1 Corintios 3

₁Ỹoqta 'eesa, qami' ỹaqaỹañicpi, da aỹem sa seshet co'ollaxa da setaxaiguilo qami' da se'enaxattem na shiỹaxauapi maye mashe netanguit So Saqcha'a La'añaxac Qui'itta Ñim Lo'onatac 'Enauacna. Nachaqrata da sheeta'am ñaqa'en qami' ca shiỹaxaua maye ñaq quetaigui da lapacheỹaxac, cha'aye qami' ñaq nogotolec da qarpi'iỹaxaqui So Cristo. ₂Saishet da qami' sapaxagueneque ca alaqaic, nachaqrata da qami' sapaxagueneque na saqalaq, cha'aye qami' qoñiita'am ca nogotolec maye ñaq lleptac, qataq saishet da chec na nallec chaxangui. Se'eso na'a'q qami' saxanaxa da qauañoxoche da qauaỹaañi na ỹataqta alaqaic. Qaq ñaq 'eetalec nagui da ñaq saxanaxa da qauaỹachiñi, ₃cha'aye ñaq 'eetalec da qoquiitaigui da qarapachiỹaxaqui. Ỹoqo'oye ña qannoita'a't, qataq qancotaitega't. Qaq 'era da qoñiitec da qaỹaỹaten da saishet da qoquiitaigui da lataxac So Saqcha'a La'añaxac Ñim Lo'onatac 'Enauacna, qataq qoñiita'am da lataxac ca shiỹaxaua maye ca'attague' ca 'eetapeguec da lapacheỹaxac. ₄Cha'aye da huo'o ca 'enapec: «Aỹem ỹataxala' so Pablo,» qaq ca lỹa 'eeta': «Aỹem ỹataxala' so Apolo,» qaq damaye. ¿Peta'a sa qauaỹachiñiỹo' da nache 'eetec da lataxac na 'etaxaloxoicpi?

₅Cha'aye ¿negue't aỹem Pablo? Qataq ¿negue't ca Apolo? Qomi' choche qomi' lamaxa'she Ñim Lo'onatac 'Enauacna, qomi' qauachegoqoichiguilo da huo'omshe qami' qaua'amaqchiñi So Qarataxala' Jesús. Ñi 'oonolec da shenaqta ỹo'ot ca lo'onataxanaxac maye ỹachaxaalec So Qarataxala'. ₆Aỹem qami' sa'axatema da no'on na'axaỹaxac maye na'aqtaguec So Jesucristo, qaq so Apolo qalaq qami' ỹapaxagueneque da lataxac da qoquiito'ot da qaua'amaqchiñiitac Somaye. Qalaxaye Ñim Lo'onatac 'Enauacna nacheñi Ñim qami' ỹo'oteque da qanquiquiita'aguet da ỹataqta qauauattoñiita So Cristo. ₇Qaq ỹoqo'oye saishet da nacheca cam ỹa'axat da no'on na'axaỹaxac cam 'amaqtaqaic huo'otaq cam dapaxaguenataxan. Nachaqñita Ñim Lo'onatac 'Enauacna 'oonolec da 'amaqtaqaic, cha'aye Ñimaye nacheñi ñi ỹo'ot da nañaxataxac. ₈Nache 'eeta'a't da la'amaqche'c cam ỹa'axattac da no'on na'axaỹaxac qataq cam dapaxaguenataxan. Ñi 'oonolec caamaye ỹaconeguet ca maiche lashiichiỹaxac ca lo'onataxanaxac. ₉So Apolo qataq aỹem qomi' no'onataxanaxau' da lo'onataxanaxac Ñim Lo'onatac 'Enauacna. Qaq qami' qalaq qoñiỹa'am ca nanqa' na trigo, qaq Ñim Lo'onatac 'Enauacna qalaq nacheñi ñim lalamaxat; nataqa'en qoñiita'am ca nỹec maye maiche lo'oxonec Ñimaye. ₁₀Qaq aỹem sheeta'am ca ilotague' ca nỹec lo'opi, cha'aye Ñim Lo'onatac 'Enauacna aỹem ỹanem da llapaxañi so no'oxonaxala' ca nỹec. Qaq na ỹaỹepi qalaq no'oxootapiguisheguem somaye. Qalaxaye ñi 'oonolec iuen da ilotelec da lataxac ca lo'onataxanaxac. ₁₁Qaq ỹoqo'oye, qaica ca ishet da qaltaq lapaxañi ca lỹa no'oxonaxala' que'eca nỹec, cha'aye mashe huo'o so qalapaqtañi. Qaq Somaye, nacheso So Jesucristo. ₁₂Qaq ca 'oonolec ishet da ỹo'oxoolec se'eso no'oxonaxala' ca nỹec, do'oxonaxana ca oro, qataq ca plata, qataq ca no'on coma', huo'otaq do'oxonaxana ca 'epaq, qataq na 'auaqpi, qataq ana coqta late'e. ₁₃Ca lo'onatac ñi 'oonolec, yo'oq qom ivita ca pa'atec na'a'q. Cha'aye qom ivita ca pa'atec na'a'q, nache Ñim Lo'onatac 'Enauacna, ỹe'eguen na lo'onatac ñi 'oonolec. 'Eeta'am da qaỹe'eguenec ca norec ca no'onataxanaxat maye seuenaq da so'onataxanaxa. ₁₄Ñi 'oonolec ca lo'oxonaxanaxat da nala'aguet ca norec, qaq camaye ỹaconeguet aca nsheetenaqte. ₁₅Qalaxaye ca lo'oxonec da huo'otaq ỹavic, huaña, nache deqat 'enauac da lo'onataxanaxac, na'aictaxa da camaye ishet da qanca'alaxatec, qalaxaye 'eeta'am ca lletec ca norec.

₁₆¿Qami' sa qauaỹaañiỹo' da qami' lma' Ñim Lo'onatac 'Enauacna, qaq So Saqcha'a La'añaxac Ñimaye qami' netaiguilo? ₁₇Qami' maye qami' lalamaqa'ate lma' Ñim Lo'onatac 'Enauacna, qaq ỹoqo'oye da huo'o ca nlaxaañi namaye, nache Ñim Lo'onatac 'Enauacna nataqa'en nlaxaañi camaye.

₁₈Saishet qome da maiche qanatenacheetapeguela't da huo'o ca 'eetega da ỹaanaxanaxaic qataq ỹaỹaten na qalota lataxacpi maye huetalecna, nachaqrata da qavi'eguelaqaỹa da qaica ca qauaỹachiñi, yaqto' 'eesa da qami' ỹaanaxanaxaiqa. ₁₉Cha'aye da naỹaanec maye lma'na, damaye 'eeta'am da choche 'oopashec naqa'en Ñim Lo'onatac 'Enauacna. Cha'aye ana nere maye huetalec na la'aqtacpi Ñimaye 'eeta': «Ñim Lo'onatac 'Enauacna ỹo'otec na ỹaanaxanaxaicpi da maiche que'emaxam da latenataxanaxac da huo'o ca huotaique da ỹatenachet.» ₂₀Nataqa'en 'eeta': «Ñim Nataxala' ỹaỹaten da lhuennataxac na ỹaanaxanaxaicpi da ỹataqta qaica ca naigui.» ₂₁Qaq ỹoqo'oye qaica ca ỹapagaqaanauec da llo'oxonnataxanaxac cam qaica ca la'amaqchec lo'onatac ca choche shiỹaxaua, cha'aye 'enauac nam huo'o, maiche qaralamaxache, ₂₂na'aictaxa da Pablo, huo'otaq Apolo, huo'otaq Pedro, huo'otaq ana 'alhua, huo'otaq da nca'alaxa, huo'otaq da nleuaxa, huo'otaq naua ñachaataqtaiguilo na'axa'te, huo'otaq ca ñaq natauo, 'enauac namayepi qaralamaxache. ₂₃Qaq qami' qalaxaye qami' lalamaqa'ate So Cristo, qaq So Cristo lalamaxat Ñim Lo'onatac 'Enauacna.