Mateo 9

₁Ca' so Jesús renojñigui aso qom lahi' huaxaỹaqse, ca taita'gue da liỹa lemanaxa aso latogot late'ogue', ca ỹovijta'a yí'maq chi lalamaxat la'a'. ₂Ca hua'anyi, ca' qaỹodou'a so ỹale se ra'ñiigue, hueetalec so lomala'. Ca co'na' so Jesús iuana da lpi'ỹaxague' saua'maxare, ca 'naaco' queso ralolaxaic:

—Na'ñaxachi', ỹaalcolec. Ma' mashic qaỹapalaxat ná'ogue na rasauaxashichi'.

₃Ca 'vio' saua ỹalequesaho quesaua rapaxaguinataxansa'pegue na naqataxaquipi chicqo'ot so Moisés, 'uo' da la'deenataxanaxague' 'neetasa': “Dajo ỹale napaqueteguelec ñi qota'olec quenaua la'qaatqa.” ₄Qam ma' so Jesús ỹa'den dá'maq la'deenataxanaxague' saua'maxare, ca 'naaco':

—¿Chi'negue ma' se no'uen da ra'deenataxanaxaguii? ₅Ca ¿negue' cá'maq paguec se qalaq quiyim qohinac: “Ná'ogue na rasauaxashichi' qaỹapalaxat”, loqo'm qohinac: “Ne'laxachirishiguim, ca' qui' huo'iriguiri'”? ₆Ca' vichiguiño' nachaxanalo qamiri najo ỹale llaalec quiyim 'ue da lquesaxanaxa quenajo 'laua quiyim ỹapalaxat ca nasauaxaset.

Ca 'naaco' quesó'maq ỹale se ra'ñiigue:

—Ne'laxachirishiguim, nañireta' yi qacanqui'. Ca' quirepegue' ca ra'aachi'.

₇Co'na'le, ca só'maq se ra'ñiigue ne'laxashiguim, ca' queho queca la'a'. ₈Ca' so qomyipi co'na' iuanchigui dajo, ca 'ue da lqolonaxa. Ca' imaqachintac ñi qota'olec ma' ỹaaneco' da lquesaxanaxa quena qomyipi.

₉Ca so Jesús co'na' eec, ca iuane'ta so ỹale leenaxat Mateo nqa'xantañi, neetaugui so lo'ueenataxanaxaqui quiyim icona'piguit ana nishiuete so nashi quiyi Roma. Ca 'naaco':

—Quitegue aỹim.

Ca' so Mateo ne'laxashiguim, ca' quegue so Jesús.

₁₀Ca' so Jesús co'na' mashic hueeta'ñi yi na'a' que'eetac, ca' 'xoic so ỹalequetaho quená'maq ỹacona'piguit ana nishiuete so nashi quiyi Roma chaqai so liỹa sauaqhuaiquipi ỹoviro, ca' qai'neeta lqui'ỹaxaua so Jesús chaqai saua lapaxaguinatqa. ₁₁Qam na ỹalequetaugui na fariseoipi, co'na' iuane'ta dajo, ca inate' saua Jesús lapaxaguinatqa, 'neracsa':

—¿Chi'negue ñí'maq ỹapaxaguinta'pe qamiri ishit lqui'ỹaxaua ná'maq ỹacona'piguit ana nishiuete ca nashi chaqai na sauaqhuaiquipi?

₁₂Ca' so Jesús co'na' 'xaỹa dajo, ca 'naaco':

—Ná'maq no'uenta se ỹouen ca natarenataxanaq, ta'ta'a ná'maq 'ue na ralolaxa. ₁₃Mohi, quii, ca' napaxaguiñiỹa dá'maq leloxoỹaxac yi naneretañi la'qaatec ñi qota'a 'naacsa': “Ỹim sahotaque 'xoriñii ca riỹahi. Mesqaida quiyim 'ỹaañiuo quiyim qaỹavigaxat ca rachitaxanataxanaxachii isecỹac.” Ma' ỹim se ñanac quiyim soỹaxana cá'maq 'deenataxanaxai, ta'ta'a ná'maq sauaqhuaiquipi, qaiyi netacocha, ca ỹaxañiñi naua lanatqa.

₁₄Ca' saua nale' so nachilaxanataxanaq leenaxat Juan noquiicra'a so Jesús, ca renataxane':

—¿Chi'neco' qomi' chaqai na fariseoipi ỹaatqajam 'xoic quen ñqopaaqachitaq, qam naua rapaxaguinataxahi' se nqopaaqachite'?

₁₅Ca' so Jesús 'naaco' quesaua'maxare:

—¿Peeta'a ishiteto' quiyim rachicota, 'ec 'ue ca lasauaxanec, cá'maq nalecsec queca shilaq quiyim ñaq ỹalequetaho cá'maq shiltapego? Qam 'ue ca na'xa'a ma'le ma' ỹovita qanaqata'a só'maq nashilaxaua. Ca' quiyi, ca ishit nqopaaqachit na'maxare.

₁₆Qaica ca ishit napalaten ca nooỹac leteraxaic quiyim rapalatenaxana ca dalaxaic hualoq lahi. Ma' cá'maq lapalatenque' dalaxaic cata', ca ỹasectaxat cá'maq ñaaue hualoq lahi. Ca' noquiiguec cá'maq lasectaxa. ₁₇Chaqai ca dalaxaic lataxa se qaỹocorigui aca lahi' isecỹac loshicmaxa ñauapec. Ma' no'm qohine'tegue dajo, ca ná'maq loshicmaxa rachipia'gue. Ca cá'maq lataxa chaqai cá'maq loshicmaxa na'lerañi. Ca vichiguiño' ca dalaxaic lataxa qaỹocorigui aca dalaxai isecỹac loshicmaxa, qaiyi caua'que qaica ca 'netegue.

₁₈Ca' so Jesús co'na' ñaq ỹa'xatetac dajo, ca noviro' so lashi na judioipi. Ca' ỹa'yi'iñi naua le'cootal. Ca 'naaco':

—Ayi ỹaale mashic ileu. Qam no'm qami' quirepegue', ca quiyim shillirelec, ca' liỹa nca'leuec.

₁₉Ca' so Jesús ne'laxashiguim, ca' liỹa so'maxare, nauequetecto saua lapaxaguinatqa. ₂₀Co'na'le, ca 'uo' aso 'aalo doce ñaxari ralolaxai, ỹaatqajam 'xoic da le'xoric, naquetac na leuoripi. Ca nqo'neu'a so Jesús, queetou'gue na lelaq, ca' ipootau'a na lahi so napoxoqui, ₂₁ma' 'neetapiguio' lauel: “No'm seshit quiyim chi sepootau'a na lahi so napoxoqui, ca' chaqa'ma' yimeuec.” ₂₂Qam so Jesús naqalgoxoñi, ca ra'ỹo'ot aso 'aalo. Ca 'naaco':

—Na'ñaxachi', ỹaalole; mashic vi'relec, ca nagui remi'rec.

Ca' queca'maxare, ca chaqa'ma' imeuec.

₂₃Ca co'na' so Jesús ỹovira'a ca la'a' so nashi, ca iuane'ta so nivigaxanaripi na'maxatetañi quiyim qaishinec aso nequetegaxai, chaqai so qomyipi naualqategueñi, noỹentagui. ₂₄Ca' so Jesús 'naaco' queso'maxare:

—Qo'ñiiuec, 'iu'oguiyi quenajo. Ná'maq nequetegaxai se ileu. Ta'ta'a quiyim laqata.

Ca' so qomyipi i'neetac so'maxare. ₂₅Qam so Jesús ta'oguiyi nqai'en so qomyipi. Ca so'maxare inoxono, ca icona da lqai'laxat aso nequetegaxai. Ca so'maxare ne'laxashiguim. ₂₆Ca quiyá'ogue yi 'laua qana'xachigui dá'maq 'neeto' na'le dajo.

₂₇Ca co'na' eec, ca'e yi'maxare so Jesús, ca' coỹaretero saua dos qai'la', ỹaualqata'guita, 'nerac:

—¡Qami' llaalec so David, qare'xoriñi'!

₂₈Ca co'na' so Jesús inoxono queso lauo', ca' saua qai'la' nqo'nera'a so'maxare. Ca' so Jesús inate' saua'maxare, 'naaco':

—¿Qamiri viilec quiyim seshit so'uet quiyim liỹa neuañiñi?

Ca saua'maxare 'neraco':

—Ajá'a, seuaqlec, qami' qara'gaxala'.

₂₉Ca' so Jesús ipootau'alo saua nqote' saua'maxare. Ca 'naaco':

—Ỹaatqajam ipaquichigui dá'maq 'neeta da rpi'ỹaxaguii.

₃₀Ca' naviguerec saua nqote' saua'maxare. Co'na'le, ca so Jesús ỹaatqajam qate'talo, 'naaco' quesaua'maxare:

—Qaico' ca ỹa'den nqai'ñii dajo.

₃₁Qam co'na' inoxondec, ca chaqa'ma' ra'qaataxane' quená'ogue na qom neetalec yi 'laua quedá'maq ỹo'ueeto' na'le so Jesús.

₃₂Ca co'na' mashic que' saua'maxare, ca 'vio' saua qomi' naueguero so ỹale qaicaua caua la'qaatqa, 'ue so le'ec lecmaxaic. ₃₃Ca co'na' so Jesús ỹo'daauec so le'ec lecmaxaic, ca só'maq qaicaua caua la'qaatqa chaqa'ma' retaqa. Ca' so qomyipi i'laq, ca 'naaco':

—Se ỹauanapega quiyim 'ue quet ca seuanaxa quena Israel 'nejem dajo.

₃₄Qam so ỹalequetaugui na fariseoipi 'naaco':

—Dajo ỹale ỹo'daauec na ne'ec lecmaxaic, ỹahote'e da lquesaxanaxa só'maq chi lashi na'maxare.

₃₅So Jesús ỹouoxontac sá'ogue so na'aateripi chaqai naua na'aaterolqai', rapaxaguinataxantac cana lapoxoqui na judioipi quecá'maq hueeta'ñi, ỹa'xatetac da no'uen na'xaỹaxac quiyim ñi qota'olec ỹoiquentac ná'ogue najo, chaqai ỹomatec na qomyipi quená'maq ỹoreta'oguit ralolaxa chaqai na le'ne'. ₃₆Ca na' iuana so qomyipi, ca 'ue da le'xorenataxanaxa queso'maxare. Ma' 'ue da le'xoric chaqai qaica ca la'ñaxac, 'ec ana qagreta qaica ca reloxoỹa'a. ₃₇Ca 'naapegalo na'le saua lapaxaguinatqa:

—Ỹaatqajam 'xoic ana la na nanecsec, qam sqo vito'olqai' nauá'maq raqataxane' quet. ₃₈Ca' vichiguiño' shiilahi ñi qota'olec ñí'maq lanaxanqa' na'maxare quiyim nela' ca naqataxanaripi, qaiyi naqat ná'maq lanecsec ala.