'Naac so ỹale
1Mashic shi'gue seuetaugui na ỹanaxanqa', qami' ñapiitaxauo'lli'.
Mashic secona ana ñimirra chaqai na ño'daxaraic lahita,
shi'gue se'guentac na rapic li'i hueetagui ana lapa,
shi'gue ñi'teetapigui na lataxa chaqai naua lo'i'.
'Naac so liỹa 'aallipi
Qamiri qarqo'itqate' qanauochaxaua',
qui'ii chaqai ni'chii,
¡canchi lecaata cá'maq ni'chiigui!
'Naac aso 'aalo
2Ỹim selaqata, qam añi i'taxanata nelootauec.
Ca' sa'xaỹaque so iqo'itaxat noỹaxantapego quena lasom, 'naac:
¡Qami' iqo'itqate, huachirigui, ñapiitaxauo'lli',
qami' iqo'itqate coviguinco'lli'!
¡Ma' mashic pi'guiloxolchigui na iqahic cana 'ỹa'!
¡Ana 'ỹa' quena pe qui'ñigui na iqahic laue!
3Ca' shinac:
Mashic shi'gue ñaqate' saua ỹoho;
¡ca lotqai liỹo' sañiñi!
Shi'gue squiỹoota'pe naua ipiaate',
ca lotqai liỹa no'xaguilo quena 'laua!
4So iqo'itaxat ishito da lqai'laxat
quiñi lauacoqui' ñi lasom.
¡Ca' na'le, ca ỹaatqajam yidaxanac!
5-6Ca na'le, ca' ñi'laxashiguim,
sahotaque sauate'oga so iqo'itaxat.
Quenaua iqai'laqate' chaqai naua ñapoquenal
'ue saua llitaxahi quena qo'paq louaq mirra
tarelec ñi naconec ñi lasom.
¡Na' sa'xaỹaque retaqa,
ca ñauate'e sham yileueta!
Sauate'oga quiñi lasom so iqo'itaxat,
qam so'maxare totqai hueete'e yi'maxare.
Ca chaqa'ma' sedaantaque, qam se sanata,
soỹaxantaque, qam sqai saachiguit.
7Iuanterelec aỹim saua neloxoỹa'
sauá'maq ỹouoxonsac quena' pe yi na'a' lodegaxat;
youaxansac chaqai ycoñirqachite';
¡só'maq neloxoỹaripi quiyi ñigo quiyi na'a'
se yichirac no'teguec so ñapoxoqui!
8Qamiri 'aallipi quena Jerusalén,
no'm huañijlec ca iqo'itaxat,
ca' 'ỹaañiuec ca ra'qaachiguii quiyim 'ñiỹapega
mashic yileuetac queda iqo'iichi.
