Salmos 51

₁Qami' qota'olec, queda re'xorenataxanaxa'e', ca qouaquiric;

ca' queda chalego lecaic rqouagaxa'e', ca palaxachi' naua ỹasauaxasete'.

₂¡Nquiỹo'irec naua iualoxonqaishico!

¡Yco'taxachi' quenaua ỹasauaxasete'!

₃Ña'deenalta' quiyim ỹim sqa seuelec qami';

na ỹasauaxasete' sqai pale' quenaua ỹa'deenataxanaxaco.

₄'Ue da ỹasauaxaset caqami', da'maxare qaqamite' hueeto'ot,

na' so'uet na se no'uen, ná'maq se rqo'chita qami'.

Vichiguiño' ỹa'maqachiguiñi da ra'xalenataxanaxaqui';

chaqai sqaica imaqa'guita naua ra'qaataxahi'.

₅Ca' lliqueta quiyim chi ñi'qaañi chaqa'ma' ỹim nocqaic;

shi'gue ỹim sauaqhuaic na' ñaqai seuetaho.

₆Ỹaatqajam 'xoriñi' ca qom no'uen ca hueetagui añi le'taxanata,

chaqai na iuel lli'ragui da na'deenaxanaxa.

₇Yco'taxachi', qaiyi sco'teeta;

yiquiỹo'e', qaiyi paguec ỹim lalagaxaic caca loñi nacañi.

₈No'xataxachirigui aỹim queca ỹa'maxa chaqai ca ñitoonaxac;

nadalaxachirishiguim ca ỹa'maxa, 'eno'm vite na'le da i'xoric.

₉Totaxan ra'iriguilo naua ỹasauaxasete',

chaqai palaxachi' naua'que naua iualoxonqaishico.

₁₀Qami' qota'olec, ¡ñi'ragui aỹim aca ne'taxanata co'teeta!,

¡vite ca dalaxaic ỹa'deenataxanaxac ỹa'maqachiguiñi!

₁₁Sqai ỹoochire'oga ỹim caqami',

chaqai sqai huootaxañira'gue caỹim ñi co'teeta espíritu chicqo'ot qami'.

₁₂Ñauata'guit nqai'ñi' ca dalaxaic ñitoonaxac chicqaugui da rca'laqataxanaxaqui',

chaqai ya'maxachi' ma'le queso espíritu 'xorenataxanaxai chicqo'ot qami',

₁₃qaiyi sapaxaguinegue ma'le da nayicyaxaqui' na sqai huelec qami',

qaiyi na sauaqhuaiquipi pilot qami'.

₁₄Qami' qota'olec, qami' ná'maq qami' chicqo'ot da ica'laxa,

se yoviraxachira'a quiyim salauataxan,

ca' sa'xatetac ma'le so'ueenaxanta'uegue quiyim qami' 'maxaraic da no'ueenataxaqui'.

₁₅Qami' ỹa'gaxala' ñaqai huachigui nqai'ñi' na ỹap,

qaiyi so'ueenaxan, semaqachiñi'sac.

₁₆Ma' qami' sqai 'maxariñi' aca chi nachitaxanataxanqate loqo'm aca qaỹavigaxat;

ỹim seshit saanem quet qami', qam qami' sqai 'maxariñi' aca'maxare.

₁₇Aca nachitaxanataxanqate quiñi qota'olec chaqaica ca na'deenataxanaxac 'xoic da nqui'ic;

¡qami' qota'olec se liỹoqoira'piguit aca ne'taxanata neneequesenta!

₁₈Ca 'viichi' ca no'uen quena Sión quedá'maq vi'saque;

quiyim liỹa no'xoñirishiguim ca lquepaxaset na Jerusalén.

₁₉Ma'le, ca coñichiguit ca nachitaxanataxanaxat cá'maq 'maxariñite',

iseripi chaqai ana nachitaxanataxanqate ỹaatqajam qaỹavigaxateta;

ca' qoỹaano ma'le ca huaqui llaalqaipi quiyim qaillaalec ada ncopatoxonaxalate.