So Pablo ỹamaxa aso lere so 'amqaanataxanaxaicpi maye netaña ye Corinto
1-3Qami' ỹaqaỹa't maye qaua'amaqchiñiitac Ñim Lo'onatac 'Enauacna maye qoviita'a na Corinto:
Qauacoñiiguet da iquinaxanaxac qataq ñi qarqaỹa Sóstenes.
Aỹem Pablo huo'o da iyaxa da Ñi Qarta'a maye Lo'onatac 'Enauacna qataq So Qarataxala' Jesucristo qami' ỹanema ca lta'araic nsoxoyec qataq nlagaxayec.
Ñim Lo'onatac 'Enauacna aỹem lca'aguishec, da yaqto' aỹem lamaxayec So Jesucristo, nataqa'en qami' lca'agui'she, da yaqto' qana'ayeetaua'a Somaye qataq qaualliquiitaigui na lalamaxatpi Ñim Lo'onatac 'Enauacna. Yaqto' qana'ayeetaua'alo qomi' qataq 'enauac nam ỹo'oxoreetac Som Qarataxala' Jesucristo maye huetalec 'enauac ana 'alhua.
Da nqouagaxaunaxac so Pablo
4Nache 'eetai' da saatacot da ña'achecỹaxac Ñim Lo'onatac 'Enauacna, souaxat da qoñiita, cha'aye chegoqchigui So Cristo Jesús da qami' icoreleguete da lqouagaxanaqtaic Ñimaye. 5Qataq nataqa'en chegoqchigui Somaye da Ñim Lo'onatac 'Enauacna qami' ỹanema da saqcha'a nsallaxa, qaq nachera da qara'aqtaxanaxaqui qataq da qarauattonaxanaxaqui, 6Qaq ỹoqo'oye da na'aqtaguec So Cristo yo'oqta da qami' nañaxatoiguilo. 7Ỹoqo'oye nagui da qauacheetaique So Jesucristo da ñe'eguelaq, nache qami' nlaqchiguilo nam chegoqo'ot Ñim Lo'onatac 'Enauacna. 8Qaq Ñimaye ỹataqta qami' nasoqchiyiñi, qami' iviraxatta'alo ca loga'tna, yaqto' qaica ca ỹauo'o ca qarasouaxashechi qom nvi' So Qarataxala' Jesucristo. 9Ñim Lo'onatac 'Enauacna ỹataqta ipacteleguete naua ỹa'n la'aqtaqa, Ñimaye nacheñi ñi qami' iỹaxanalo da qanhuañiỹaua'a da nachaalataxac So Llalec Jesucristo maye Qarataxala'.
Colaxagui na 'amqaanataxanaxaicpi
10Qami' ỹaqaỹañicpi, qami' seroleguete da le'enaxat So Qarataxala' Jesucristo da qami' ñachoxoreetoiguilo da ỹataqta qanaỹaañeta't. Saishet da qaucolaqaitagui. Nachaqrata da qaica ca ỹaqpegueuga, 'oonolec ca qarhuennataqai qataq ca qoñiitapeguec. 11Shenapec de'era, qami' ỹaqaỹarolqa, cha'aye huo'o na lauo' le'ecpi aca qarqaỹa Cloé aỹem da'aqtaxaatapeguem da huo'o na sa naỹamaxanna't da qoñiita. 12Cha'aye huo'o na 'eeta': «Aỹem seca'attague' so Pablo;» qataq huo'o na 'eeta': «Aỹem seca'attague' so Apolo;» qataq huo'o na 'eeta': «Aỹem seca'attague' so Pedro;» qataq huo'o na 'eeta': «Aỹem seca'attague' So Cristo.» 13Qaq ca 'eetec de'era ¿peta'a So Cristo ishet da 'eco' colaqtagui? ¿Peta'a aỹem qaiuaxaneuo da seleualeguete qami'? ¿Peta'a qaỹachelaxanataxana da ỹe'enaxat co'ollaq huo'o ca qanachelaxan da qoñiita? 14Aỹem saatacot da ña'achec Ñim Lo'onatac 'Enauacna da aỹem saishet da huo'o ca ỹachelaxanatac da qoñiita, nachaqsota so Crispo qataq so Gayo, 15yaqto' qaica ca 'oonolec da qoñiita da 'eeta' da la'aqtac: «Aỹem qanachelaxangui da le'enaxat so Pablo.» 16'Eesa nataqa'en da ỹachelaxanatac na lauo' le'ecpi ca Estéfanas, qaq saishet da ñetoonec da huo'otaq huo'o ca lỹa ỹachelaxanatac. 17Cha'aye So Cristo saishet da aỹem ỹamaxalec da sachelaxanataxan. Chaqrata da aỹem ỹamaxalec da sa'axattac da no'on na'axaỹaxac. Qalaxaye saishet da so'onataxana ca laỹaanec ca choche shiỹaxaua, yaqto' saishet da huo'otaq saqca ca naigui qanqa'en da l-leuaxa So Cristo co'ollaq qaiuaxaneuo.
So Cristo nacheso so laỹaanec qataq la'añaxac Ñim Lo'onatac 'Enauacna
18Da na'aqtaguec da l-leuaxa So Cristo co'ollaq qaiuaxaneguet so npe'enaxaqui, damaye 'eeta'am da choche 'oopashec da hua'axaỹa nam taỹa'a da deqat. Qalaxaye qomi' maye saỹaqa'a da qomi' qanca'alaxatre'c, de'era na'aqtaxanaxac, damaye la'añaxac Ñim Lo'onatac 'Enauacna. 19Cha'aye nache 'ena'ape naua nanettraleguete ana nere maye huetalec na la'aqtacpi Ñim Lo'onatac 'Enauacna, 'eeta':
«Qaica ca naigui ñaqa'en da laỹaanataxanaxac na ỹaanaxanaxaicpi
qataq qaica ca naigui ñaqa'en da lauattonaxanaxac na huattonaxanaxaicpi.»
20Qaq nagui ¿hua'ague ca hueta'ague ca ỹaanaxanaxaic, huo'otaq ca dapaxaguenataxaateguec ana la'aqtac lmalate Ñim Nataxala' maye Lo'onatac 'Enauacna? Cha'aye da naỹaanec maye lma'na, damaye choche 'eco' 'oopashec naqa'en Ñim Lo'onatac 'Enauacna. 21Qaq Ñim Lo'onatac 'Enauacna maye ỹataqta ỹaanaxanaxaic Ñimaye saishet da ỹashenem na shiỹaxauapi ana'ana 'alhua da ỹauatton Ñimaye da ỹachegoxotchigui da maiche lauattonaxanaxac. Nachaqrata da lhuennataxac da nca'alaxatec na ỹa'amaqten de'era qara'aqtaxanaxac maye sa'axataqtac na'aictaxa da qoỹeetega choche 'oopashec.
22Na judiopi nmitta'a na na'anecpi maye sa qaỹauanapega da yaqto' ỹa'amaqten de'era na'aqtaxanaxac maye sa'axataqtac. Qaq na griegopi qalaq huotaique da hua'aqchigui ca na'aqtaxanaxac maye da qaỹa'axaỹa qalaq nachera lataxac. 23Qalaxaye qomi' sa'axataqtac da na'aqtaguec So Cristo co'ollaq qaiuaxaneuo. Na judiopi da hua'axaỹa de'era na'aqtaxanaxac, nache ỹataqta inogoqchet. Qaq nam saq judiopi da hua'axaỹa, nache 'eeta'am naqa'en da choche 'oopashec. 24Qalaxaye nam lca'aguishecpi Ñim Lo'onatac 'Enauacna maye judiopi, huo'otaq saq judiopi, damaye ỹachaxan da la'añaxac qataq da laỹaanec Ñim Lo'onatac 'Enauacna ỹachegoxotchigui da l-leuaxa so maiche Lca'aguishec maye namaq Ñimaye. 25Cha'aye na shiỹaxauapi dam 'eetega, choche 'oopashec naỹaanec maye chegoqo'ot Ñim Lo'onatac 'Enauacna, damaye napacalec da laỹaanaxanaxa nam huetalecna. Qataq dam qaipettega da 'eco' qaica ca la'añaxac maye chegoqo'ot Ñim Lo'onatac 'Enauacna, damaye napacalec da la'añaxac na huetalecna. 26Qami' ỹaqaỹañicpi, qami' tachigui qarvilli da 'eetec co'ollaq qami' iỹaxanalo Ñim Lo'onatac 'Enauacna na'aictaxa da qoỹeetega saq 'amaqtaq da qaraỹaañiqui, qataq saq 'amaqtaq da qoñiita na nalaua'a da nta'a, qataq na chegaqaigui nam 'amaqtaqaicpi. 27Na'aictaxa da na shiỹaxauapi maye huetalec ana 'alhua, 'eetega da qaica ca qauaỹaañiỹapec qataq qaica ca qami' naiguilo, qalaxaye Ñim Lo'onatac 'Enauacna maiche qami' lca'agui'she, da yaqto' na 'eetega da ỹaanaxanaxaicpi, maiche nauattoola't da qaica ca ỹaỹaanapec. 28Qaq nam qaỹamata'ac da qaica ca la'añaxac qataq na nqaigaxat qataq na qaica ca qoỹanapoigui, nachena na lca'aguishecpi Ñim Lo'onatac 'Enauacna yaqto' nam 'eetega 'amaqtaqaicpi maiche nauattoola't da qaica ca la'amaqchec. Qaq de'era 'eetec Ñim Lo'onatac 'Enauacna damaye ỹa'axat namayepi da ỹataqta qaica ca naigui, 29yaqto' da qaỹatato'ot Ñim Lo'onatac 'Enauacna, nache qaica ca na'amaqteetai'. 30Qaq Ñimaye nallegoxottela't da qana'ayeetaua'a naqa'en So Cristo Jesús, qataq chegoqchigui naqa'en Somaye da qaraỹaanec. Qataq chegoqchigui naqa'en Somaye da qomi' ỹaỹamaxareete' Ñimaye, qataq da qomi' lalamaqa'ate, qataq da saconaxaguet ca nca'alaxa chochaq tatec. 31Qaq ỹoqo'oye ana la'aqtac lmalate Ñim Lo'onatac 'Enauacna 'eeta' «ca huotaique da na'amaqten qalaq iuen da na'amaqteeto'ot So Jesucristo maye Qarataxala'.»
