So Ajab loxonec so Siiriopi
1Qaq so Ben Adad, maye lta'a so netaña ye Siria, laỹona't co'ollaxa 'enauac so nalleppi, qataq nnaicapegue' so treinta y dos nta'alpi, qataq so lalo caipi somayepi, qataq aso laigonapi maye nalaataxaquipi, nache taỹa ye Samaria da coleesop nache iloquiaxan. 2Huaña, nache ỹama'q soua lamaxa'she da taua'a se'eso huaqta'a't nỹecpi da 'enapega so Ajab, maye nta'a ye Israel, 'eeta': 3«So Ben Adad, 'eeta': ‹Aỹem, ỹalamaqte ana 'om plata, qataq oro, nataqa'en ana 'arhuapi, qataq na ỹataqta 'onaxaic 'aỹa'alaqpi.›» 4Nache so nta'a ye Israel, da lasataxac, 'eeta': «De'era 'ara'aqtac 'am nta'a maye ỹataxala', nachera da 'eetec da aỹem 'aralamaxat, qataq 'enauac nam ỹalamaxatpi.» 5Nache soua namaxa'she, qaltaq tareua'a co'ollaxa so nta'a Ajab, nache qaltaq 'eeta': «So Ben Adad, 'eeta': ‹Mashe 'am samaxa so ỹa'aqtac da aỹem 'aỹa'anem ana 'om plata, oro, 'arhuapi qataq na 'aỹa'alaqpi. 6Qaq ỹoqo'oye qonte', qom 'eeta'am nagui ye ñichiguiña añi nala', nache samaq na ỹamaxashecpi, da yaqto' imeten 'enauac na huetaiguipi na nma' lta'araic, qataq na lma'pi nam 'artauapi, nache ca ỹataqta 'onaxaic, ỹacona qome namayepi da ỹauo'o lalamaxat.›» 7Huaña, nache so nta'a ye Israel damaxasoxoneuga so nqueroxonecpi ye Israel, nache 'eeta':
Ña qauloỹa da que'eca shiỹaxaua nmittaique da aỹem ỹo'otec ca qauem, cha'aye iỹaxaneua'a da sanem ana ihuapi, ỹalaqpi, qataq da isallaxa, qalaq saishet da sa sashenem. 8Nache so nqueroxonecpi, qataq 'enauac so nhuo' le'ecpi, 'enapeco':
Saishet qome da 'aualaxaguet, huo'otaq da 'auo'ot ca 'eetapeguec. 9Huaña nache so Ajab, 'enapega so lamaxashecpi so Ben Adad, 'eeta':
Qoñiỹapega ca nta'a maye ỹataxala', da aỹem so'ot de'era hua'auchiguiñi lamaxasoxonaxac camaye, qalaxaye de'era dalaxaic la'aqtac saishet da so'ot qome.
Nache so namaxashecpi ira'a de'era na'aqtac so Ben Adad, 10nache so Ben Adad, qaltaq ỹamaxa da la'aqtac so Ajab, 'eeta': «¡Nam atamnaxala'pi, ỹataqta lta'araic naqa'en qome ca ñeuaxanaguec qom no'onañi ñaqa'en ca lta'araic lsoche na Samaria, da yaqto' sanem da ỹache ñi 'oonolec nam aỹem ca'attague'pi catai' nalotagui añi 'oonole napocna!» 11Nache so nta'a ye Israel, ỹasateguet somaye, 'eeta': «Saishet qome da 'aua'alaqtai' qom ñaq saxanaxa da 'auauegaxan.» 12Qaq so Ben Adad co'ollaq qaỹa'aqtaxanem de'era na'aqtac, nache somaye netaigui so npe'l da nỹomtague' so laỹe nta'alpi, huaña nache 'enapega so nalleppi, 'eeta': «Ña qanaỹamaxache.» Nache somayepi naỹamaxat co'ollaxa da iloquiaxan se'eso huaqta'a't nỹecpi. 13Qaq huo'o co'ollaxa so na'aqtaxanaxanec da taua'a so Ajab, maye lta'a so Israel le'ecpi, nache 'eeta':
«Ñim Nataxala', 'eeta' da la'aqtac: ‹¿Peta'a 'aulota'a ne'ena qalota shiỹaxauapi? Namayepi 'am sanem da 'oxonec nagui, yaqto' 'auaỹateeta da nachaỹem Nataxala'.›» 14Nache so Ajab 'enapeco': ¿Qaq ca 'eeteco' da aỹem 'aỹa'anem da ỹoxonec namayepi?
Nache so na'aqtaxanaxanec 'enapeco': Ñim Nataxala', 'eeta': Qomye chegoqchigui ñaqa'en na lamaxashecpi na llalaqpi na nta'alpi.
Nache so Ajab qaltaq, 'eeta': Qaq ¿negue't ca hua'au qome da deloquiaxanataxan? Nache somaye 'enapeco': Qomye nache 'am. 15Nache so Ajab, naloguiñi naqa'en co'ollaxa so lamaxashecpi so nta'alpi, maye ivi' doscientos treinta y dos. Qataq naloguiñi naqa'en 'enauac so alleppi Israel le'ecpi maye ivi' siete mil ỹalleppi. 16Nache somayepi inoxonec so na'a'q laiñi, qaq so Ben Adad qataq so treinta y dos nta'alpi maye naỹa co'ollaxa somaye da yaqto' itauan, ñaq taxaicpi netaigui so lpe'l da nỹomtega'tpi. 17Nache so lamaxashecpi so nta'alpi hua'autec co'ollaxa. Qaq so lamaxashec so Ben Adad co'ollaq da'aqtaxanem somaye, da huo'o so alleppi chegoqta'a ye Samaria da naỹa'a somayepi, 18nache somaye, 'eeta': «Na'aictoxo' da nachetac da nlagaxayec, huo'otaq da anac da deloqui camayepi, qalaxaye nca'altauec qanqa'eñi qom qoroxoñiqui camayepi.» 19Qaq co'ollaxa inoxonec so lamaxashecpi so nta'alpi chegoqteua'a so huaqta'a't nỹecpi, nache hua'auta qanqa'en, qaq so alleppi nache ca'attaueegue somayepi. 20Nache ñi 'oonolec somayepi ỹalauat ñi 'oonolec mpa'aguenaxaua, nache so siiriopi datauec, qaq so Israel le'ecpi, qalaq nache icaatac somayepi. Nache so Ben Adad nelec so caaỹo da datauec, qataq huo'o so lỹatec nalleppi maye netalec so caipi. 21Qalaxaye so nta'a ye Israel icaalec somayepi, nache ỹalauat so alleppi maye netalec so caipi, qataq ỹacona so caipi qataq aso naigonapi maye nalaataxaqui somayepi, huaña nache ỹataqta noxonec co'ollaxa so siiriopi. 22Ime, nache so na'aqtaxanaxanec qaltaq nachaateua'a so lta'a so Israel le'ecpi, nache 'eeta':
'Aue, nache naỹamaxat qome 'anqa'en ca 'analleppi, qataq 'auaỹamaxatchiguiñi da 'auennataxaalec da 'alapaxañi ca 'anshetaique da 'auo'ot, cha'aye na lỹa vi'i maye natauo, nache qaltaq 'am ñe'eguelaxa qome da 'am iloquiaxan so nta'a ye Siria. 23Qaq so ltauapi so nta'a ye Siria 'enapego' so nta'a, 'eeta':
Na natamnaxala'pi na Israel le'ecpi, namayepi qasoxonaxa le'ecpi, ỹoqo'oye ishet da qomi' naue'c namayepi, qalaxaye da huaña ñaqa'enaq ye nalochiguiñi 'alhua da seloquiaxai', nache yo'oqta da ñauegaq qome. 24Qaq ỹoqo'oye ñi 'oonolec na nta'alpi 'anqateeguesop qome da lo'onataxanaxac, nache de'era lo'onataxanaxac namayepi talec 'anqa'en na lataxala'pi na alleppi. 25Nache 'auauo'o ca dalaxaic 'analleppi, 'eeta'am 'anqa'en so hua'auñi 'analleppi maye qanauec, qataq 'auo'ot aca dalaxai naigonapi qataq 'auauo'o ca caipi. Qaq da ime, nache huaña ñaqa'enaq ye nalochiguiñi 'alhua da seloquiaxai' namayepi. Qaq yo'oqta da ñauegaq qome.
Nache so Ben Adad ỹaỹamaxareeta de'era nache ỹo'ot co'ollaxa damaye. 26Qaq co'ollaq ivirec so 'oonolec vi'i, nache so Ben Adad naloqna't so nalleppi. Ime nache jec, taỹa ye Afec da yaqto' nalaate' so Israel le'ecpi. 27Qaq so Ajab nataqa'en naloqna't so alleppi Israel le'ecpi, nache ỹanem so aloq da yaqto' ỹache, nache ca'ateguet so siiriopi. Nache so Israel le'ecpi ỹa'ayiñi so lpe'lpi da hua'a so datatta so siiriopi, qaq somayepi ỹataqta saq 'amaqtaq 'eeta'am aca nlo quetaqpiole ye hueta'a, qaq so siiriopi qalaq ỹataqta imattalec se'eso 'alhua. 28Huaña, nache so la'aqtaxanaxanec Ñim Lo'onatac 'Enauacna, 'enapega so nta'a ye Israel, 'eeta':
Ñim Nataxala', 'eeta': «Qaq souaxat da na siiriopi 'eeta' da la'aqtac: ‹Ñim Nataxala' maye Atamnaxala', Ñimaye qasoxonaxa le'ec, saishet da netaña na ca'amapega'tpi, ỹoqo'oye 'am sanem da 'oxonec namayepi, yaqto' 'auaỹateeta da Aỹem, nachaỹem Nataxala'.›» 29Qaq nache siete na'axa'te da so siiriopi qataq so Israel le'ecpi, datata'a't, hueta'alo so netaña so lpe'lpi, qaq co'ollaq ivita se'eso na'a'q siete, nache deloguiỹa't. Nache se'eso na'a'q so Israel le'ecpi ỹalauat so cien mil alleppi siiriopi, maye petañepi co'ollaxa. 30Qaq so laỹepi se'eso alleppi, nache datauec co'ollaxa taỹa ye Afec, qalaxaye so lpaqtaxat se'eso huaqta'a't nỹecpi, hua'axalec co'ollaxa se'eso veintisiete mil ỹalleppi maye datauecpi. Qaq so Ben Adad maye nataqa'en datauec co'ollaxa, nache ỹe'egueneua'a se'eso huaqta'a't nỹecpi, nache ỹataqta tateua'alo so nỹecpi da nqañoxottapiguiñi. 31Nache so lamaxashecpi somaye, 'enapeco':
«Saỹatenaq da na nta'alpi Israel le'ecpi, ỹataqta choxonnataxanaxaicpi. Ỹoqo'oye sanaxañi qome na sansatta nogoxot, qataq secoñeraqot na qarqosot ca nañec, nache ñeqo'onaxa ca lta'a na Israel le'ecpi, shapegueto' qom 'am ichoxoren, nache 'am nca'alaxattauec.» 32Nache somayepi ỹaañi so sansatta nogoxot, qataq icoñero'oto naua lqoso'oche so nañec, nache taua'a so lta'a so Israel le'ecpi, nache 'eeta':
So 'aramaxashec Ben Adad 'am nachoxoreetacot da 'auchoxoren da nachaalataxac. Nache so Ajab, 'enapeco': ¿Qache nca'altauec camaxa? ¡Camaye maiche iqaỹa! 33Nache se'eso ỹalleppi co'ollaq hua'axaỹa de'era, nache machiguiñi, nache sa naỹaloxon, da 'eeta':
So 'arqaỹa Ben Adad, somaye nca'altauec.
Nache so Ajab, 'enapeco': Ña qanaviquiiuo qome camaye.
Huaña nache so Ben Adad taua'a co'ollaxa so Ajab, nache so Ajab inotaxanaxangui somaye aso nnaigona. 34Nache so Ben Adad, 'enapeco':
Aỹem, 'am she'eguelaxatot qome ye huaqta'a't nỹecpi maye so ita'a deuotaxanec co'ollaq nhuo' so 'arta'a. Qaq 'am, nache ishet da 'aỹa'anaña ye Damasco ca nmenaqa' na 'armenecpi, 'eeta'am da 'eetec so ita'a co'ollaq ỹanaña ye Samaria so nmenaqa' so lmenecpi.
Nache so Ajab 'enapeco': Qaq souaxat da aỹem 'anaỹamaxate' nagui, nache aỹem, 'am saxanec da qojec.
Qaq co'ollaq ime da naỹamaxate' somaye, nache ỹaxanec da jec. 35Qaq huo'o co'ollaxa som chegoxoguet som na'aqtaxanaxanecpi, 'enapega so lỹa, 'eeta':
Qaq cha'aye lamaxasoxonaxac Ñim Nataxala', nache aỹem 'auaxan nagui. Qalaxaye se'eso lỹa, sa nashen da iuaxan somaye. 36Nache so na'aqtaxanaxanec 'enapeco': Qaq souaxat da saishet da 'aualaxaguet Ñim Nataxala', nache qom choche aỹem qoca'ai, nache 'am ito qome ca llon. Nache co'ollaq choche jec se'eso lỹa, nache anac so llon nache ỹalauat. 37Ime, nache so na'aqtaxanaxanec qaltaq natena'aguet co'ollaxa so lỹa ỹale, nache nataqa'en iỹaxanot da iuaxan somaye, nache se'eso ỹale ỹalaxaguet, nache iuaxan qataq ique'emaqchet. 38Huaña, nache se'eso na'aqtaxanaxanec jec co'ollaxa, tauga so nqa'aic da iuata'aguet so nta'a, nache ỹauo'o so ỹaxachiguilo naua la'ai'te. 39Qaq co'ollaq nateuga yi'iye so nta'a, nache so na'aqtaxanaxanec ỹataqta nqaqaañi, 'eeta': Ne'ena 'aramaxashec co'ollaq ỹalectaigui so alaataxac, nache anac so 'oonolec se'eso alleppi, aỹem nauega so loxonec, nache 'eeta': 'Aulo'ogue qome ne'ena ỹale, cha'aye da 'etauec namaye, nache naiguet ñaqa'en da 'anachaalataxac, huo'otaq 'ausheeten aca tres mil aca lcatpiole plata. 40Qaq souaxat da ỹaqa'a so ime'eguet ne'ena 'aramaxashec, nache se'eso ỹale maye noxonec co'ollaxa datauec. Nache so nta'a ye Israel, 'enapeco':
Qaq de'era, maiche 'anhuaxanaguec, cha'aye maiche 'aua'axat dam 'arasouaxashet. 41Qalaxaye so na'aqtaxanaxanec, sa naỹaloxon da nqat so laxataxat naua la'ai'te, nache so nta'a ỹauatton da somaye na'aqtaxanaxanec. 42Nache so na'aqtaxanaxanec, 'eeta':
«Da la'aqtac Ñim Nataxala', 'eeta': ‹Qaq souaxat da 'axanec da datauec se'eso shiỹaxaua maye taỹa'a ñaqa'en da l-leuaxa, nache nagui lasheue ñaqa'en da 'anachaalataxac da nachaalataxac somaye, qaq na lauo' le'ecpi somaye, qalaq naiguet ñaqa'en na 'aralamaxatpi.›»
43Ime, nache so nta'a jec, taỹa ye Samaria, qalaxaye dalemata, qataq daquico.
