Mateo 14

₁Ca' quesauajo na'xata', ca so nashi Herodes só'maq reloqota'a yi Galilea, ca so'maxare 'uo' da la'xaỹaxac quedá'maq ỹo'ueetetac so Jesús. ₂Ca 'naaco' queso nauegaxauaripi:

—Chaqaiso' so Juan só'maq nachilaxanataxanaq lotqai liỹa nca'leuec queda lelauaxa. Vichiguiño' hueeto'ot da nquesaxanaxa quiyim ỹo'uet na se qaiuanapega.

₃Ma' so Herodes ỹo'ueeto' quiyim qaiconlec so Juan na'le, ca' qoỹaxateta, ca qoỹanaugui aso ncoñiitaxanaxaqui. Ỹo'ueeto' dajo sauaxat aso loua Herodías, ma' louo' na'le so lqaỹa leenaxat Felipe. ₄Ca' so Juan 'naaco' queso Herodes:

—Se ỹa'maxañi quiyim roua'e' añi'maxare.

₅Ca' so Herodes ỹahotaque ỹalauat so Juan. Qam no'chi quena qomyipi, ma' ná'ogue 'naac quiyim so Juan ỹaatqajam lliqueta letaxaỹaxanqajnec ñi qota'a. ₆Qam na' ỹovita ca laloqo' quiyim que'eelec quiyim ỹovire'ga ca na'xa'a ne'xaỹoqsoxoqui so Herodes, ca' aso llaale aso Herodías rasot, ca sá'ogue so lqui'ỹaxauaripi ỹa'ajantac. Ca' so Herodes ỹaatqajam nemeeten da rasotaxac aso'maxare. ₇Ca' ỹaanec i'taxachichiguiñi da la'qaatec ipacqajanchigui quiyim ỹaanem cá'maq canchaqaica roỹaxanaque aso'maxare. ₈Qam aso'maxare 'au qaraqata caso late'e. Ca 'naaco' queso Herodes:

—Nañaañi' hueetagui nqai'ñi' ca peguet ca lqahic ca Juan cá'maq nachilaxanataxanaq.

₉Ca' so nashi Herodes ỹaatqajam 'ue da lachicoxo. Qam mashic ỹaanec da la'qaatec, ca' ipacqajanchigui, chaqai quiyim só'maq lqui'ỹaxauaripi 'qaachigui so'maxare, ca' relaataxanlec quiyim qoỹaanem só'maq roỹaxantaque aso'maxare. ₁₀Vichiguiño' relaataxanlec quiyim qaỹouaxanec so lqahic so Juan cañi ncoñiitaxanaxaqui. ₁₁Ca na' ime, ca qanodouec, hueetagui nqohin so peguet, ca' qoỹaanem aso nequetegaxai. Ca so'maxare, ca' ỹaanem aso late'e.

₁₂Ca co'na'le, ca novirero saua nale' so Juan, ca' i'xate' so loshicmaxa, ca' ishinñi. Co'na' ime, ca querepegue' ỹahote la'xaỹaxac so Jesús.

₁₃Ca co'na' so Jesús ỹa'den dá'maq qohine'tegue so Juan, ca' ca'e yi'maxare, renojñigui aso qom lahi' huaxaỹaqse, paca'ta so huaxaỹaq, qaisoota noỹootetec. Qam co'na' qaỹa'den queso qomyipi, ca chicqau'a na na'aateripi, ca' quepegue' quiyi hueetalec 'laua. ₁₄Ca co'na' renotec so Jesús caso lahi', ca iuane'ta so 'xoic qomyipi. Ca 'ue da le'xorenataxanaxa queso'maxare, ca ỹomatec na ralolaxaiquipi qanodou'a so'maxare. ₁₅Ca co'na' mashic sham pe, ca saua lapaxaguinatqa so Jesús 'neraco' queso'maxare:

—Mashic lavit, chaqai sqaica quet cá'maq naalec najo. Pilaxachi' na qomyipi, qaiyi quepegueto naua na'aaterolqai', ca rishiujnaxanaque cá'maq chaqai loq.

₁₆Ca' so Jesús 'naaco':

—Se ỹouentaque quiyim ca'e najo. Qamiri 'ỹaañim cá'maq loq na'maxare.

₁₇Ca saua'maxare 'neraco':

—Qaica quet cá'maq liỹa qonoq hueeta'ñi najo, qaiyauate' yaua cincolqai' paañi' chaqai yaua doosolqai' nalliñi'.

₁₈Ca' so Jesús 'naaco' quesaua'maxare:

—Nodoiri' quenajo.

₁₉Ca na'le, ca' 'naapega so qomyipi nqa'xanñi, nqa'xanlec na 'uaqapi ladala. Ime, ca' iconalo saua cinco paañi' chaqai saua dos nalliñi', ca' ra'ishiguim quena piguim, ca' ỹaanot da na'aachicyaxac ñi qota'olec, ca' ỹasectaxachiguilo saua paañi', ca ỹaanouguilo saua lapaxaguinatqa. Ca saua'maxare imeendec queso qomyipi. ₂₀Ca' so qomyipi que'e, ca sá'ogue quema'. Ca na' ime, ca' qalapoon so ni'ỹoxot lahillipi, ca lotqai no'qaate' saua doce canastos queso lahillipi ni'ỹoxot. ₂₁Ca so qomyipi que'eetaco' na'le ỹovi' cinco mil ỹalliripi, qam se qanaloqojna'oga so 'aallipi chaqai so ñaaqaipioqui'.

₂₂Ca na' ime, ca' so Jesús 'naapegalo saua lapaxaguinatqa quiyim renojonyigui aso qom lahi' huaxaỹaqse 'auesa'ta'gue queda lahi aso latogot late'ogue'. Ca so'maxare no'ueenañi, niquinta'pegue' so qomyipi. ₂₃Ca na' ime npoyiguinta'pegue' so qomyipi, ca' so Jesús taashi'megue aso 'laua quemaralec, ma' ỹahotaque nqouagaxain qaisoota. Ca co'na' mashic pe so Jesús qaisootam. ₂₄Qam aso qom lahi' huaxaỹaqse mashic huaañigui na lavinñi aso latogot late'ogue'. Ca na lo'paxaripi nateta'piguit aso lahite', ma' saua'maxare reloxoira'guit so nonot. ₂₅Ca co'na' tot qoỹoxoguit so na'xa'a, ca' so Jesús nqo'neu'alo saua'maxare, qauaata, queetalec so huaxaỹaq. ₂₆Ca co'na' saua lapaxaguinatqa iuanteta qauaata queetalec so huaxaỹaq, ca no'daxateterec, ca quedá'maq chi lqolonqa', ca ỹaualqaguilo, ca 'neraco':

—¡'Eso nqui'i nqo'ỹoqotaxanaq!

₂₇Qam so Jesús 'uo' da ỹa'xat, ca 'naaco' quesaua'maxare:

—¡Na'ñaxachii, chaqaỹim, totaxan ro'chii!

₂₈Ca co'na'le, ca retaqo' so Pedro, 'naaco':

—Qami' qara'gaxala', no'm chaqai qami', ca 'maxaraic quiyim shichi' quiyim shicpegue' qami' sovichisaxaua', shiquetalec qai'neeta na huaxaỹaq.

₂₉Ca' so Jesús 'naaco':

—Hua', naqui'.

Co'na'le, ca' so Pedro renotec caso neesañigui, ca' qauaata, queetalec so huaxaỹaq, quepegue' yí'maq hueete'e so Jesús. ₃₀Qam na' ỹa'deene'ta da lquesaxanaxa so nonot, ca' 'ue da lqolonaxa. Ca co'na' sham iyinñi, ca' ỹaualqo':

—¡Qami' ỹa'gaxala', yca'laxachirec!

₃₁Ca' so Jesús chaqa'ma' icoñiguit da lqai'laxat. Ca 'naapego':

—¡Ỹaatqajam cocho'qui' da rpi'ỹaxaqui'! ¿Chi'neco' ma' sham qollictaxañi'?

₃₂Ca co'na' saua'maxare renochishiguim caso lahite', ca' so nonot qaguiguit. ₃₃Co'na'le, ca sauá'maq neesañigui aso'maxare, ca ỹa'dooto naua le'cootal so Jesús. Ca 'neraco':

—Ỹaatqajam lliqueta quiyim qami' llaalec ñi qota'olec.

₃₄Ca' paquera'ta aso latogot late'ogue', ca ỹovirereta'a yi 'laua Genesaret. ₃₅Ca co'na' só'maq qomyipi na'ñi yi'maxare no'uenegue so Jesús, ca' qaỹa'ue la'xaỹaxac ná'ogue ná'maq na'ñi yi'maxare. Ca' qanodou'a ná'ogue ná'maq ralolaxaic yí'maq hueeta'ñi so'maxare. ₃₆Ca' qane'xoresene'tot quiyim chaqai ipootau'a na lahi so napoxoqui. Ca ná'ogue ná'maq ipootau'a, ca chaqa'ma' imeuec.