Mateo 22

₁Ca so Jesús queetalec ná'maq ỹa'xatetac, ỹahote'e na laloqojnaxanaxaqui, 'naaco':

₂—Da lo'ueenataxanaxac ñi qota'a neeta'gue da piguim 'nejem ca nashi ỹo'uet ca lemaqachic quiyim shilo ca llaalec. ₃Ca ilate' saua lelaatqa quiyim que'ogalo caua lalecse', qam caua'maxare se ỹa'maxarene' ỹalequesaho. ₄Ca' lotqai ỹa'vii saua liỹa' ilate' lelaatqa. Ca 'naaco': “'Ñiỹapegalo caua ỹalecse' quiyim mashic ná'ogue na na'ic ỹa'maqatañi quiyim qaỹa'ic. Mashic selaataxanlgoto quiyim qaỹalauate' saua iloo huaca chaqai ná'maq ỹochaxaratec iloipi. Chaqai ná'ogue mashic ỹa'maqatañi. Naguipegue' na nashilaxac.” ₅Qam sauá'maq nalecse' se na'xaỹaxane'. 'Óna só'maq quepegue' so na'laua, chaqai so liỹa quepegue' ca nemeenqa', ₆chaqai saua liỹa', ca' iconlgoto saua lelaatqa so nashi, ca' ỹouaxanta'pe, chi ỹovireta'a quiyim ỹalauate'. ₇Co'na'le, ca' so nashi ỹaatqajam ro'o. Ca' ila' so nalliripi quiyim qaỹalauat so lauataxanaxaiquipi chaqai quiyim qaicopata'alo saua la'aate'. ₈Ca na' ime, ca' 'naapega so lelaatqaipi: “Ná'ogue ỹa'maqatañi quecá'maq nashilaxac, qam cauajo nalecse' sqa taiguit quiyim ỹalequesaho. ₉Mohi, quiiguelo nauá'maq paguec nemaqajnatqa nayico. Ca talaxañii quecá'maq canchaqaica huañijlec quiyim nacpegue' na shilaq.” ₁₀Ca só'maq nelaatqaipi queguelo naua nayico, ca lapoon ná'ogue ná'maq iuanejlec. 'Ue na hualoxonaq chaqai na nouooquichiguiñi. Ca no'qaachigui so nqui'ỹaxaqui queso qomyipi.

₁₁Co'na'le, ca' so nashi inoxono ra'ajnaxaneu'a so nalecseripi. Ca' iuanejlec so 'óna ỹalequetaho, qam sqai ỹansañi caua noho 'ueetaxaqui' quiyim qaỹalequetau'a ca shilaq. ₁₂Ca so'maxare 'naapego': “Qam qami' ¿chi'neco' ma' nenoxoñiro, ma' sqai ñi'sañi caua noho 'ueetaxaqui' quiyim qaỹalequetau'a ca shilaq?” Qam so'maxare i'maqatam. ₁₃Ca' so nashi 'naapego' só'maq neloxoỹaripi queso nqui'ỹaxala': “Coñirii naua lqai'laqate' chaqai naua lichil. Ca' naxahi'oga yi napalaxa pa'aauec. Ca' yí, ca' noỹen ma'le chaqai iquishquinta' naua louee quena nqui'ic.” ₁₄Ma' 'xoic ná'maq noỹaxanaxat, qam sqo vito'olqai' nauá'maq nca'acse'.

₁₅Ca co'na'le, ca' so fariseoipi lapoỹata', na'deentapigui ca leloxoỹaxac, ỹahotaque quiyim 'ue ca ỹachigoxochichigui ca lasauaxaset, ca qainato' so Jesús. ₁₆Ca' quiyi, ca 'vio' saua qanelate' quesaua lapaxaguinatqa saua'maxare chaqai saua ỹalequesaugui na nalliripi so nashi Herodes quiyim 'naapega so Jesús:

—Qami' napaxaguinataxanaq, qomi' sa'deenaq quiyim llic ca ra'qaachiqui' quena' taxahi', chaqai paxaguinataxañitegue dá'maq no'uen llicyaxac cá'maq ỹa'maxarenta ñi qota'olec, chaqai se na'xaỹaxañita ná'maq 'naac na qomyipi, ma' se ra'i'sapigui dá'maq no'ueenataxac ca re'qoochigui qom. ₁₇Ñigo' ñaqai 'xachitema qomi' cá'maq 'neeta ca ra'deenataxanaxaqui': ¿Tegue' chi ỹa'maqachiguiñi quiyim qaishiueten ñi lashi na Roma laseripi, loqo'm 'e'?

₁₈Qam so Jesús retan dá'maq se no'uen ỹahotaque so'maxare, ca 'naapegalo' saua'maxare:

—Qamiri ma' 'ñiitapega qamiri 'maxaraqa, ¿chi'negue ma' yi'guiñitac? ₁₉Ñaq nachaxañim acá'maq chiróla nishiuetenaxanqate quiyim qaishiueten ca nashi.

Ca' qanodou'a aso 'oono'lli' denario. ₂₀Ca co'na' ỹa'ajan so Jesús, ca renataxano':

—¿Negue' lashic ñí'maq hueetalec ana'maxare? chaqai ¿negue' ca leenaxat yí'maq hueetalec?

₂₁Ca saua'maxare 'neraco':

—Lashic ñí'maq lashi na Roma laseripi.

Ca' so Jesús 'naaco' quesaua'maxare:

—'Ỹaañim cá'maq lalamaxaret ñí'maq lashi na Roma laseripi, chaqai 'ỹaañim ñi qota'olec cá'maq lalamaxaret ñi qota'olec.

₂₂Ca co'na' 'xaita dajo, ca' 'uo' da le'laqa'. Ca chaqa'ma' que'.

₂₃Chaqaisooto' so na'xa'a lotqai 'vio' saua saduceo querepegue' so Jesús. Na saduceoipi 'naac quiyim se liỹa nca'leuec ná'maq mashic ileu. Ca na'maxare inato' so Jesús, 'naaco':

₂₄—Qami' napaxaguinataxanaq, so Moisés 'naac: No'm 'ue ca ỹale 'on, qam saqa'leca ca llaalec, ca' ileu, ca' cá'maq lanoq o'ñiguit quet acá'maq pa'ỹe, ca' ỹo'uet ca llaalec cá'maq lopiichi ileu. ₂₅Ca' coqomi' 'vii saua siete nqaỹa'. Ca ỹi 'au 'on, qam saqa'leca ca llaalec, ca' ileu. Ca asó'maq pa'ỹe no'ueenaqto'ot so lanoq. ₂₆Qam só'maq lqaỹa qai'neeta ileu. Ime, ca lotqai só'maq liỹa lqaỹa. Ca' chaqai 'neetari', chi ỹoviresauec saua siete nqaỹa'. ₂₇Ime, ca' aso 'aalo qai'neeta ileu. ₂₈Ca ma' liỹa qanca'laxatec na leuaxaiquipi, ¿nega'ỹo' cá'maq ỹaatqajam loua quesauá'maq siete nqaỹa'? ma' sá'ogue o'ñiguit aso'maxare.

₂₉Ca' so Jesús 'naaco' quesaua'maxare:

—Qamiri o'miitac, ma' sqa 'yiiñii' naua naneresañi la'qaatqa ñi qota'olec chaqai da lquesaxanaxa. ₃₀Ma' ná'maq leuaxaiquipi ma' liỹa qanca'laxatec, ca' tot liỹa 'on, chaqai qaica ca ỹo'naxan aca llaale, ma' 'nejem ma'le na lelaatqaipi ñi qota'olec neeta'gue da piguim. ₃₁Qam quedá'maq leloxoỹaxac quiyim qanca'laxatec na leuaxaiquipi, ¿sqai taxahilco' quen dá'maq 'naaco' na'le ñi qota'olec caqamiri? 'Naaco' na'le: ₃₂“Chaqaỹim ná'maq ỹim qota'olec queso Abraham, Isaac chaqai so Jacob.” Ma' ñi qota'olec mese qota'olec quena leuaxaiquipi, ta'ta'a ná'maq nca'leetauec.

₃₃Ca co'na' qara'xaỹa dajo, ca' so qomyipi 'xoic da le'laxa quedaua lapaxaguinataxanaxaco so'maxare.

₃₄Ca co'na' so fariseoipi 'ue da la'xaỹaxac quiyim so Jesús nachicochiguiñi nqai'en so saduceoipi, ca' lapoỹata'. ₃₅Ca 'uo' so 'óna napaxaguinataxanaq quena naqataxaquipi ỹalequetaho, ỹahotaque i'guen so Jesús. Ca' inat, 'naaco':

₃₆—Qami' napaxaguinataxanaq, ¿negue' cá'maq paguec qaỹapacqajnauec quena naqataxaquipi?

₃₇Ca' so Jesús 'naaco':

—“Ỹaatqajam rqo'chita ñi ra'gaxalachi' qota'olec, machiro'ot añi re'taxanata'e', chaqai da nachaalataxaqui', chaqai da ra'deenataxanaxaqui'.” ₃₈Dajo dá'maq ỹapacauec chaqai 'auaxaic quena nelaataxanaxaquipi. ₃₉Chaqai da liỹa chaqai 'nejem da'maxare 'neetasa': “Rauochitegue rqo'chita ca rqaỹa'e', 'nejem nqai'ñi' qami' quiyim chi nauochiralta'.” ₄₀Ca' quedaua dos nelaataxanaxaco, ca' chicqojlgoto nqohin dá'ogue da naqataxaquipi chicqo'ot na'le so Moisés, chaqai dá'maq lapaxaguinataxanaxac na letaxaỹaxanqajanqaipi ñi qota'a.

₄₁Ca co'na' ñaq lapoỹaho so fariseoipi, ₄₂ca' so Jesús renataxano', 'naaco':

—¿Negue' cá'maq 'neeta ca ra'deenataxanaxaguii quecá'maq nashi nca'laxaqui? ¿Negue' llaalec ca'maxare?

Ca' so fariseoipi 'naaco':

—Llaalec so qarashi David.

₄₃Co'na'le, ca' so Jesús 'naaco':

—Qam ¿chi'neco' só'maq David co'na' qaretaqaugui queso Espíritu Santo 'naaco' la'gaxala'? Ma' so David 'naaco':

₄₆Ca' qaica quet cá'maq ishit 'ue ca ỹa'xat. Ca' quesojo na'xa'a, ca' tot qaica quet cá'maq ishit ỹo'uet ca lenataxanaxac queso'maxare.