Ñi qota'a nca'au'a so llaalqaipi so Israel
1Ỹaatqajam lliqueta da sa'xatetac, ma' ỹim mashic seuelec so Cristo chaqai se ña'majantac. Ma' da ỹa'deenataxanaxac ỹoiquentac so Espíritu Santo, ca' i'taxajñi caỹim quiyim lliqueta dá'maq sa'xat. 2Ỹaatqajam sachicota chaqai ñaqai eec da nqui'ic cañi i'taxanata, 3ma' ỹim ỹovire'ta sovira'a quiyim sahotaque quiyim aỹim ná'maq ỹo'da'guit ñi qota'olec, qaiyi qoỹoqo'ta nqai'en aỹim so Cristo, queta' chaqaido' dá'maq noviraxat ca la'maxa na ỹaqaỹaripi, quená'maq chi iuo' laseripi judioipi. 4Ma' na'maxare chaqai llaalqaipi so Israel, chaqai ñi qota'a icoñiguit 'neeta'gue meca llaalqaipi. Ñi'maxare ỹaatqajam ỹalequetaugui na'le na'maxare chalego loyac so lauaq, chaqai ỹaanema naua na'maqataxaco, na naqataxaquipi chicqo'ot so Moisés, chaqai da leloxoỹaxac quiyim qaimaqachin ñi'maxare, chaqai naua ỹachaxanta'pe quiyim ỹaanema. 5Na'maxare chaqai llaalqaipi so 'auaxaic qareta'allipi, chaqai da re'qoochigui no'ueenataxac na'maxare chicqotougui so Cristo. Ca' qoỹanagui so'maxare quiyim qota'olec quená'ogue, ca qaiyi se neme quiyim qaimaqachintac. Ajá'a, ca chaqaida 'neeta dajo.
6Qam mesqaida quet quiyim se ipaguigui quet ná'maq ỹachaxantac ñi qota'olec queso Israel, ma' sá'ogue so lalamaxaret llaalqaipi so Israel mesqai sá'ogue lalamaxaret ñi'maxare. 7Ma' mesqai sá'ogue so llaalqaipi so Abraham lalamqateripi quet llaalqaipi. Ta'ta'a quiyim ñi qota'a 'naaco' na'le: “Chicqochigui ma'le da Isaac ca qachaalaxai'pi.” 8Ca' quedajo, ca sa'deenaq quiyim qaica quet cá'maq qota'a llaalec quiyim chicqaugui na chi lauo' laseripi quiyim ne'qaañi. Ta'ta'a quiyim cá'maq chicqochigui na'le dá'maq ỹachaxantac ñi qota'olec, ca' 'eca cá'maq ỹaatqajam llic qaỹamata'gue llaalqaipi ñi'maxare. 9Ma' dá'maq ỹachaxantac na'le ñi qota'olec queso Abraham 'neetasa': “Ma' ỹovita ca laloqo', ca ỹim ñanac ma'le, ca' ñi Sara 'ue ma'le ca llaalec.”
10Ca' dá'ogue dajo mesqaidaata, ma' saua dos llaalqa aso Rebeca saua'maxare qaisoota so leta'a' só'maq 'auaxaic qareta'a Isaac. 11-13Qam saua'maxare na' saqa' ne'qa'iñi, chaqai saqa' ỹo'ueete' ca ỹa'maqachiguiñi loqo'm ca se no'uen, ca ñi qota'a 'naaco' caso Rebeca: “Ñí'maq ỹi quiyaua'maxare nelaatec ma'le quiñi lanoq.” Ca' dajo nachiñi'chiguit qai'neeta naua naneresañi la'qaatqa ñi qota'a, 'neracsa': “Se'xoren so Jacob, so Esaú yoquii'a.” Ca' quiyi, ca qai'taxajñi da lca'axanaxac ñi qota'a quecá'maq nca'au'a quecá'maq ỹahotaque roỹaxana, se ra'iitapigui cá'maq ỹo'ueetetac.
14Ca ¿nega'ỹo' cá'maq shinqac? ¿'Uo' ca se ỹa'maxañi ỹo'ueetetac ñi qota'a? ¡'E', mesqaida! 15Ma' 'naaco' na'le queso Moisés: “Se'xoreno' cá'maq se'xoren, chaqai yqouagueco' cá'maq yqouaguegue.” 16Ca vichiguiño' dajo sqa chicqaugui ca chaqai 'neeta'pegue loqo'm ca chi na'ñaaqataxac ca qom, ta'ta'a quecá'maq chi nqouaguegue ñi qota'olec. 17Ma' quenaua naneresañi na'qaatqa, ñi qota'a 'naaco' na'le queso lashi yi Egipto: “Chi so'uet quiyim qami' nashi, ma' sahotaque quiyim sachigoxochichigui qami' quiyim re'oq nqaishin da iquesaxanaxa, qaiyi qaỹa'den da ỹeenaxat quená'ogue na 'laua.” 18Ca' 'eda da 'neeta quiyim ñi qota'olec nqouaguegue cá'maq nqouaguegue, chaqai qai'neeta ỹa'ñaxat aca le'taxanata cá'maq ỹahotaque ra'ñi nqai'en.
19Ca' qami' shichi'o' 'ñirac caỹim: “No'm chaqaida dajo da 'neeta, ca ¿chi'negue ma' ñi qota'a pataqateguelec na qomyipi quiyim 'ue ca lasauaxaset? Ma' ¿negue' quet cá'maq ishit imaqa'guit cá'maq ỹahotaque ñi'maxare?” 20¡Qam qami' qom! ¿Negue' queto' aqami' quiyim taxaisa'guit ñi qota'olec? ¿Loqo'm 'ue aca no'xona 'laua ishit 'naapega cá'maq no'xonqo': “Chi'neco' ma' 'ñiiteteco' aỹim dajo na' yo'viichi'?” 21Ma' cá'maq ỹo'ueetac ana no'xona 'laua 'ue nqai'negue quiyim canchaqai 'neeta'gue ca nishaaxa. Ma' quecajo nishaaxa ca'maxare ishit ỹo'uet aca no'xona quiyim 'xoic nqohin da lemaqachic, chaqai 'ue aca ta'chiguit quiyim nedaxac lo'o.
22Ca ñi qota'olec ỹahotaque ca laloqojnaxanaxat quiyim ichoxot ca nouaxanaxaset chaqai da lquesaxanaxa, qam 'ue da leualaxavic quiyim na'ñaxachiguit ná'maq 'chichiguiñi tai'a quiyim qaỹa'ue ca nouaxanaxaset chaqai quiyim qanopoxoỹaxajñi. 23Ma' ñi'maxare ỹo'uet dajo, ma' ỹahotaque quiyim ỹa'deenaxanaxanque qomi' da lecaic da lauaq quedá'maq 'neeta'guelo qomi' quiyim nqouagueguelo qomi', chaqai quiyim ỹaqatqajantari' ỹa'maxachiñi qomi', qaiyi ñouanqau'a dajo lauaq. 24Ma' ñi qota'olec na' roỹaxanalo qomi', ca' 'ue na ỹachigoxotaugui na judioipi chaqai na liỹaripi ỹachigoxotaugui na mesqai judioipi. 25Ca' ipaquichiguilo naua naneresañi la'qaatqa ñi qota'a hueesalec aso leraxanaxalate na'le so Oseas, 'neracsa':
Ná'maq se ỹalamqateripi, qam samata'gue ỹalamaxareteripi ma'le,
chaqai ná'maq se se'xoren, ca samata'gue i'xorenatec ma'le.
26Ca yí'maq hua'ñi na' qohinac: “Qamiri mesqai qamiri ỹalamaxarete'”,
ca' chaqaiyi hua'ñi quiyim qaỹamata'gue llaalqaipi ñi qota'olec nca'leetauec.
27Qam quená'maq Israel llaalqaipi, ca' so Isaías 'naaco' na'le: “'Eno'm ỹaatqajam 'xoic na llaalqaipi so Israel, 'ec lecaata na lo'uaxanaxa cana huaaxai, qam sqo vito'olqai' ma'le caua no'ueendañi quiyim nca'lerec. 28Ma' ñi qara'gaxala' qaỹaloq ipacqajanchiguilo naua'que naua la'qaatqa quena 'laua.” 29Ca 'nejem ma'le dá'maq 'naac na'le so Isaías:
Ñí'maq la'gaxala' ná'ogue na piguim laseripi quetqai mesqaico' ca no'ueenaxatañi quena qochaalqaipi,
ca vire'ta queta' shinqate' saua na'aate' Sodoma chaqai so Gomorra na' qanopoxoỹaxachiñi.
Na judioipi qai'neeta taỹaugui da na'qaatec chicqaugui da nca'laxa
30Ca ¿nega'ỹo' ca shinqac? Quená'maq sqai judioipi chaqai quiyim se ỹahotaque quiyim qaicoñi'chiguit quiñi qota'olec, ca' chaqaina ná'maq qaicoñi'chiguit quiñi'maxare, chicqochigui nqohin da lpi'ỹaxac. 31Qam quená'maq Israel laseripi ma' queeta'pegue' na naqataxaquipi ma' ná'maq ỹo'uet quet quiyim qaicoñi'chiguit quiñi qota'a, qam na'maxare se ishit quiyim ỹo'uet ipacqajanchigui dá'maq 'naac na naqataxaquipi. 32¿Chi'negue? Sai'c, ma' se nquipita'pegue' quiyim qaicoñi'chiguit quiñi qota'a ỹachigoxochichigui da lpi'ỹaxac, ta'ta'a quiyim ỹachigoxochichigui ná'maq chi lo'ueenataxanaxaquipi. Vichiguiño' na'maxare repoxolaxanlec so Cristo, ma' 'nejem ca qa' nepoxolaxanaxala', 33só'maq qaỹa'xatetac quenaua naneresañi la'qaatqa ñi qota'a, ma' 'nerac:
Aỹim sanañigui na lavinñi yi Sión ñi ỹale quiyim 'ec ca qa' nepoxolaxanaxala' chaqai qa' quiyim 'ue ca huaañi nqai'en;
qam cá'maq huelec ñi'maxare, ca se nayiloxontac nqai'en.
