Da na'qaatec taỹalec na nashillipi hualoxonyipi
1Ñaq na'xaỹaxañiñi nagui qamiri nashillipi chaqai na na'gaxalateripi quena Israel,
¿'ñiitapego' sqai chicqotouguilo qamiri quiyim qaỹa'den cá'maq no'uen no'ueenataxanaxac?
2Qam qamiri se rqo'chiỹa ná'maq no'uen chaqai ỹaatqajam rqo'chiỹa na se no'uen;
colahi na ỹalamaxareteripi
chaqai mashic selaxachi'teguelo naua lpi'naqa.
3Nca'leetauec, qam netaguitauec na ỹalamaxareteripi,
no'chiguitauec na loshicmaxa chaqai qaguichiguilo naua lpi'naqa;
mashic 'ñiita'gue ca la'at, qaỹahotaque qainaxañigui aca 'ueena.
4'Ue ca na'xa'a, ca' qamiri ỹaxañiỹaque ma'le ñi qara'gaxala',
qam ñi'maxare sqai saachiguita qamiri.
Quecajo na'xa'a nañoxotema qamiri ma'le
sauaxat ná'maq se no'uen 'viichitac.
5Na ỹalamaxareteripi ỹo'maac queso nayic queeta'gue,
sauaxat na 'naac itaxaỹaxaquiripi, qam rayinaxantac,
na'maxare 'naac quiyim qaicanqaida quená'maq ỹo'uet ca loq, ca' qui'ỹaxan,
qam 'naac 'ue ca lo'maxaset ná'maq se qui'ỹaxan.
Ca' ñi qara'gaxala' 'neetasa' da la'qaatec quená'maq 'naac letaxaỹaxaquiripi:
6“Tot qaica ma' 'ue quet liỹa caqamiri ca reuanaxanaxaguii quiyi pe,
chaqai sqai 'xachitac cá'maq naata quena napalaxa.”
Añi ra'aasa inoxonñi quecajo netaxaỹaxaquiripi,
chaqai yi na'xa'a napalaxa ma'le queca'maxare.
7Ná'maq huanaxanaxaiquipi chaqai na richaauec nqai'en na qom,
na'maxare qaica ca 'negue ma'le.
Ná'ogue i'maqata ma'le qaica ca retaqa,
ma' tot qaica ca qohinac quiñi qota'olec.
8Qam quená'maq ỹim quiñi ne'Espíritu ñi qara'gaxala'
no'xataxachigui aỹim queda lquesaxanaxa, queda ỹa'maqachiguiñi chaqai da la'ñaxac iuel,
ca' soviraqta'a yi Israel quiyim se na'xaỹaxan chaqai queda lasauaxaset.
9Ca na'xaỹaxañiỹa nagui dajo, nashillipi chaqai na la'gaxalateripi na Israel,
qamiri ma' se rqo'chiỹa dá'maq no'uen
chaqai namaq nqai'ñii ná'maq ỹalamqata,
10ma' no'xoñiishiguim yi Jerusalén yí'maq na'a' lodegaxat cada qa' ladocai Sión,
no'xoñiishiguim queda nalauataxanaxac chaqai queda se no'uen.
11Ná'maq nimiitaxanaq quena nasauaxaset quena na'a' lodegaxat ỹahote'e añi nishiuete,
na netaxaỹaxanqajanqaipi rapaxaguinataxan, qam ỹahote'e añi nishiuete,
chaqai na netaxaỹaxaquiripi imen dá'maq letaxaỹaxac quiyim 'naac:
“Ñi qara'gaxala' qoshiilgoto qomi',
ca' qaica cá'maq se no'uen quet noviroxoua'.”
12Vichiguiño' nagui, ca' sauaxate' qamiri,
yi Jerusalén yí'maq na'a' lodegaxat nejlec ada qa' ladocai leenaxat Sión,
ma'le, ca 'neetari' ca 'laua se qanasauec, 'ec qalapoonñi na lahillipi,
chaqai adá'maq qa' nejlec ñi no'ueenaxanaxaqui no'xalec ma'le cana peue.
