1Qamiri ỹaqaỹarolqa, ỹaatqajam 'xoic da lishoxo añi i'taxanata chaqai sashiilatac ñi qota'olec quena Israel llaalqaipi, ma' sahotaque quiyim qanca'laxatec. 2Ỹim shinac dajo, ma' ỹaatqajam 'xoic da lishoxo quiyim ro'ueenataxanot ñi qota'a. Qam dajo lishoxo sqai chicqaugui dá'maq ỹaatqajam llic na'deenaxanaxa. 3Ma' se ỹa'den cá'maq 'neeta cá'maq 'neeta'gue ñi qota'a quiyim icoñi'chiguit ca qom. Qaidaata quiyim idaantaque ca chi la'maqa' quiyim qaicoñi'chiguit quiñi'maxare, qam se nañaanot dá'maq leloxoỹaxac ỹa'yiñi ñi'maxare. 4Ma' so Cristo chaqaiso só'maq lqodoc so naqataxaquipi chicqo'ot so Moisés, ca ỹo'uet quiyim ná'ogue ná'maq huelec so'maxare, ca qaicoñi'chiguit quiñi qota'olec.
5Ca quiyim qaicoñi'chiguit quiñi qota'olec chicqochigui so naqataxaquipi, ca' da ỹiriñi so Moisés 'neetasa': “Ca qom quiyim ipacqajanchigui ỹo'uet na naqataxaquipi, ca' ca'lligui na'maxare.” 6Qam dá'maq 'neeta quiyim ca qom qaicoñi'chiguit quiñi qota'a quiyim chicqochigui da lpi'ỹaxac, 'neetasa': “Mesqai hueetapigui qavilli' quiyim 'ñirac: ¿Nega'ỹo' ca ishit taashiguim queda piguim? —ca' dajo 'neeta quiyim rapilaxajñi so Cristo—; 7'neeto' lotqai 'ñirac: ¿Nega'ỹo' ca ishit ta'ña yi loma' na lqui'i na leuaxaiquipi?” —ca' dajo 'neeta quiyim qanavicshiguim so Cristo chicqochiguiñigui nqohin na leuaxaiquipi. 8Ca' chaqaida dá'maq naneretañi la'qaatec ñi qota'a, 'neetasa': “Da na'qaatec sqoỹoqaque caqami' quena qadapi' chaqai cañi re'taxanata'e'.” Ca' dajo na'qaatec chaqaida dá'maq ỹa'xat quiyim qaipi'ỹa'a ñi qota'a dá'maq sa'xatqatac qomi'. 9Ma' no'm quenaua ra'qaataxahi' 'xachi' quiyim so Jesús chaqaiso só'maq qara'gaxala', chaqai quiyim lli'chirigui añi re'taxanata'e' quiyim virelec ñi qota'olec quiyim liỹa nca'laxatec na'le queso nelauaxa, ca' rca'llirec. 10Ma' qaỹachigoxochichigui añi ne'taxanata quiyim qoyiuelec qaiyi qaicoñi'chiguit ca qom quiñi qota'olec, chaqai quiyim qaỹa'xat so Jesucristo qaiyi qanca'laxatec ca qom.
11Naua naneresañi la'qaatqa ñi qota'a 'nerac: “Quená'maq mashic huelec ñi'maxare, ca' se nayiloxontac nqai'en.” 12Ma' mesqai ỹoricchi ca leloxoỹaxac quiyim qanca'laxatec quená'maq judioipi chaqai ná'maq sqai judío. Ma' chaqaisoota só'maq qara'gaxala' qomá'ogue, chaqai quiyim ỹa'ue ná'ogue nanchaqaina quená'maq nqouagaxaintacot so'maxare. 13Ma' chaqaida dá'maq 'nerac naua naneresañi na'qaatqa: “Ná'ogue ná'maq nqouagaxaintacot so qara'gaxala', ca nca'leuec ma'le.” 14Qam ¿negue' quet cá'maq 'neeta quet quiyim nqouagaxainot, no'm sqai huelec so'maxare? Chaqai ¿negue' quet cá'maq 'neeta quiyim 'ue ca huelec, no'm sqaica cá'maq qara'xaỹa ỹa'xatetac so'maxare? Chaqai ¿negue' quet cá'maq 'neeta quiyim qara'xaỹa, no'm sqaica cá'maq ỹa'xat da na'qaatec? 15¿Negue' quet cá'maq 'neeta quiyim ỹa'xat quet da na'qaatec, no'm se qaila'? Ma' dá'maq 'nerac naua naneresañi la'qaatqa ñi qota'a: “¡Ỹaatqajam lo'yaxanec da loviraxac ná'maq ỹodootegueri' da na'qaatec chicqaugui da na'maxa, chaqai cá'maq ỹa'xatetac da no'uen na'qaatec!”
16Qam mesqai ná'ogue na'xaỹaxana da na'qaatec chicqaugui da nca'laxa. Ca' ipaquichigui nqai'en na'le so Isaías co'na' 'naac: “Qami' ỹa'gaxala', ¿nega'ỹo' cá'maq na'xaỹaxana ma'le da qara'qaatec?” 17Ca' chaqaida, ma' da npi'ỹaxac chicqochigui da 'xaỹaxanaxac, qam dá'maq qana'xaỹaxantapega chaqaida dá'maq na'qaataxac so Cristo.
18Qam ỹim senataxan: ¿Peeta'a sqa 'xaỹa na'maxare da na'qaatec? ¡Ajá'a, pacaco', qa'sqai 'qaatapega! Ma' naua nerecse' la'qaatqa ñi qota'a 'neracsa':
Da lelamqa' naua la'qaatqa saua netaxaỹaxanqajanqa qara'xaỹa quená'ogue na 'laua,
chaqai nalolec naua'que naua lahil na 'laua daua la'qaatqa saua'maxare.
19Qam lotqai liỹa senataxan: ¿Peeta'a na Israel laseripi se ỹa'deene'uegue da na'qaatec? ¡Ajá'a, ỹa'yiinchigui! Ma' dá'maq 'auaxaic ỹiriñi so Moisés la'qaatec ñi qota'a 'naacsa':
Ỹim sa'ue ma'le da roquiiaxahi quecá'maq qomyipi se qauori laseripi,
chaqai ỹaatqajam so'ooqochite' ma'le qamiri sauaxat na qomyipi ma' se nqo'ta quiyim 'ue ca ỹa'den.
20Ime, ca' so Isaías lotqai napacqajan quiyim ỹiriñi da la'qaatec ñi qota'a, 'neetasa':
Ná'maq se idaantaque aỹim, ca ỹanachiua',
chaqai ñachaxana ná'maq se renataxantaque aỹim.
21Chaqai na' so Isaías taalec nqai'en na Israel laseripi da la'qaatec ñi qota'a, 'neetasa': “Ỹaatqajam yá'ogue yi na'xa'a soỹaxantapega quiyim rapilliua' na se na'xaỹaxan qomyipi ná'maq ỹim npa'guene'e'.”
