Qaraloqojnaxana da nouaỹaxac
1Qamiri ỹaqaỹa', ma' qamiri mashic 'yiiñii na naqataxaquipi, ca' quiyim na naqataxaquipi ỹoiquentac ca qom no'm ñaq nca'leetauec. 2Ca' saloqojnaxana aca 'aalo quiyim mashic 'on. Ca' na naqataxaquipi ncoñira'guit nqai'en ca loua, no'm ñaq nca'leetauec ca'maxare. Qam no'm mashic ileu ca loua, ca' aca 'aalo qaỹosouec queso naqataxaquipi coñireta'guit nqai'en ca'maxare. 3Ca no'm aso'maxare ỹa'ue ca dalaxaic loua no'm ñaq nca'leetauec cá'maq 'auaxaic loua, ca qaỹamata'gue nedequenaxai. Qam no'm mashic ileu ca loua, ca' aca'maxare so'oga quena naqataxaquipi. Ca aca'maxare no'm ỹadalaxat ca loua, qam tot qaỹamata'gue nedequenaxai.
4Ca' chaqaida 'neeta caqamiri ỹaqaỹarolqa ma' mashic na'yiitau'a na loshicmaxa so Cristo, ca 'ec mashic ileue' qamiri, qaiyi so'ogalo qamiri queso naqataxaquipi, ma' mashic ỹoqa'a so rouahi. Ca' nagui qamiri lalamaxarete' so Cristo, só'maq liỹa qanca'laxatec na'le quiñi qota'a. Dajo 'neeta, qaiyi da qanachaalataxac ỹaatqajam qaỹouen ma'le quiñi qota'a. 5Ma' na' ñaq ñanoiquenqata'pegue' dá'maq chi qano'ueenataxac, ca na naqataxaquipi nelouec nqai'en da lamaanaxanqachic na qaroshicmaxa. Ca' dajo ỹauequeta'alo qomi' da nelauaxa. 6Ma' qomi' loiquenatqa na'le so naqataxaquipi, qam nagui 'eco' qareleu queso'maxare. Ca' no'uene'teguelo qomi' quiyim so'ueenataxanqot ñi qota'a quedá'maq dalaxaic qanachaalataxac chicqo'ot so Espíritu Santo. Ca' mesqai só'maq ñaaue naqataxaquipi qoỹeretañi.
Ná'maq se no'uen hueetagui aỹim
7Ca ¿nega'ỹo' shinqac? ¿Shinqaco' quiyim na naqataxaquipi se no'uen? ¡'E', mesqaida! Ma' ỹim se sa'den quet cá'maq se no'uen, quetqai na naqataxaquipi se ichoxochim. Ma' qai'neeta se sa'den quet quiyim se no'uen qaipita'a ca ỹoqa'a, quetqai se ichoxochim na naqataxaquipi, ma' na'maxare 'naac: “Totaxan ripichira'a ca ỹoqa'a nouenec.” 8Qam dá'maq se no'uen nquipito' na'le quedajo, ca' chaqaiso só'maq naqataxac ỹachigoxochichigui quiyim 'ec neloxotec dá'ogue da lqo'itaxanqachic na ỹoshicmaxa. Ma' no'm qaica na naqataxaquipi, ca 'ec ileu na se no'uen. 9'Vio' saua na'xata' quiyim yca'leetauec, ma' qaicaua naua naqataxaco. Qam na' novi' da naqataxac, ca só'maq se no'uen liỹa nca'leuec, ca' ỹim 'ec yileu. 10Ca' chaqaida 'neeta quiyim chaqaiso só'maq naqataxac quiyim ỹa'ue quet ca ica'laxa, qam yauega'a da 'eco' nelauaxa. 11Ma' dá'maq se no'uen nquipit ro'ueenataxañigui dá'maq naqataxac, ca' yayin, ca' chaqaida dá'maq naqataxac ro'goxona caỹim, ca' 'ec yalauat.
12Ca vichiguiño' dá'maq naqataxaquipi chicqo'ot ñi qota'a, ca' queca 'óna naqataxac 'maxaraic chaqai lo'yaxanec. 13Ca' ¿peeta'a chaqaino' ná'maq no'uen naqataxaquipi ná'maq yauega'a ca 'ec nelauaxa? ¡'E', mesqaida! Só'maq se no'uen só'maq ỹo'uet da 'ec ilauaxa. Ca' quiyi, ca re'oq quiyim nasauaxaset. Qam ỹachigoxochichigui dá'maq lo'yaxanec. Ca' quiyi, ca dá'maq naqataxac ichoxotec quiyim ỹaatqajam so no'uen dá'maq nasauaxaset.
14Ma' sa'deenqata quiyim na naqataxaquipi se re'xogui. Qam quedá'maq chi ño'ueenataxac caỹim qom, ca 'eco' qayimen, qaiyi ỹoiquentac aỹim na se no'uen. 15Ma' ỹim se sa'den dá'maq shintari', ma' se so'uet cá'maq sahotaque. Ta'ta'a dá'maq se yqo'ta, ca' chaqaida dá'maq so'ueetetac. 16Qam no'm cá'maq se yqo'ta quiyim so'uet, ca' chaqaica cá'maq so'ueetetac, ca' yitan quiyim 'maxaraic na naqataxaquipi. 17Ca vichiguiño', ca' totqaỹim ná'maq so'uet cajo. Ta'ta'a yí'maq se no'uen hueetagui aỹim yí'maq ỹo'ueetetac dajo. 18Ma' ỹim sa'den quiyim caỹim qaica quet cá'maq hueetagui lo'yaxanec na ỹoshicmaxa. Ma' 'ue na ishoxo quiyim so'uet cá'maq ỹa'maqachiguiñi, qam quiyim so'uet, ca' se seshit so'uet. 19Ma' se so'uet cá'maq no'uen, cá'maq sahotaque quiyim so'uet, ta'ta'a quiyim shiquetalec so'ueetetac da se no'uen dá'maq se yqo'ta. 20Ca no'm so'ueetetac dá'maq se yqo'ta quiyim so'uet, ca totqaỹim quet ná'maq so'uet dajo, ta'ta'a yí'maq nasauaxaset hueetagui aỹim.
21Ca' chaqaida dá'maq 'neeta caỹim: ma' quena' sahotaque quiyim so'uet cá'maq ỹa'maqachiguiñi, ca 'eco' seuana da lquesaxanaxa yi se no'uen hueetagui aỹim. 22Ma' ñí'maq pa'aatauo caỹim ỹaatqajam nqo'ta da naqataxaquipi chicqo'ot ñi qota'a; 23qam dá'maq liỹa seuana hueetaugui na ỹoshicmaxa, dá'maq reloquita'pegue' da ỹa'deenataxanaxac. Qam dajo chaqaida dá'maq lelaataxanaxac dá'maq nasauaxaset hueetagui na ỹoshicmaxa, ycoñiretari'.
24¡Ỹaatqajam 'xoraicolec aỹim! ¿Nega'ỹo' ca ỹoso'oga aỹim quena ỹoshicmaxa ma' yauequeta'a yi nelauaxa? 25Qaiñiita ñi qota'olec, chicqochigui nqai'en so qara'gaxala' Jesucristo. ¡Ña'aachicolec quiñi qota'olec! Ca' nagui ỹaatqajam sa'deenta quiyim ỹaatqajam yaqamqata quiyim so'uet na laqataxaquipi ñi qota'a. Qam quena re'qoochigui ỹoshicmaxa, ca' ỹim la'ac da lelaataxanaxac na nasauaxaset.
