Números 3

₅Ca' ñi qara'gaxala' ỹalamaxachichigui so Moisés, ca 'naapego':

₆—Ỹaxañire'oga na llaalqaipi so Leví quiyim nañaanot na'maxare ñi Aarón ñí'maq netaxaỹaxanqajnec quena' qaretaxaỹa'pegue' aỹim, ca' ro'ueenataxanot. ₇Na'maxare ỹaatqajam nelaatqaipi ma'le quiñi Aarón chaqai quená'ogue na qomyipi quiyim lo'ueenataxanqa' na 'imec na'daañi hua'ñi quiyim qanauane'e' aỹim, chaqai chaqaina ná'maq ra'ỹaapeguelec na no'ueenatqaipi quiyi noma'. ₈Ca' chaqaina ná'maq idaaneguelec qai'neeta na louenqaipi ñi 'imec na'daañi chaqai quelola ná'ogue na Israel llaalqaipi quená'ogue ná'maq qaỹo'uet quiñi 'imec. ₉Ca ỹaatqajam ỹoochire'oga na llaalqaipi so Leví, qaiyi se naqachiguit na liỹa llaalqaipi so Israel, qaiyi na'maxare ỹaatqajam ỹalamqajlec ro'ueenataxanot ñi Aarón chaqai na llaalqaipi. ₁₀Ca' ñi Aarón chaqai na llaalqaipi ỹaatqajam pataqairelec da no'ueenataxanaxac quiyim qaretaxaỹa'pegue' aỹim. Ca no'm 'ue ca chi iconeu'a retaqa, qam sqai ỹaatqajam itaxaỹaxanqajnec, ca ca'maxare qaỹalauat.

₁₁Ca' ñi qara'gaxala' 'uo' da ỹa'xat ỹalamaxachichigui so Moisés, 'neetasa':

₁₂—Quena Israel llaalqaipi ỹim ñca'au'a na llaalqaipi so Leví, ñiguit nqaishin ca 'auaxaic llaalec ca ni'ic. Ca na'maxare ỹaatqajam ỹalamaxaret. ₁₃Ma' ỹim ỹalamaxaret ná'ogue ná'maq 'auaxaic ñaalec. Na' ñalauajñi ná'ogue ná'maq ỹi llaalec so Egipto laseripi, ca ño'ueenaqtauec quiyim ỹalamaxaret ná'ogue na 'auaxaic quena llaalqaipi so Israel chaqai quena laloipi, ca vichiguiño' ỹalamaxaret. Ỹim ná'maq ỹim na'gaxala'.