1Qaq co'ollaq ime, nache so David 'enapega 'enauac so lapoota'a't shiỹaxauapi, 'eeta': «Ñim Lo'onatac 'Enauacna, lca'aguishec ñim ỹalec Salomón, qalaxaye ñimaye ỹataqta ña nsoqolec, qaq cam huotaique da qaỹo'ot ỹataqta lta'araic, qalaxaye saishet da qaitaqtega ca lma' ca choche shiỹaxaua, maye qaitaqtega acam atamnaxaqui maye lalamaqte Ñim Nataxala', maye Lo'onatac 'Enauacna. 2Aỹem, ỹataqta lta'araic co'ollaxa da iuogoxo da seqataxanai' na no'onataxatpi aca atamnaxaqui maye lalamaqte Ñim Ñatamnaxala', nam oro, plata, lcat da yaqto' qaỹo'ot nam ỹotta'a't nhuenecpiolec, qataq nam 'epaqpi, qataq na qalota coma'pi maye ỹotta'a't da lataxac qataq da lyac, qataq na mármol. 3Qaq souaxato' da lta'araic ỹauotaxanaqtaic aca atamnaxaqui maye lalamaqte Ñim Ñatamnaxala', nache nam seqataxaatai' co'ollaxa da saneua'a aca atamnaxaqui, nataqa'en aỹem saneuo 'enauac na oro, qataq plata maye maiche ỹalamaxat, 4qaq namaye ivi' cien mil kilos na ỹataqta no'on oro, qataq doscientos treinta mil kilos na ỹataqta no'on plata, da yaqto' qalapaxaua'a na pa'auo aca atamnaxaqui qataq ca nỹecpi. 5Qataq ne'ena oro qataq na plata, do'onataxana qome cam ỹaỹaten da ỹo'ot nam ỹotta'a't nogoxoshetpiolec. Qaq nagui, ¿negue't ca lỹa da qoñiita, da maiche chegoqchigui da ỹanot Ñim Nataxala' ca lachetaqtaxanaxat?»
6Huaña nache so lataxala'pi som ñalaqpi, qataq so lataxala'pi so maiche nalamaxat nhuo' le'ecpi ye Israel, qataq so lataxala'pi so mil qataq so cien alleppi, qataq so pa'aỹa'aguetpi da ilotague' so no'onatacpi maye lalamaxat so nta'a, somayepi maiche chegoqchigui co'ollaxa da ỹaneuo aso lachetaqtaxanaqtepi, 7nache ỹaneuo da yaqto' qaỹo'onataxana da qaỹo'ot aso atamnaxaqui maye lalamaqte Ñim Lo'onatac 'Enauacna, aso ciento sesenta y cinco mil aso lcatpiole oro, qataq trescientos treinta mil kilos so lcat plata, qataq aso huac da ivi' so seiscientos mil kilos so bronce, qataq so tres millones trescientos mil kilos so lcat.
8Qataq 'enauac som huo'o na lalamaxat na ỹoqta no'on coma', nache ỹanem so Yejiel, som chegoxoguet so Guersón, maye ilotague' aso naỹamaqtaxanaxaqui maye naña aso atamnaxaqui.
9Nache se'eso shiỹaxauapi, ỹataqta machiguiñi souaxat da maiche chegoqchigui da ỹanot Ñim Nataxala' se'eso lachetaqtaxanaxatpi, qataq nataqa'en so nta'a David, ỹataqta machiguiñi.
10Huaña nache so David, ỹanot Ñim Nataxala' da llo'oxonnataxanaxac, ỹauaachigui 'enauac so lapoota'a't shiỹaxauapi, nache 'eeta': «¡Qaq nache 'eetai' qome da qaỹo'oxoreetac Ñim Nataxala', maye Natamnaxala' so qarta'a Israel! 11¡'Am Nataxala', maiche 'aralamaxat da na'amaqchec, da na'añaxac, da ño'oxoyec, da noxonaxanaxac qataq da qaica ca 'ena'am na'amaqchec! Cha'aye 'enauac na hueto'ot na piguem, qataq na huetalec ana 'alhua, maiche 'aralamaxat. Nataqa'en 'aralamaxat da lo'onataxanaxac na lta'alpi, qataq 'anataỹaña 'enauac namayepi. 12Nache 'am chegoqtecot da nsallaxa qataq da ño'oxoyec, qataq 'enauac da 'alotegue' namayepi. Na 'arhuaq huetaigui da lta'araic na'añaxac, qataq nache 'am da 'aỹa'anem da la'añaxac qataq da la'amaqchec 'enauac na shiỹaxauapi. 13Ỹoqo'oye 'Am Qanatamnaxala', 'am sanaxam da qana'achec qataq sho'oxorenaq da ỹo'oxoraic 'are'enaxat, 14cha'aye, ¿negue'tom aỹem qataq nam ihuo' le'ecpi da maiche chegoqchiguilo da 'am sanaxam nam ỹataqta qalota qarachetaqtaxanaxatpi? Qaq cha'aye namaye maiche 'am chegoqo'ot, qaq nacherata da 'am sanaxam, nam saconaxaguet co'ollaxa maye maiche 'am chegoqo'otpi. 15Cha'aye da 'am souaqto'ot, nache shenaqta'am cam chegaqauecpi da sa qaỹaloq da jec, 'eeta'am som hua'au qarta'alpi, qataq da qanachaalataxac da souaqtalec ana 'alhua, 'eeta'am ca lpaqal maye saq 'eetai'.
16¡'Am Nataxala' maye Qanatamnaxala', nache 'am chegoqo'ot 'enauac nam saconaxaguetpi co'ollaxa, maye seqataxanaqtai' da yaqto' so'otaq aca atamnaxaqui, da yaqto' hueta'a da qui'itta 'are'enaxat! 17'Am Ñatamnaxala', aỹem saỹaten da 'am 'auauatto'n naua nhuennataxaco, qataq 'auaỹamaxareeta da nalochiguiñi lataxac. Ỹoqo'oye aỹem, nachera da ỹaỹamaqchiguiñi iquiyaqteỹaxac da huo'omshe maiche aỹem chegoqchigui da 'am sanot 'enauac ne'ena ỹogoxoshetpi. Qaq nagui, sa'amaqchiguiñi da sauaachigui ne'ena lapoota'a't 'aralamaxat nhuo' le'ecpi, da maiche chegoqchigui da 'am ỹanot na lachetaqtaxanaxatpi. 18'Am Nataxala', maye 'Am Natamnaxala' soua Abraham, Isaac qataq so Israel maye qarta'al, qaq nache 'eetai' qome 'anqa'en da huetaigui da lquiyaqteỹaxac de'era nhuennataxac ne'ena 'aralamaxat nhuo' le'ecpi, qataq 'auaueca'aguet da lquiyaqteỹaxac da yaqto' saishet da 'am ỹaxanec. 19Qataq nataqa'en 'aỹa'anem qome so ỹalec Salomón ca ỹaỹamaqchiguiñi nquiyaqteỹaxac, qaq yaqto' ishet da ỹalaxaguet na 'aramaxasoxonaxacpi, nam 'alapaxañi lataxacpi qataq nam 'arqataxacpi, da yaqto' ishet da ỹo'ot qome aca atamnaxaqui, maye aỹem seqataxanai' co'ollaxa nam no'onataxatpi.»
20Qaq co'ollaq ime, nache so David detaxaigui se'eso laỹoota'a't shiỹaxauapi, 'eeta': «Nagui, qavio'oxoreñi Ñim Nataxala' maye Qanatamnaxala'ai». Huaña, nache 'enauac se'eso laỹoota'a't shiỹaxauapi ỹo'oxoren Ñim Nataxala', maye Natamnaxala' soua hua'au' lta'al, nache nqollemñi da ỹa'aldoto naua l-llecte Ñim Nataxala' qataq so nta'a. 21Qaq so lỹa na'a'q, nache somayepi ỹalauat so shiguiỹacpi nache ỹanot Ñim Nataxala' da yaqto' lachetaqtaxanaqte ỹavigaxatta, qaq somayepi ivi' mil huaca llalaqpi, mil so peenaqpi, qataq mil so qagueta llalaqpi, qataq qaicorelec so nachetaqtaxanaxat lataxa, qataq som laỹepi lachetaqtaxanaxatpi so Israel le'ecpi. 22Qaq se'eso na'a'q, nache somayepi ỹataqta ỹa'amaqchiguiñi da deque'etac qataq da nỹomtac, ỹauaachigui Ñim Nataxala'. Ime, nache qaltaq ỹe'eguelaxaalec da ỹaasheguem da yaqto' nta'a so Salomón, maye llalec so David, qataq qaicorelec da qoỹanot Ñim Nataxala', qataq so Sadoc, qoỹaneuo da ntaxaỹaxanaxanec. 23Qaq 'era da 'eetec so Salomón, da nso'ongui aso so'onaxaqui maye lalamaqte Ñim Nataxala', nache nmeneguet so David, maye lta'a somaye, nache nquictasheguem da lo'onataxanaxac somaye. Qataq som Israel le'ecpi ỹataqta ỹalaxaguet somaye. 24Qataq 'enauac so nataxala'pi, qataq so alaataxaicpi, qataq 'enauac so llalaqpi so nta'a David, ỹataqta itauaatac so nta'a Salomón. 25Qaq Ñim Nataxala' ỹanem da ỹataqta lta'araic da la'amaqchec so Salomón, da ỹalectaigui so Israel le'ecpi qataq ỹanem da ỹataqta lta'araic da llo'oxoyec da lo'onataxanaxac, nache qaica ca 'eeta'am som hua'au co'ollaxa nta'alpi ye Israel.
Da l-leuaxa so David
26Qaq 'era da 'eetec so David, maye llalec so Yesé, co'ollaq ilotague' 'enauac so Israel le'ecpi. 27Qaq somaye ivi' cuarenta vi'iye da ilotague' co'ollaxa na Israel le'ecpi, qalaxaye siete vi'iye da ilotague' ye Hebrón, qataq treinta y tres vi'iye da ilotague' ye Jerusalén. 28Qaq somaye co'ollaq ileu, qalaq no'oita da lqueroxo qataq qaỹoqtrec soua vi'iye da nachaalataxac, qataq ỹataqta sallaxanec qataq huo'o da llo'oxoyec. Qaq da lo'onataxanaxac da nta'a, nache talec so llalec Salomón.
29Qaq da na'aqtaguec so nta'a David, nache chegoqchiguiña co'ollaq ñaq cheta'ague da do'onataxan, nache ivitta'a so pa'atec lo'onataxanaxac, da nache nanettalec aso nere maye huetalec da na'aqtaguec so na'aqtaxanaxanec Samuel, qataq so na'aqtaxanaxanec Natán, qataq som huo'oi naua l-loxoco le'enaxat Gad, 30qataq 'enauac nam na'aqtaguecpi da lo'onataxanaxac qataq da la'añaxac so nta'a David, qataq nam lataxacpi maye ivireguet co'ollaxa somaye, qataq so Israel le'ecpi qataq som 'alhuapi maye lauoreuapi.
