Da lecaic ñi qota'olec quena lo'ueenatqaipi
1Na piguim ỹa'xat da lecaic ñi qota'olec,
ca' quená'maq lo'ueenatqaipi ichoxot ná'maq hueeto'ot na'maxare.
2Naua na'xata' chi na'xajta',
naua piri chi na'qaataxantecta'.
3'Eno'm se qara'xaỹaque ca na'qaatec,
chaqai sqaica ca qara'xaỹaque nivillaxac,
4qam da'maxare imaalec ná'ogue na 'laua,
chi ỹovireta'a ca lqodoc na 'laua,
chi ỹovireta'a ca na'ñi añi ra'aasa.
5Añi ra'aasa netoon quena' quegue so llic,
'ec ca nalliquinaxai,
'ec ca piitaxaua quena' nenoxonec queca lo'naqa'.
6Nenoxonshiguim añi ra'aasa queda lqodoigue,
ca queeto'ot na piguim, chi ỹovireta'gue da lahi.
Ca' qaica ca ishit 'eetapeguem na lauaq.
7Da lapaxaguinataxanaxac ñi qara'gaxala' ỹaatqajam lamaxaraic,
ma' ỹadalaxat da chaalataxac.
Da laqataxac ñi qara'gaxala' ỹaatqajam qamaxaraic,
ma' da'maxare ỹo'uet ca la'deenec ca qaica ca ỹa'den.
8Naua lelaataxanaxaco ñi qara'gaxala' ỹaatqajam 'maxaraqa,
ma' ỹo'ueete' da netoonaxac añi ne'taxanata.
Da laqataxac ñi qara'gaxala' ỹaatqajam co'teeta,
chaqai neloxotec yi na'deenataxanaxac.
9Da nqolonaxa quiñi qara'gaxala' ỹaatqajam co'teeta chaqai qaica ca lqodoc.
Naua laqataxaco ñi qara'gaxala' ỹaatqajam lliquete',
naua'que naua'maxare ỹaatqajam 'maxaraiqa,
10¡ỹaatqajam napacalec ca lesega'a cá'maq ỹaatqajam no'uen 'oro!,
¡paguec lo'daxa queca rapic li'i hueetagui aca lapa!
11Chaqai qai'neeta naqataxaco quenajo relaachiqui'
ca ma' na'xaỹaxanalo, ca' 'ue da la'maxa.
12¿Negue' cá'maq ỹa'deene' cauá'maq chi lo'maxaco?
¡Qami' ỹa'gaxala', palaxachi' naua se re'xoi' ỹo'maxaco!
13Naqachi' da nemaqajnaxac najo relaachiqui';
mesqai 'xañitegue quiyim queetalec da nemaqajnaxac,
qaiyi co'teeta da ñachaalataxac,
qaiyi qaica cá'maq ỹasauaxaset lodegaxat.
14'Maxariñite' naua ỹa'qaatqa chaqai naua ỹa'deenataxanaxaco,
qami' qarashi, i'guenaxala' chaqai ica'laxaqui.
