Salmos 8

₁Qami' qara'gaxala' ma' cochi'sapegalo qomi',

¡da qadeenaxachi' ỹaatqajam ỹoiquentac ná'ogue na 'laua!,

¡da remaqachiqui' napacalec na piguim!

₂Queda lemaqajnataxanaxa na ñaaqaipioqui'

chaqai ná'maq ñaqai llipetac,

ca no'xoñirishiguim ca re'guenaxagui'i',

sauaxat na npa'guenaxaua'e'ipi,

qaiyi nomachichiriñi na sqai huelec qami' chaqai ná'maq se reuojñi'.

₃Quena' ya'iito'ot na piguim ná'maq ro'ueenachiqui',

ñi shiraigo chaqai ana huaqajñi

ỹañiso'ot na'maxare,

₄ca viichigui na iuel quiyim shinacsa':

¿Negue' quet ná'maq chi ỹale?

¿Negue' quet ná'maq chaqai qom?

¿Chi'negue ma' sqa 'laxachite chaqai quelollisapega na'maxare?

₅Ma' sham nalo'chiguit nqai'ñi' qami' na'le,

chaqai 'ỹaañitem quiyim qaimaqachin chaqai da lichoxoric,

₆chaqai 'ỹaañitem quiyim ỹapacauec quena liỹa ro'ueenachiqui',

chaqai 'ỹaañitem quiyim ỹapacauec quená'ogue nanchaqaina:

₇ỹapacauec quena qagretaipi chaqai quena ñii'lolaipi, chaqai quena iseripi neuec,

₈chaqai quená'maq ỹoipi quená'maq ỹootac quena piguim,

chaqai na nalliñipi hueetañigui ana huaaxai,

¡chaqai quená'ogue ná'maq hueetañigui ana huaaxai!

₉Qami' qara'gaxala' ma' cochi'sapegalo qomi',

¡da qadeenaxachi' ỹoiquentac ná'ogue na 'laua!