1Mashe sogote da qaỹaỹaana'a't da huo'o ñi 'oonolec da qoñiita huetapeeguet añi la'aale late'e da 'eeta'am naqa'en aca lhua. ¡Qaq de'era ỹataqta qauem! ¡Ivira'a nam saxanaxa da da'amqaanataxan saishet da ishet da ỹo'ot de'era! 2¡Qalaq qami' ñaq 'eetalec da qaño'oxoreñiitai'! ¡Qamaq ishettaxa da ỹataqta qauaquicoita! Qataq qanqacheeguesoptaxa na 'amqaanataxanaxaicpi ñi'iñi ỹale. 3-4Aỹem na'aictaxa da aỹem qaỹoqta qalaq, nache 'eetai' da sa samagueñi naxa da qami' seuennategalo. Qaq ỹoqo'oye da ivita da qalapoñiỹa't, qalaq 'eeta'am qanqa'eñi da qami' soota'agueta qataq qauennachiỹa'a qome da mashe qami' hueto'oto da na'añaxac maye qami' ỹanema So Qarataxala' Jesús. Qaq ỹoqo'oye chegoqchigui ñaqa'en da le'enaxat So Qarataxala' Jesucristo da qami' shenapegalo da ñi'iñi ỹale huo'o da lasouaxashet, 5qaq iuen da ñi'iñi ỹale qoỹaneguet so pa'aguenataxanaxaic. Da yaqto' na'aictaxa da so pa'aguenataxanaxaic nlaxaañi da lo'ocỹaxac ñimaye, qalaxaye dam saqcha'a lca'alaxa qanca'alaxatec qom ñe'eguelaq So Qarataxala' Jesús.
6Qami' sa ỹaỹamaxañi da qaño'oxoreñiitapigui de'era. ¿Sa qauaỹaañiỹo' naxa da na'aqtac maye 'eeta': «Aca saq 'amaqtaq lalecte ana nauole ishet da ỹasheeraxachigui 'enauac ca ndaqñiguishec 'ayiiña»? 7-8Qaq ỹoqo'oye qaỹa'axañiiñi da qauo'ocheetac naua qarasouaxashe'echilli'. Cha'aye dam ñe'etaxaloxo, 'eeta'am ana mashe qauem maye ỹasheeraxachigui ca ndaqnec 'ayiiña, da iqataqchet 'enauac naqa'en camaye. Da qami' qaỹa'axañiiñi da qauo'ocheetac na qauem, nache qami' dalaxaiqa shiỹaxau', qoñiita'am aca dalaxai nauole maye qaca aca lalecte maye ỹasheeraxachigui da qanallec da iviteuga ye na'a'q le'enaxat Lapascua. De'era dalaxaic qanachaalataxac, 'eeta'am de'era naponaxac. Qaq so qagueta llalec maye qaỹalauat da huaigui de'era naponaxac, nacheso So Cristo maye qaỹalauat co'ollaxa, qaiuaxaneguet so npe'enaxaqui. Qaq qomi' qalaq shenaqta'am aca nauole maye qanallec da huaigui de'era naponaxac, qaq ỹoqo'oye iuen da shenaqta'am aca nauole maye qaca aca lalecte maye ỹasheeraxachigui, damaye naigui da huesota qarataxac qataq no'on. Saishet qome da qomi' qauemaiqa qataq saishet da so'otaxac ca qauem ca qarỹa, cha'aye da nache shenaqtec de'era, nache shenaqta'am aca nauole maye lalecte qanqa'en ana mashe qauem maye ỹasheeraxachigui.
9Aso lỹa ỹere maye qami' samaxalo co'ollaxa, qami' sheetegalo da saishet da qa'aitapegueua'a na shiỹaxauapi maye quisheguetaxaicpi. 10Saishet da sheetega da ỹataqta imauec da sa qaualliquiiguet 'enauac nam saishet da 'amqaanataxanaxaicpi maye quisheguetaxaicpi, huo'otaq mataxalaic, huo'otaq cachaxaic, huo'otaq nam natameetacot na ỹaqa'api maye saq 'en qataq choche ne'enaqtacpi. Cha'aye da nache qoñiitec de'era, nache 'eeta'am da mashe qoquiỹa'ai ana 'alhua. 11Da sheetega 'eeta': saishet da qauauo'oi qanauochaxauai ca 'eetega da qara'amqaanataxanaxauai qalaxaye ỹo'ottac de'era. Ca shiỹaxaua maye lataxac de'era, camaye saishet da qanso'oñiita'ai' da qarquia'axauai. 12-13Aỹem saishet da sa'aualec da ñimit ca saxanaxa da da'amqaanataxan. Ñim Lo'onatac 'Enauacna maye nmit qome namayepi. Qalaxaye qami' maye iuen da qanmichi na 'amqaanataxanaxaicpi qaupaquiitelec dam nanettalec ana nere maye huetalec na la'aqtacpi Ñim Lo'onatac 'Enauacna maye 'eeta': «Qanqacheeuec que'eca qami' huetanguilo 'etaxaloxoic.»
