Salmos 16

₁¡Qami' qota'olec, loqoisa'a aỹim,

ma' qaqamite' se'guentacot!

₂Ca' ỹim shinac caqami':

Qami' ná'maq qami' ỹa'gaxala' ỹaatqajam qami' ỹa'maxa;

qaica ca 'nejem qami'.

₃Na lqolaquipi na qomyipi quena 'laua paguec quesaxanaxaiquipi,

'naac ná'maq lashiilqaipi na'maxare.

₄Ca' noquiigaxatetauec na lashiilqaipi lqolaquipi,

ca' queeta'pegue', chalego da lemaqajnataxanaxa.

¡Qam ỹim qaica ma' salecau'a quet na ỹalauatetac quiyim ỹavigaxat lachitaxanataxanaxat!

¡Ỹaatqajam qaica ma' ña'xatec quet na leenqateripi!

₅Qami' ỹa'gaxala', ỹaatqajam qaqamite' caỹimá'ogue;

ma' qami' machiralec aỹim da rqouagaxa'e';

qami' lo'qo'isañi da ñachaalataxac.

₆Ỹaatqajam chalego loyac yí'maq taalec nqai'ñi' aỹim;

¡ỹaatqajam lo'yaxanec yi ỹa'a' vi'saque nañaañirim!

₇Semaqachin ñi qara'gaxala' ma' ñi'maxare yashaxantac,

chaqai dá'maq pa'ỹaauo ño'ueenataxac ñi'maxare ỹa'maxajñi quiyi pe.

₈Chaqai 'neetari' sqo ỹoxe'oga nqaishin ñi ỹa'gaxala',

ñi'maxare hueeta'gue da ỹoic, ca' qaica cá'maq huaañi nqai'en aỹim.

₉Vichiguiño' dá'maq pa'aauo queda ño'ueenataxac,

añi i'taxanata ỹaatqajam no'qaachigui queda ñitoonaxac.

Ca caỹimá'ogue qaica ca huapigui iuel,

₁₀ma' qami' se no'ueenaxachira'ñigui aỹim aca napal lahi',

¡sqa lachira'ñigui aca lahi' ná'maq ỹaatqajam qamaxaraic nauochaxaua'e'!

₁₁Ca' chaxañitem aỹim ca nayic da nca'laxa.

Ỹaatqajam chalego da na'maxa quiyim sqoỹoqaque qami';

qaica ca lqodoc da toonaxac quiyim qarauaqate'e' qami'.