Miqueas 2

₁¡'Xoraicolec ná'maq 'ue da la'deenataxanaxac quiyi pe

quiyim ỹo'uet ca se ỹa'maxañi,

ca quena' ỹovita yi na'xa'a, ca ỹo'uet,

ma' hueeto'ot dá'maq nquesaxanaxa!

₂Quena' 'ue yi nqo'teu'a 'laua, ca rouootaxana'gue;

chaqai quena' 'ue na nqo'teu'a 'imec, ca' rocacha.

Pataxañi na qomyipi,

chaqai na llaalqaipi chaqai na lalamaxaret louenqaipi.

₃Vichiguiño' 'naac ñi qara'gaxala':

Ỹim liỹa 'ue dá'maq sham shine'teguelo qamiri.

Selatalo qamiri ma'le ca ne'xoric lodegaxat

cá'maq sqai ỹite' ma'le naua rqosoochiri,

ca' tot qaica ma'le da nemaqajnaxaguii quiyi huoitegueri',

ma' chalego la'aaqa' ma'le naua na'xata'.

₄Ca' quecajo na'xa'a, ca qaro'ueenaxantalgoto qamiri,

qam cajo no'ueenaxanaxac 'ec ỹenaxac. Qohinac caqamiri:

Ỹaatqajam qanomachichiriñom qomi':

na qouo' ná'maq lalamaxaret ñi qara'gaxala'

ỹoỹoota'a ca la'gaxala' qaica ca ishit quepaxata'guit;

naua qana'lauari shi'gue qaneuagaxachiguilo

quená'maq mashic qomi' loxonqa.

₅Vichiguiño' qamiri mesqai 'iỹapegueu'a

na lalamaxareteripi ñi qara'gaxala'.

₆Ca na'maxare 'naac:

¡Se sahoqotaque quiyim naiquena ca letaxaỹaxaqui ñi qota'olec,

ma' cá'maq ne'xoric se noviroxoua'!

₇¿Peeta'a 'ue ca qainaxalec se no'uen na llaalqaipi so Jacob?

¿Peeta'a ñi qota'olec tot qaico' ca lepagaxallic?

¿Chaqaido' dá'maq 'neetari' ñi qota'olec?

¿Loqo'm tot qoshiilec da la'qaatec

quecá'maq qom na'maxateta?

₈Ca' ñi qara'gaxala' 'naac:

Qamiri napaguiiteguelec na ỹalamaxareteripi.

Coñiỹalo naua loho lo'yaxanqa

ná'maq rapil queca lauataq

'neetapega mashic nca'leuec.

₉O'yiỹauec na 'aallipi quenauá'maq lauochaqate' lomaate'

chaqai tot qaica ma' liỹa quiyim 'viichii

dá'maq lemaqachic saanem na llaalqaipioqui'.

₁₀Ne'laxachishiguim, ca' quii,

ma' najo mesqaina ná'maq co'matqa';

ma' mashic chalego ná'maq se no'uen hueetalec na'maxare,

ỹaatqajam ná'ogue na'lliichiguiñi.

₁₁No'm 'ue ca ỹo'uet ca la'maachic, ca' 'naac:

“Ỹim sa'xateta'guit ca lataxa chaqai ca 'taxat,”

ca' chaqaica cá'maq ỹaatqajam na'qaataxanqajnec qaimaqachin quenajo qomyipi.