Filipenses 2

₁Ca no'm so Cristo ỹa'ñaxate' qamiri, chaqai da le'xorenataxanaxa lo'daxachiguilo naua qavilyi, chaqai so ne'Espíritu hueetauguilo qamiri, no'm 'yiiñii da no'daqainataxanaxac chaqai da nqouagaxa, ₂ca 'maxaraic quiyim 'viichii ca ñitoonaxac quiyim niñiiquishiñitecta', necoñitagui da 'oonoqui' ne'xorenataxanaxa, 'oonoqui' ca ra'deenataxanaxaguii, chaqai 'oonoqui' cá'maq 'ñiitari'. ₃Chaqai mesqai 'ue ca naquichitaque quiyim 'ue ca 'viichii chaqai quiyim nemaqajñii. Ta'ta'a ca ne'xoresenaxaguii, chaqai quiñi 'óna paguec gueme nqai'en ca liỹa queca'maxare. ₄Chaqai qaica cá'maq chi nodaata'pegue' quet idaantaque cá'maq chi la'maxa. Ta'ta'a quiyim ỹahotaque quiyim ỹa'maxañi qai'neeta ca liỹa.

₅Chaqai 'ñii'tegue dá'maq 'neeta'co' na'le da la'deenataxanaxac so Cristo Jesús. ₆Ma' so'maxare 'eno'm mashic ỹantañi da no'ueenataxac ñi qota'a, qam se ipaca'pegue' quiyim 'nejem quet ñi qota'a. ₇Ta'ta'a quiyim le'en illa'gue da lahi dá'maq chi no'ueenataxac, ca' neconaque quiyim 'ec ca na'ac co'na' ne'qaañi 'neetari' ca chaqai qom. ₈Ca co'na' ỹantañi da no'ueenataxac na chaqai qom, ca' neneequesen. Ca quedá'maq quiyim na'xaỹaxanta, ca chi ỹovireta'a quiyim qaỹalauat, 'eno'm ỹo'uet da nayiloxo da lelauaxa na' qaipateno queso npatenaxala'. ₉Ca' vichiguiño' ñi qota'a ỹaanem yí'maq paguec lecaic loma' chaqai da leenaxat paguec lecaic nqai'en quená'ogue, ₁₀qaiyi ma' qara'xaỹaque da leenaxat so Jesús, ca ỹa'chi'iñi naua le'cootal ná'ogue na hueeto'ot na piguim, chaqai quena 'laua, chaqai na pa'aatañi quena 'laua, ₁₁chaqai qaiyi ná'ogue ỹa'deena'a chaqai 'naac quiyim so Jesucristo ỹaatqajam na'gaxala', quiyim qaimaqachin ñi qota'olec.

₁₂Ca' vichiguiño' qamiri ñauochaxaua' ỹaqaỹa', quiyim chaqaida 'ñiitari' quiyim se neme na'xaỹaxañii'ta aỹim quena' salequetauguilo qamiri, ca' nagui, ca paguec quet na'xaỹaxañii'ta aỹim mashic qoỹoqo'ta aỹim. Ca nquipichiỹa'pegue' da rca'laxahi, ca niñiiquishiñii chaqai richilliỹañi. ₁₃Ma' ñi qota'a ñí'maq ỹaanema qamiri dá'maq no'uen viitaque chaqai ỹotauane' qamiri qaiyi shichii 'viichii, ma' chaqaida dá'maq ỹahotaque ñi'maxare.

₁₄Ca ná'ogue 'viichii, qam qaica ca retaqatac chaqai se nco'uaita'ta', ₁₅qaiyi qaica ca 'ue ca lasauaxaset chaqai ca 'ue ca lo'maxac caqamiri. Ta'ta'a quiyim ỹaatqajam qamiri llaalqa ñi qota'a, co'teete' qamiri quiyim lliguitaugui na qomyipi hualoxonyipi chaqai nocqaiquipi. Qam naviguerec qamiri, ca' coỹarilec na'maxare, 'ñiitari' aca huaqajñi naviguec quena' napalñi, ₁₆quiyim 'xachim da na'qaatec chicqaugui da nca'laxa. Qaiyi ma' novi' so Cristo, ca' 'ue ca ñitoonaxac ma'le caqamiri. Sa'deentari' quiyim 'ue ca ñigui da ñamaqsoxoc chaqai da ỹo'ueenataxanaxac. ₁₇'Eno'm 'ec saantaho da ñachaalataxac quiyim qaỹavigaxat, qaiyi qaỹalecqajnougui ca rachitaxanataxanqachii 'ỹaañitacot ñi qota'a queda rpi'ỹaxaguii, ca' 'ue da ñitoonaxac. Salecqajanto da ñitoonaxac caqamiá'ogue. ₁₈Chaqai netooñii qai'neeta qamiri, nouañiỹau'a da ñitoonaxac.

₁₉No'm chaqaiso so qara'gaxala' Jesús ỹa'maxarenta, ca' sahotaque sqaỹaloq sela' ñi Timoteo quiyim ra'ajnaxanalo qamiri, qaiyi 'ue ca ñitoonaxac ma' 'ue ca ỹa'xaỹaxac caqamiri. ₂₀Ma' qaica quet cá'maq 'ue ca la'deenataxanaxac 'nejem aỹim, quiyim llic ỹahotaque quet ca ra'maxahi, qaiñiita. ₂₁Ma' ná'ogue na liỹaripi idaantaque cá'maq chi la'maxa, ca' qaica quet cá'maq ỹauaaque cá'maq ỹahotaque so Cristo Jesús. ₂₂Qam qamiri mashic 'yiiñii so Timoteo quiyim re'qoota da 'maxaraic no'ueenataxac chaqai dá'maq 'neeta quena' ñotauante'e' quena' sa'xatqatac da na'qaatec chicqaugui da nca'laxa, 'neetari' ca ñaalec quiyim ỹotauantac ca leta'a. ₂₃Ca' sahotaque sela' quiyim ra'ajnaxanalo qamiri, ma' sa'den negue' cá'maq shintari'. ₂₄Chaqai aỹim 'ue da ñaquitaxac queso qara'gaxala' quiyim qaỹaloq ya'ỹa'alo qamiri.

₂₅Qam peeta'a 'maxaraic qai'neeta quiyim sela' ñi qarqaỹa Epafrodito. Ỹotaua quena' seloquiaq queda qaro'ueenataxanaxac, chaqaiñi ñí'maq nelarii na'le quiyim idaanlec aỹim quenaua ỹouenaxanaxaco. ₂₆Ma' 'xoic da lishoxo quiyim qamiá'ogue iuañiỹaxaua', chaqai 'ue da liyaxa ma' qamiri 'ue ca ra'xaỹaxaguii na'le na' ralola. ₂₇Qam llic ralola na'le, ca' mashic sham ileu. Qam ñi qota'a nqouaguegue na'le so'maxare. Qam mesqaiñiita ñi'maxare, ma' qai'neeta nqouaguegue aỹim, qaiyi sqai paguec ca ỹachicoxo quedá'maq shi'gue ỹachicoxo. ₂₈Vichiguiño' paguec sahotaque selatalo qamiri ñi'maxare, qaiyi qamiri 'ue ca netoonaxaguii ma' liỹa huañiỹa ñi'maxare, chaqai qaiyi sqailligueme' da ỹachicoxo. ₂₉Ca ỹaatqajam 'xoic ca netoonaxaguii ma' coñiguit ñi'maxare, ma' qai'neeta huelec so qara'gaxala'. Chaqai se neme quiyim rauochigue cá'maq 'nejem ñi'maxare. ₃₀Ma' ñi'maxare mashic sham ileu ma' ro'ueenataxantacot so Cristo. Chaqai ỹaañiguit da nachaalataxac da lichic na' yotauan quedá'maq qamiri sqai shichii yotauañiigue ma' qoỹore'talo qamiri.