiguit aỹim. Chaqai cá'maq icoñi'chiguit aỹim, ca icoñi'chiguit ñí'maq yila'. ₄₁Ca cá'maq ỹacoñi'chiguit ca letaxaỹaxanqajnec ñi qota'a ma' ca'maxare lelaatec ñi'maxare, ca ca'maxare icoñiguit ca nishiue' 'nejem ma'le cá'maq nishiue' ca netaxaỹaxanqajnec. Chaqai cá'maq icoñi'chiguit ca ỹale huagaxaraic ma' huagaxaraic, ca' icoñiguit ma'le ca nishiue' 'nejem cá'maq nishiue' ca huagaxaraic ỹale. ₄₂Chaqai canchaqaica quiyim ỹaanem 'eno'chaqai 'oono'lli' aca 'taxaqui queca 'oom huaxaỹaq quiñi 'óna quenaua collo'olqai' queesa'pegue' aỹim, ca' ỹaatqajam llicsa 'ue ca nishiue' ma'le.