Proverbios 24

₁Totaxan pa'guiñi'sac na hualoxonyipi,

chaqai sqai viisaque quiyim qauora'e',

₂ma' qaica ca liỹa ỹa'deenapega, qaidaata da lqa'viic,

chaqai qaica ca liỹa ỹa'xat, ta'ta'a quiyim ỹo'uet ca se no'uen.

₃Da na'deenaxanaxa chicqochigui quiyim qano'xonshiguim ca 'imec,

ca' queda nco'ỹaxaric, ca qaỹo'viijñi ca no'xonaxala';

₄ca' queda na'deenec, ca qaiỹoxouguilo caua 'imqa

quena nouenec qoỹoqota'a chaqai lo'yaxanec.

₅Paguec la'maxa ca qom 'deenaxanqachaqaic queca qom quesaxanaxaic;

paguec la'maxa ca na'deenec queca nquesaxanaxa,

₆ma' ca lauataq qaỹo'uet,

qam 'au qana'yiinchigui qana'maxachichigui,

chaqai da nauegaxanaxac chicqochigui ca 'xoic napaxaguinataxanaripi.

₇Cá'maq sqaica ca ỹa'den qaica ca ỹa'xat quena' reloqota'guit ca imitac na nasauaxaset,

ma' saqa' ỹovita yí'maq ỹaatqajam na'deenaxanaxa.

₈Cá'maq qaicaatam qam ỹa'deentaque ỹo'uet ca se ỹa'maxañi,

ca' 'ue da lichoxoric quiyim la'axaic lqahic.

₉Dá'maq na'deenaxac cá'maq qaica ca ỹa'den, ca chaqaida da nasauaxaset;

qaica ca ishit na'ñaxachiguit cá'maq i'neetac ca liỹa.

₁₀No'm rolaaviriñi ma' reuocqoisac,

ca' sqai 'xoic ca rquesaxanaxa'e'.

₁₁Nca'laxachirec cá'maq qailliitalec ca lelauaxa;

naqachira'a queca lichic cá'maq sham ileu.

₁₂Ca 'eno'm 'taxachisegueñi quiyim sqa 'yiiñi',

qam ñí'maq imitac na nasauaxaset qaiyijim retan qami';

qam ỹaatqajam ỹa'deenta ñí'maq ra'ajñisac qota'olec,

ñí'maq ipaquichigui nqai'en ca re'xoriqui' cá'maq ro'ueenataxanaxaqui'.

₁₃Qami' ỹaalcolec, a'qui' na rapic li'i ñaqai hueetagui ana lapa;

'guiñi' dá'maq 'neetari' da lo'daxa.

₁₄Ca' chaqaida 'neetari' nqai'ñi' da lo'daxa

da na'deenaxanaxa quiyim 'ue ca 'yiiñi';

no'm nachita, ca no'uen lqodoc aca rqauaxagui'i' ma'le

chaqai se ỹauana ishit ỹapalaxat da naquitaxaqui'.

₁₅'Neeto' vi'saque 'viichi' ca se no'uen queca huagaxaraic ỹale,

chaqai 'neeto' 'ue ca na'axachi' queca la'a' neeta'ñi,

₁₆ma' 'eno'm siete huaañi,

qam qaiyiita canchaqai ỹote' ne'laxashiguim;

qam na hualoxonyipi iyinñigui ma'le da le'xoric.

₁₇Mesqai netooñitegue chaqai 'xoic lemaqachic nqai'ñi'

quiyim repoxolaxan chaqai quiyim huaañi ca npa'guenaxaua'e',

₁₈ma' no'm iuana dajo ñi qara'gaxala', ca' se nqo'ta,

ca' se noquii'a ma'le ca'maxare.

₁₉'Neeto' 'ohirelec ca nocqaic,

chaqai 'neeto' pa'guiñisa'a na hualoxonyipi,

₂₀ma' ca hualoxonaq se no'uen ca lqodoc ca nachaalataxac:

¡ca hualoxonaq ma' ime, ca 'ec aca ncoỹeraxanaxaqui 'om!

₂₁Maqachiñi' ñi qota'olec chaqai ñi nashi, qami' ỹaalcolec;

totaxan lapoisa'piguit na npa'guenaxauaripi,

₂₂ma' da le'xoric ne'laqataxanto ma'le,

chaqai qaican ỹa'den ma' qaỹouaxan quiñi qota'olec chaqai quiñi nashi.