Salmos 63

₁¡Qami' qota'olec, qami' qota'olec caỹim!

'Ue da ipagaxallic quiyim sedaantaque qami'; ma' vi'saxauot cá'maq souentaque;

ỹimá'ogue souentaque qami',

shintari' ca 'laua rashivijlec, qaica ca huaxaỹaq chaqai qaica ca nca'laxa.

₂¡Sahotaque seuañiraxaua' nqa'xañisa'ñigui aca co'teeta nqa'xanaxagui'i',

chaqai seuana da rquesaxanaxa'e' chaqai da rauaqe',

₃ma' da re'xorenataxanaxa'e' ỹapacauec queda chaalataxac!

Ca' quena ỹap semaqachintac qami',

₄semaqachintac qami' quedá'ogue da ñachaalataxac,

ỹiquesashiguim naua iqai'laqate' quiyim ñqouagaxainot qami'.

₅Ỹaatqajam ya'maqachiguiñi ma'le,

shinta cá'maq chita'gue ỹomat ca no'uen nqui'ỹaxac,

ca' ñitoontac, semaqachintac qami' ma'le.

₆Quena' ñinanñi quiyi pe,

ca so'leentaxan, ca' sa'deentaque qami';

₇ma' qami' ná'maq yotauañi'sac.

¡Ỹaatqajam 'xoic ỹa'maxa quiyim sento'oto naua rauachi'!

₈Dá'ogue da ñachaalataxac ima'guit aqami';

da qatoiqui' se yayaxanec.

₉Ná'maq ỹahotaque yalauat

ta'ñigui ma'le aca napal lahi';

₁₀¡qaỹalauat, qaỹodoota'a na lecat

chaqai qaito quena isecỹac toxonaxai!

₁₁Qam ñi nashi netoontac quiñi qota'olec;

ro'ueenaxantalec da lemaqajnataxanaxa ná'ogue ỹaanec da la'qaatec quiñi'maxare,

qam ná'maq na'majantac, ca qaỹapogui na lap.