Filipenses 4

₁Ca vichiguiño' qamiri ñauochaxaua' ỹaqaỹa', sahotaque ñauañiguita qamiri, ma' qamiri nauá'maq 'em 'ue da ñitoonaxac, chaqai qamiri 'ec ỹaueguec. Chaqaida 'ñiitari' quiitalec so qara'gaxala', qamiri ñauochaxaua'.

₂'Ue da ỹaqataxac, ñi'xoresentouguilo caua Evodia chaqai aca Síntique quiyim neuojonta', 'neetasa'lo caua nqaỹa' quiyim nañaantetot so qara'gaxala'. ₃Chaqai ma' qami' qamaxaraic ỹo'ueenataxanaxaua, ca shiñirapegaxaua' quiyim tauañi' cauajo qarqaỹa', ma' caua'maxare ỹaatqajam 'xoic da lotaanaxanaxague' caỹim na'le quiyim sa'xatqatac da na'qaatec chicqaugui da nca'laxa, chaqai so Clemente chaqai so liỹaripi ỹo'ueenataxanaxauaripi. Caua leenqate' saua'maxare shi'gue qoỹeresalec aso nelere ñi qota'a nca'laxalate.

₄Naua'que naua na'xata' netooñita'gue so qara'gaxala'. Liỹa sopilalec shinac: ¡netooñitac! ₅Ca ná'ogue na qomyipi ỹa'deente' qamiri quiyim qamiri qouagaxanqachaqaqa, ma' so qara'gaxala' sqaỹaloq novi'.

₆Chaqai qaica ca ỹachicoqochite' qamiri. Ta'ta'a quiyim ná'ogue 'ỹaañitacot ñi qota'a quena' nqouagaxaiñii. Shiilaitac, chaqai 'ỹaañitacot da na'aachiguii qai'neeta. ₇Ca' ñi qota'a ỹaanema qamiri ma'le da la'maxa napacalec ná'ogue na la'deenaxanaxa na qomyipi. Ca' dajo na'maxa quepaqataxanlec añi re'taxanatahi chaqai da ra'deenataxanaxaguii ma' na'yiitau'a so Cristo Jesús.

₈Qamiri ỹaqaỹa', dá'maq co'uaataxanta ỹaqataxac 'neetasa': ỹaatqajam ỹajñita ca leloxoỹaxac cá'maq lliqueta, chaqai ná'ogue ná'maq 'ue ca 'negue nqohin, chaqai cá'maq no'uen ñicyaxac, chaqai ná'maq qaica ca lalegue', chaqai ná'ogue ná'maq qaỹa'maxarenta, chaqai ná'maq no'uen ca na'qaataxac. 'Yiiñitapega ná'ogue ná'maq no'uen chaqai taiguit quiyim qaimaqachin.

₉Chaqai ỹaatqajam 'viichii ná'ogue ná'maq sapaxaguinque qamiri, chaqai ná'maq ỹaqataxaquipi saanema qamiri, quená'maq 'xaichigui caỹim, chaqai ná'maq huañichigui so'uet; ca 'viichii. Ca' ñi qota'a ñí'maq chicqo'ot da na'maxa ỹalequetauguilo qamiri ma'le.

₁₀Ca' 'xoic da ñitoonaxac queso qara'gaxala' ma' qamiri lotqai liỹa o'lliinchii'a aỹim. Qam mesqai shinac quiyim couahi'e aỹim, ta'ta'a quiyim qaica ca redaaqari quiyim yotauañii. ₁₁Mesqai shinac quiyim 'ue ca ỹouenaxanaxa, ma' sa'den quiyim ñitoonta'pegue cá'maq 'ue caỹim. ₁₂Ma' mashic seuana da ne'xoric, chaqai sanaỹa'gue quiyim qaica ca souentaque, chaqai sa'den ña'ñaxachiguit canchaqaica 'neeta, quiyim yquema', loqo'm yqopat, loqo'm quiyim qaica ca souen, loqo'm qaica canchaqaica caỹim. ₁₃Seshit ña'ñaxachiguit ná'ogue, ma' Cristo só'maq ỹa'ue da iquesaxanaxa. ₁₄Qam qaiyiita ỹa'maqachiguiñi quiyim qamiri yotauañii queda ỹouenaxanaxa.

₁₅Ma' qamiri ñiỹa'ñi na Filipos qai'neeta 'yiiñii na' ñaqai chita'gue sa'xat da na'qaatec chicqaugui da nca'laxa na' shique'e na Macedonia, ca quená'maq mashic icoñiguit da na'qaatec qaqamita nelaritac ana rotaanaxanqachii, ma' netooñita'gue da ỹotaanaxanaxac quiyim sapaxaguine' qamiri. ₁₆Ma' na' ñaqai seueta'ñi yi Tesalónica, ca' qamiri shi'gue nelaritac quen aca rotaanaxanqachii quena ỹouenaxanaxa. ₁₇Qam ỹim mesqacaata sa'deentapega aca ñotauanqate quiyim secoñiguit. Ma' ỹim qaidaata sahotaque quiyim noquiicshiguim da ro'ueenataxanaxaguii, qaiyi ishiuetene' qamiri ma'le ñi qota'a. ₁₈Ma' ỹim mashic shi'gue paguec ana secoñiguit quecá'maq ñotauanaxac quet, ca cá'maq qanela' na'le queso Epafrodito aso'maxare ỹaatqajam nalau'a ná'ogue ná'maq souentaque. Ca' sojo rotaanaxanqachii aso'maxare 'nejem ca nichiinaxanaxat lo'daxaraic lahita quiyim qaỹavigaxat, ca' qoỹaanot ñi qota'a, ca ỹa'maxarenta ñi'maxare. ₁₉Ca' ñi qota'olec ỹaanema qamiri ma'le ná'ogue ná'maq liỹa viñitaque, ỹachigoxochichigui dá'maq qaica 'nejem lauaq lesallaxa hueeto'ot nqai'en so Cristo Jesús. ₂₀¡Ca' ñi qota'olec se neme ma'le quiyim qaimaqachintac! Ajá'a, ca' chaqaida 'neeta dajo.

₂₁'Ỹaañim da iquinaxanaxac cá'ogue cá'maq lalamqateripi ñi qota'a huelec so Jesucristo. Naua qarqaỹa' iỹareta'pe ilate' da liquinaxanaxague' caqamiri. ₂₂Ná'ogue ná'maq neeta'ñi najo ná'maq lalamaxareteripi ñi qota'a ila' da liquinaxanaxac, chaqai paguec ná'maq ỹalequetaugui na nalliripi ñí'maq lashi na nashillipi neeta'ñi na Roma.

₂₃Ca' so qara'gaxala' Jesucristo ỹaanema qamiri da lqouagaxa. Ajá'a, chaqaida 'neeta dajo.