So Elías qaltaq ỹe'eguelaxa so Ajab
1Qaq so mashe qaỹoqteguelo soua na'axa'te, co'ollaq mashe inoxoorec soua tres vi'iye, nache Ñim Nataxala' 'enapega so Elías, 'eeta': «'Aue qojec, nache 'anqo'oneua'a ca Ajab, cha'aye Aỹem, ñamaq qome ca auot da talec ñaqa'en ana 'alhua.» 2Nache so Elías jec co'ollaxa, nache nqo'oneua'a so Ajab. Qaq ye Samaria, ỹataqta sa la'axaic co'ollaxa so nqouaxa. 3Nache so Ajab, iỹaxaneuga co'ollaxa so Abdías maye ilotague' naxa so nma' lta'araic, qaq so Abdías ỹataqta huo'o naq 'enec naqa'en Ñim Nataxala', 4qaq ỹoqo'oye aso Jezabel, co'ollaq damaxasoxoolec da qaỹalauat so la'aqtaxanaxanecpi Ñim Nataxala', nache somaye cincuenta naqa'en so nqañoxotoigui ñi 'oonolec soua dos auaco, qataq ỹaata'am co'ollaxa aso nauole qataq so 'etaxat. 5Nache so Ajab 'enapega so Abdías, 'eeta':
Qolaq, seconnaxalec ne'ena 'alhua, yaqto' semetenaq 'enauac ana lapelpi qataq na la'auaxacpi, shapegueto' qom sanataxa ca 'auaqpi da yaqto' aloq na qarelo caipi, qataq ana molapi, yaqto' ishet da nache nca'altauec qome namayepi, ten qom ỹapactec da qaica ca qana'atet. 6Nache soomaye co'ollaq je'c, nache ncolaxara'ache da coleeleguete se'eso 'alhua, nache so Ajab ỹaqa'a so tateuga, qataq so Abdías tateuga so lỹa nqa'aic. 7Qaq co'ollaq quetague' so nqa'aic so Abdías, nache so Elías nauaata'aguet co'ollaxa somaye. Nache so Abdías co'ollaq ỹauattona'aguet so Elías, nache ỹa'alyiñi naua l-llecte da iquin somaye, nache 'eeta':
¿Peta'a nache 'am Elías, 'am ỹataxala'? 8Nache so Elías 'enapeco':
Aja', nachaỹem. Nache 'enapego' somaye, 'eeta':
'Aue qojec, nache 'aua'aqtaxanem ca 'ana'aco' da soota'a ne'ena.
9Nache so Abdías, 'enapeco':
¿Negue't ca sasouaxat da aỹem 'aỹa'aneguet so Ajab, da yaqto' aỹem ỹalauat? 10Aỹem sanot da ỹa'aqtac Ñim Nataxala' maye 'Anatamnaxala', da ỹoqta 'eesa da shenapec, da so nta'a, qaica ca sa ivira'a naqa'en na lamaxashecpi na laỹe 'alhuapi da 'am nmittaique. Qaq naxa da huo'o na, 'eeta': «Saishet da hueta'a ne'ena», nache somaye 'enapega nam netaña ne'enaua 'aleu' da ỹan da la'aqtac, da ỹataqta 'eesa da saishet da 'am qaỹanata. 11Qaq nagui, aỹem qonapega da ñeqo'ona camaye, da sa'aqtaxanem da qoueta'a ne'ena. 12Qalaxaye da 'am sheca'ai, nache yo'oqta da anac qome so Saqcha'a La'añaxac Ñim Nataxala', da 'am ỹauega cam sasauana. Nache da ñeqo'ona ca Ajab, da sa'aqtaxanem de'era, qaq qom saishet da 'am ỹanata, nache aỹem ỹalauat qome. Qalaxaye 'auaỹaten da ne'ena 'aramaxashec, chegoqta'a co'ollaq ñaq nsoqolec da ỹataqta huo'o naq 'enec naqa'en Ñim Nataxala'. 13Qaq ¿peta'a saishet da 'am qaỹa'aqtaxanem da so'ot, co'ollaq aso Jezabel ỹalauattac so la'aqtaxanaxanecpi Ñim Nataxala' nache aỹem soxooñi caillaye so cien somayepi? Nache dos ñaqa'en soua nqañoxotaqa'ate, cincuenta ñaqa'en so nqañoxotoigui ñi 'oonolec se'esoua auaco, qataq saqoue ñaqa'en aso lqo nauole qataq so 'etaxat. 14Qaq nagui, ¿qalaq aỹem qonapega da ñeqo'ona so ña'aco', da sa'aqtaxanem da qoueta'a ne'ena? Qaq yo'oqta da aỹem ỹalauat qome.
15Nache so Elías 'enapeco':
Aỹem sanot da ỹa'aqtac Ñim Nataxala' maye Qaica ca Ỹaqalanapec, Ñim aỹem lamaxashec, da nachena ne'ena na'a'q da ñeqo'oneua'a ca Ajab. 16Nache so Abdías, nqo'ona so hueta'a so Ajab da icoyeguen, nache so Ajab, taỹa da nauane' so Elías. 17Nache co'ollaq choche ila'a somaye, nache 'enapega, 'eeta':
¿Qache nache 'amo' maye 'auo'ottac da qaica ca laỹamqa' na Israel le'ecpi?
18Nache so Elías 'enapeco': Aỹem, saishet da nachaỹem da so'ottac da qaica ca laỹamqa' na Israel le'ecpi, maye nache 'am, qataq nam chegoxoguetpi so 'arta'a, souaxat da qoquiỹa'ai na lamaxasoxonaxacpi Ñim Nataxala', nache qanatamñiitacot na ỹotta'a't lqui'ipi so Baal. 19Qaq ỹoqo'oye nagui, 'auauo'o qome ca 'auamaq da laỹona't 'enauac na Israel le'ecpi, nache taỹa qome añi qasoxonaxa Carmelo, qataq ca cuatrocientos cincuenta la'aqtaxanaxanecpi ca Baal qataq ca cuatrocientos la'aqtaxanaxanecpi aca Aserá, maye lquia'axaua naxa aca Jezabel.
So Elías qataq so la'aqtaxanaxanecpi so Baal
20Nache so Ajab, damaxasoxoneuga co'ollaxa 'enauac so Israel le'ecpi, qataq so na'aqtaxanaxanecpi, nache laỹonqa' naqa'en añi qasoxonaxa Carmelo. 21Nache so Elías nqo'oneua'a se'eso nhuo' le'ecpi, nache 'eeta':
¿Chaq lagui da qaỹa'axañiiñi da qoquiitegueto ne'enaua dos qarhuennataxacolli'? Cha'aye Ñim Nataxala', da nacheñi Ñim ỹoqta 'eesa Atamnaxala', qalaq nacheñi qome Ñim qoquiigue, qaq da nacheso so Baal, qalaq nacheso qoquiigue qome. Nache se'eso nhuo' le'ecpi ỹataqta qaica ca detaqa. 22Qaq so Elías nache queto'ot da detaqtac, 'eeta':
Qaq aỹem, qalaq nachaỹemta ño'onañi da aỹem la'aqtaxanaxanec Ñim Nataxala', qaq som Baal, qalaq cuatrocientos cincuenta na la'aqtaxanaxanecpi. 23Qaq ỹoqo'oye no'on da qomi' qanaviquiiua'alo caua dos huaca, nache 'oonolec ca taỹot namayepi da yaqto' ỹalauat, qataq ichecapigui camaye, ime nache ỹachalec ca 'epaqpi, qalaxaye saishet qome da ỹe'eraxatoigui ca norec. Qaq aỹem nataqa'en sechecapigui ca lỹa huaca, nache sachalec ca 'epaqpi, qalaxaye nataqa'en saishet da se'eraxatoigui ca norec. 24Huaña, nache qami' qauỹaxañiỹot qome nam qanatanaxala'aipi, qaq aỹem qalaq seỹaxanot Ñim Nataxala'. Qaq cam Atamnaxala' maye ỹasat da namaq ca norec, qache nacheca ca ỹataqta 'eesa Atamnaxala'. Nache 'enauac se'eso nhuo' le'ecpi, 'enapeco':
¡Aja', ỹaỹamaqchiguiñi da qonapec! 25Nache so Elías 'enapega so la'aqtaxanaxanecpi so Baal, 'eeta':
Qauacoñiiua'a ca 'oonolec caua huaca, nache qaua'aviiñi qome da qauo'oche camaye, cha'aye qami' qalotoiguilo. Ime, nache qauỹaxañiỹot ca qanatamnaxala'ai, qalaxaye saishet da 'eroigui qanqa'eñi ca norec. 26Nache somayepi ỹaconeua'a so huaca maye qoỹaneuo nache ỹo'ot, qaq nache chegoqchiguiña so nte'eta da iỹaxaatacot so Baal, nache choche ivitta'a so na'a'q laiñi da ñe'eguelaxattauec da, 'eeta':
«¡'Am Baal, ña qomi' 'auasategueta!» Nache somayepi queto'ot da dasottac, coleeta'asop aso nca'atoxonaxalate maye maiche lo'onata somayepi, qalaxaye qaica da huo'otaq huo'o ca qaỹa'axaỹa da ỹasateguet somayepi. 27Qaq co'ollaq mashe na'a'q laiñi, nache so Elías ỹe'eetalec somayepi, 'eeta':
Ỹataqta qana'axanñic da qara'alaxaqui, cha'aye camaye atamnaxala'. Qaq saiuena'a da deuennataxaatac, huo'otaq imelec ca lo'onatac, huo'otaq huenoxonec. ¡Qalqo' do'ochetaca, nache iuen da qanquetoxon! 28Nache somayepi queto'ot da ỹa'alaqtagui, qataq npelectala't ỹauota'a aso lataquiaxai, qataq so lainec, cha'aye maiche lataxac da la'amqaanataxanaxac somayepi, nache ivitta'a da ỹataqta nachelgui na ltago'q. 29Qalaxaye choche ivitta'a da napacalec so na'a'q laiñi da somayepi queto'ot da ỹa'alaqtai', qataq parenaxaatai', 'eeta'am na huo'o da aloic, ivitta'a so laloqo' da qoỹaneuo so nachetaqtaxanaxat, qalaxaye ỹataqta qaica ca qaỹa'axaỹa, huo'otaq da huo'o ca ỹasateguet somayepi. 30Huaña nache so Elías, 'enapega 'enauac so shiỹaxauapi, 'eeta':
Ñaq aỹem qanquiquiiua'a. Nache 'enauac so shiỹaxauapi nquigueua'a somaye, nache so Elías qaltaq no'oxoosheguem aso nca'atoxonaxalate maye lalamaqte Ñim Nataxala', maye mashe nlaguiñi co'ollaxa. 31Nache somaye ỹacona so doce coma'pi, ipacchigui naqa'en ye lcata so llalaqpi so Jacob, maye Ñim Nataxala' ỹanagui co'ollaxa da le'enaxat Israel. 32Nache do'onataxanalo soomaye da no'oxoosheguem aso nca'atoxonaxalate maye lalamaqte Ñim Nataxala'. Ime, nache ỹo'ot so lsherec coleesop aso nca'atoxonaxalate, qaq ye lcategue somaye, qalaq nalotagui ca veinte litros na ala na nañiguishec. 33Qaq ime, nache ỹachalec aso nca'atoxonaxalate so 'epaqpi, qataq ichecapigui so huaca, nache ỹachalec se'eso 'epaqpi. 34Huaña, nache 'enapeco':
Qauỹoqoiguilo qome ca 'etaxat caua cuatro naco'oña, nache qaucoyeelec ye ỹachetaqtaxanaxat, qataq ye 'epaqpi.
Ime, nache qaltaq damaxasoxoolec da qaicorelec asomaye, nache tres da qaỹe'eguelaxalec da qaicorelec. Qaq 'era da 'eetec somayepi. 35Qaq so 'etaxat ỹataqta ỹa'auat naua loiguiye aso nca'atoxonaxalate, nache ivitta'a da nlaqchigui so nsherec. 36Qaq co'ollaq ivita da qoỹaneuo so nachetaqtaxanaxat maye qaỹavigaxatta, nache so na'aqtaxanaxanec Elías, nquigueuo, nache 'eeta':
«¡'Am Nataxala' maye 'Am Natamnaxala' so Abraham, Isaac qataq so Israel, no'on nagui da 'auachaxan da nache 'Am Atamnaxala' ne'ena Israel, qataq da maiche aỹem 'aramaxashec, qataq so'ot 'enauac de'era, cha'aye maiche 'aramaxasoxonaxac! 37¡Ñaq aỹem 'auasateguet, 'Am Nataxala', aỹem 'auasateguet, yaqto' 'enauac ne'ena shiỹaxauapi ỹaỹaten da 'Am Nataxala', qataq 'Am Atamnaxala', qataq 'anshetaique da namayepi 'Am ỹe'eguelaxa!» 38Huaña, nache Ñim Nataxala' anacot so norec, nache ỹavigaxat so nachetaqtaxanaxat, qataq so 'epaqpi, ivira'a so coma'pi, qataq so namoxoỹaxa, qataq deqaxaỹañi naqa'en so 'etaxat maye huetangui so nsherec. 39Qaq co'ollaq ỹauaachigui de'era so shiỹaxauapi, nache ỹataqta ỹa'alyiñi naua l-llecte, qataq iviraxata'aguet naqa'en naua lata'pi na 'alhua, nache 'enapeco':
«¡Ñim Nataxala', nacheñi Ñim Atamnaxala', Ñim Nataxala', nacheñi Ñim Atamnaxala'!» 40Nache so Elías 'enapego' somayepi, 'eeta':
¡Ña qauacoñiiua'a na la'aqtaxanaxanecpi so Baal, yaqto' qaica ca qoỹetauec! Nache so shiỹaxauapi ỹaconeua'a co'ollaxa somayepi, nache so Elías ỹauegaxaama so la'auaxac le'enaxat Cisón, qaq nache huaña da icheguec na lqaicpi somayepi.
So Elías natamen da iỹaxanaique so auot
41Ime, nache so Elías 'enapega so Ajab, 'eeta':
'Aue, 'auque'e qome, qataq 'anỹom, cha'aye mashe cheta'aguet da l-lamaxa na auot. 42Nache so Ajab, queuo da deque'e, qataq nỹom. Qaq so Elías, nache tasheguema so ỹataqta pa'asheguem añi qasoxonaxa Carmelo, huaña nache ỹa'alyiñi naua l-llecte qataq ivira'aguet naqa'en naua l-llecte na lashec. 43Nache 'enapego' so lamaxashec, 'eeta':
Ña 'asheguema na pa'asheguem, nache 'auallelec aye auaxai.
Nache somaye tasheguema so pa'asheguem, nache dallelec aso auaxai, nache 'enapeco':
Qaica ca sela'a. Qalaxaye so Elías qaltaq 'enapega, 'eeta':
'Aue qome, nache siete da 'avi'eguelaxalec da 'auallelec aso auaxai. 44Qaq co'ollaq mashe siete da ỹe'eguelaq so lamaxashec somaye, nache 'enapeco':
¡Selota'aguet natai' lo'oc, lcatam na nhuaq lauel, chegoqchiguingui aye auaxai! Nache so Elías 'enapego' somaye, 'eeta':
'Aue qome, nache qonapega ca Ajab, da icoñiyiñi aca laigona nache queuo, ten qom iviralec na auot, nache nqanaxat qome camaye. 45Nache so Ajab, huenongui aso laigona, nache taỹa ye Jezrel. Qaq na piguem mashe naueguelec so lo'oc, nache ỹataqta napalñi, qataq huo'o so la'at, nache anac so ỹataqta lta'araic auot. 46Qalaxaye Ñim Nataxala', ỹanem da la'añaxac so Elías, ỹoqo'oye co'ollaq ime da ỹa'añaxatchiyiñi soua alogo, nache ỹataqta naloxo da taỹa ye Jezrel, nache hua'auñi da ivireuo co'ollaq saxanaxa da ivireuo so Ajab.
