Tito 2

₁Ca' quecá'maq 'xachi' ỹaatqajam nachiñi'chiguit dá'maq no'uen napaxaguinataxanaxac. ₂'Ñirapega na qo'xoiquipi quiyim ỹaatqajam se iualaxaintalec da llicyaxac, se qaiualaxainari', na'maxateta, chaqai 'maxaraic da lpi'ỹaxac, queda lqo'iichi, chaqai da leualaxavic. ₃Qai'neeta 'ñirapega ná'maq 'aalo qo'xoi quiyim ỹaatqajam ỹaỹajanta da llicyaxac quiyim queeta'pegue' ñi qota'a. Chaqai se la'axaqa lo'o', chaqai se ne'taaxai. Ta'ta'a quiyim ỹachaxan da no'uen 'ueenataxac ₄quiyim ỹapaxaguinegue na saqa' qo'xoi 'aallipi, quiyim nqo'ta ca loua, chaqai nqo'ta na llaalqaipi, ₅quiyim ỹaatqajam na'maxateta, chaqai co'teeta, chaqai cochiỹa ca lomashaxac, qouagaxanqachaqai, na'xaỹaxane'ta ca loua, qaiyi qaica ca se no'uen na'qaataxac taalec nqohin da la'qaatec ñi qota'a.

₆Chaqai 'ñirapega na ne'naqaipi quiyim na'maxateta. ₇Qam qami' qai'neeta chaxañi' dá'maq 'maxaraic na'qaataxaqui' quedá'ogue da ro'ueenataxanaxaqui'. Lamaxachite' ca 'xachi' quená'maq paxaguiñisac, sqai saguiriñisalec. ₈Chaqai da rapaxaguinataxanaxaqui' ỹaatqajam lo'yaxanec nqai'ñi', qaiyi qaica ca na'qaatec se no'uen qaỹa'xatetac. Ta'ta'a quiyim nayiloxon nqai'en cá'maq pa'guenaxantac, ma' se ishit quiyim 'ue ca la'qaatec se ỹa'maxañi taalgoto nqai'ne' qamiri.

₉Qachita ná'maq na'aquipi quiyim na'xaỹaxane'ta ná'ogue ná'maq lelaataxanaxaquipi ca na'co'. 'Maqataxanaxai chaqai sqai taxaỹaxai. ₁₀Chaqai se rocachi. Qaidaata quiyim ỹaatqajam npe'eet, qaiyi ná'ogue iuana da no'ueenataxac quiyim 'xoic loyac nqohin da napaxaguinataxac quena' qaỹa'xatetac da la'qaatec ñí'maq qarca'laxaqui qota'olec.

₁₁Ma' ñi qota'a ỹachaxanalo qomi' da lqouagaxa dá'maq chicqaugui da lca'laxa ná'ogue na qomyipi. ₁₂Ca' dajo lqouagaxa ñi qota'a ỹapaxaguinque qomi' quiyim salataq ná'ogue na se no'uen chaqai da qarqo'itaxanqachic quená'ogue na huelec najo, quiyim ñaqai qolqatalec na 'laua, ca sa'maxatqa'tegue da qanachaalataxac, qaraqamqata, chaqai ñañaanqot ñi qota'a. ₁₃Qai'neeta ỹapaxaguinque qomi' quiyim qolqatalec da qarauaanaxanaxac quiyim ñauaanqata'guit quiyim ỹovirelec ca laloqo' ca loyac cajo na'xa'a cá'maq qaỹachaxantapeguema qomi' cá'maq loviraxac quiyim naquetagui da lauaq cá'maq chalego lecaic qota'olec chaqai qarca'laxaqui Jesucristo. ₁₄So'maxare nañan quiyim ileualgoto qomi', ma' ỹahotaque quiyim qarca'laxatec quená'ogue na se no'uen chaqai ỹaatqajam co'taxat da qanachaalataxac, qaiyi qomi' lalamqate' chaqai quiyim qarqo'ta so'ueetaq cá'maq no'uen.

₁₅Ca' dajo dá'maq paxaguinataxañitegue. 'Ñaaqataxañisac chaqai se ro'chiralec quiyim lamqataxañi', qaiyi qaica ca napacalec qami'.