Tito 3

₁No'uenaxanaxañitegue ná'maq mashic icoñiguit da na'qaatec quiyim se napacalec ná'maq nashillipi leta'allipi chaqai na lotauaripi. Ta'ta'a quiyim na'xaỹaxane'ta chaqai quiyim se resalla'ñiguit quiyim ỹo'uet canchaqaica no'uen no'ueenataxanaxac. ₂Se ỹa'xat ca se no'uen quiyim queeteguelec ca liỹa. Qaidaata quiyim 'xoic ca leualaxavic chaqai qouagaxanqachaqaic, re'qoota nqai'en da neneequesenaxac quená'ogue na qomyipi.

₃Ma' qomi' qai'neete' quesom qaica ca sa'deenaq, ca' se ña'xaỹaxanaxalo naua la'qaatqa ñi qota'a. So'maqatajlec chaqai qolqata'pegue' da qarqo'itaxanqachic chaqai da qaramaanaxanqachic. Seuqataugui da se no'uen chaqai da npa'guenaxanaxa. Qomi' noquiiqate' chaqai chi ñoquiaaqata'ta'. ₄Qam ñi qota'a ñí'maq qarca'laxaqui na' ỹachaxan da lqouagaxa chaqai da le'xorenataxanaxa quena qomyipi, ₅ca qarca'laxatec. Qam mesqaida quiyim 'ue quet ca ỹa'maqachiguiñi qaro'ueenataxanaxac, ma' ñi'maxare chi qare'xoren. Ca qarca'laxatec chicqochigui nqai'en ca qanachilaxac dá'maq 'em quiyim 'ec dalaxaic qane'xaỹoqsoxoc chaqai dalaxaic qanachaalataxac chicqo'ot so Espíritu Santo. ₆Chicqochigui nqai'en so qarca'laxaqui Jesucristo, ca' ñi qota'a ỹaanema qomi' so Espíritu Santo, ỹaatqajam no'xataxachichiguilo qomi'. ₇Ca' quedá'maq lqouagaxa, ca ỹa'maxarente' qomi', ca' qaiyi seconaxaguit dá'maq ñauaanqata'guit chaalataxac sqaica lqodoc.

₈Ca' dajo sa'xatetac dá'maq ỹaatqajam lliqueta. Ca' vichiguiño' sahotaque quiyim repaquira'a 'xachi' dajo, qaiyi ná'ogue ná'maq huelec ñi qota'a nquipita'pegue' quiyim ỹo'uet ca ỹa'maqachiguiñi. Ma' dajo sa'xatetac 'xoic loyac chaqai ỹa'maqachiguiñi quená'ogue. ₉Qam rovichira'guito' na co'uaxaquipi qaica ca 'negue, chaqai na na'qaataxanaxac queso 'auaxaic qareta'allipi, chaqai quiyim se qanachiñiguit ca niỹa, chaqai quiyim qanco'uaatapiguilo naua naqataxaco chicqoro'ot na'le so Moisés. Ma' da'maxare qaica ca 'negue chaqai qaica ca taiguit.

₁₀No'm 'ue ca se neuojonta' nqai'en ná'maq mashic icoñiguit da na'qaatec, ca' ỹaatqajam taqaira'a ca'maxare. Ca no'm se na'xaỹaxana qami' quiyim 'óna loqo'm dos 'ñirapega, ca' chaqa'ma' ỹochire'oga. ₁₁Ca' quedajo chaqa'ma' 'yiiñi' cajo ỹale quiyim ỹit dá'maq ỹa'maqachiguiñi. Ma' dá'maq lasauaxaset chaqaida dá'maq re'oq nqai'en quiyim ỹo'maac.

₁₂Ma' selata qami' ñi Artemas loqo'm ñi Tíquico, ca' se naỹaloxoñi' quiyim naquirepegue' yi Nicópolis, qaiyi ñauanaqta', ma' sahotaque senta'anyi quena no'oomaxa. ₁₃Ỹaatqajam nquipichira'pegue' quiyim tauañi' so Apolos chaqai so Zenas só'maq qoshiilec ca 'ue ca ỹasauaxat. 'Ỹaañima cá'ogue cá'maq ỹouensaque queda llicyaxague', qaiyi qaica ca ỹouene'. ₁₄Chaqai ná'ogue ná'maq mashic icoñiguit da na'qaatec 'maxaraic quiyim ỹa'den ỹo'uet ca no'uen qai'neeta, chaqai quiyim ỹotauan ná'maq 'ue ca louenaxanaxa, qaiyi 'ue ca 'negue da nachaalataxac.

₁₅Ná'ogue ná'maq ñauequeta'pegue' qarqaỹaripi ilata qami' da liquinaxanaxac, chaqai da iquinaxanaxac quená'ogue na qanauochaxauaripi queda qarpi'ỹaxac. Ca' ñi qota'a ỹaanema qamiri dá'maq ỹaatqajam no'uen qayicyaxaguii. Ajá'a, ca' chaqaida 'neeta dajo.