Da 'eetec da lo'onataxanaxac so nta'a Salomón
1So Salomón ilotague' co'ollaxa 'enauac so Israel le'ecpi. 2Qaq 'ena na le'enaxatpi so ltauapi somaye:
Azarías, som llalec so ntaxaỹaxanaxanec Sadoc, 3Elijoref qataq Ajías, som llalqa so Sisa, som neraxanaxanaqa, qataq so Josafat, som llalec so Ajilud maye leraxanaxanec so nta'a, 4Qataq so Benaías, som llalec so Joyadá, maye lataxala' so alleppi, so Sadoc qataq Abiatar maye ntaxaỹaxanaxanaqa. 5Qataq so Azarías, som llalec so Natán, maye lataxala' na nta'alpi, qataq so Zabud, som llalec so Natán, maye ntaxaỹaxanaxanec qataq ỹanem naxa na lqataxacpi so nta'a, 6Qataq so Ajisar, maye ilotague' so nma' lta'araic, qataq so Adonirán, som llalec so Abda, maye ilotague' na no'onatacpi. 7Nache so Salomón, doce so ltauapi maye ilotague' 'enauac so netaña ye Israel, qaq somayepi nacheso so huetague' so nta'a qataq so llalaqpi. Nache ñi 'oonolec ca'agoxoic ye vi'i, somayepi iuen da ñi 'oonolec ndoua'a na lhuenecpi somayepi, nache qaica ca iueetaique naqa'en. 8Qaq 'ena na le'enaxatpi se'eso nta'alpi:
Ben Jur, som ilotague' so netaña aye qasoxonaxapi ye Efraín, 9qaq so Ben Decar, ilotague' so netaña ye Macás, Sagalbín, Bet Semes, Elón qataq ye Bet Janán, 10qaq so Ben Jésed, ilotague' so netaña ye Arubot, Soco qataq 'enauac ye 'alhua Jéfer, 11qaq so Ben Abinadab, ilotague' 'enauac ye Dor, qaq aso lhua le'enaxat Tafat, asom llale so Salomón, 12qaq so Baná, som llalec so Ajilud, ilotague' ye Tanac, Meguido, qataq 'enauac ye Bet Seán maye saqaỹapeque ye Saretán ye npa'aỹañi ye Jezrel, chegoqchiguiña ye Bet Seán nache ivitta'a ye Abel Meholá yem pa'aicra'a ye Jocmeán, 13qaq so Ben Guéber, ilotague' so netaña ye Ramot yem huaigui ye 'alhua Galaad, qataq so huaqta'a't nỹecpi maye lalamaxat so Yaír, som llalec so Manasés, maye nataqa'en huaigui ye 'alhua Galaad, nataqa'en ilotague' ye Argob maye huaigui ye 'alhua Basán, yem 'alhua maye nataqa'en naña so sesenta huaqta'a't nỹecpi maye huo'o na lpaqtaxatpi, qataq so lasompi somayepi lvinaxat na lcat bronce, 14qaq so Ajinadab, som llalec so Iddo, ilotague' so netaña ye Majanayin, 15qaq so Ajimaz, ilotague' so netaña ye Neftalí, qaq somaye lhua co'ollaxa aso Basemat, asom llale so Salomón, 16qaq so Baná, som llalec so Jusay, ilotague' so netaña ye Aser qataq ye Alot, 17qaq so Josafat, som llalec so Paruaj, ilotague' so netaña ye na'alhua so Isacar, 18Qaq so Simea, som llalec so Elá, ilotague' so netaña ye na'alhua so Benjamín, 19qaq so Guéber, som llalec so Uri, ilotague' so netaña ye 'alhua Gad, yem na'alhua co'ollaxa so Sijón maye lta'a so amorreopi, qataq so Og, maye lta'a co'ollaxa so netaña ye Basán, qaq somaye nachesota co'ollaxa da ilotague' se'eso 'alhua.
Da laỹaanec qataq da lsallaxa so Salomón
20Qaq so Judá le'ecpi qataq so Israel le'ecpi ỹataqta qalota co'ollaxa, 'eeta'am na coma' lsoche maye hueto'ot na loigue aso auaxai. Qaq 'enauac da deque'etac, nỹomtac qataq ỹataqta machiguiñi. 21Qaq so Salomón, nache ilotague' 'enauac yi'iye 'alhua, chegoqchiguiña ye Éufrates, ivitta'a ye na'alhua so filisteopi, qataq ivitta'a ye loga't ye 'alhua Egipto. Qaq se'eso nta'alpi somayepi, nache irotega co'ollaxa na lachetaqtaxanaxatpi, qataq nache do'onataxaatacot so Salomón, 'enauaque soua na'axa'te co'ollaq ña nca'altauec somaye. 22Qaq so iuen ye na'a'q so Salomón, ivi' seis mil seiscientos kilos na ỹataqta no'on 'ayiiña, qataq trece mil doscientos nam choche la'axaiguetto 'ayiiña. 23Qataq diez so huacapi maye ỹataqta chaxaraicpi, qataq veinte so huacapi maye qaiquia'axaateguec na 'auaqpi maye ichaqchet somayepi, qataq cien aso qaguetapi, qataq sa qanaloqten aso chegaxangopi, nauenecpi, ñi'imshepi qataq so maỹopi maye ỹataqta chaxaraipi. 24Qaq so Salomón imauec da ilotague' yi'iye 'alhua, yem pa'aigue da nala' lliguisheguem so tala Éufrates, chegoqchiguiña ye Tifesaj, nache ivitta'a ye Gaza. Qaq ỹataqta huo'o da nlagaxayec 'enauac yi'iye 'alhua. 25Qaq 'enauaque soua na'axa'te maye huetoiguilo da lo'onataxanaxac so Salomón, da 'enauac so Judá le'ecpi qataq so Israel le'ecpi, chegoqchiguiña ye Dan, nache ivitta'a ye Berseba da ỹataqta ỹe'emaqtac, cha'aye ỹataqta maiche naỹamaqta'ac ana lañiguishepi uvapi qataq higopi. 26Nache so Salomón, ivi' cuatro mil aso laỹe'pi so lalo caipi maye lauegaxala' aso laigonapi, qataq doce mil so alleppi maye nnotaxala' so caipi. 27Qaq se'eso doce nta'alpi, ye 'oonolec ca'agoxoic, nache huaigui da do'onataxan ñi 'oonolec somayepi, nache qaica ca qoue naqa'en so nta'a Salomón, qataq 'enauac som lquia'axauapi somaye da datalec so lquia'axala'. 28Qaq naxa da ivira ye laloqo' da do'onataxan ñi 'oonolec somayepi, nache iroua'a so hueta'a so Salomón, na cebada, qataq na 'auaqpi maye aloq so caipi, qataq so laỹepi nauegaxanaxala'pi. 29Qaq Ñim Lo'onatac 'Enauacna, ỹanem so Salomón da laỹaanec qataq na laỹaanataxanaxacpi, qataq qalota da lauattonaxanaxac, 'eeta'am na coma' lsoche maye huo'ot na loigue aso auaxai. 30Qaq da laỹaanec so Salomón ỹataqta napacalec so ỹaanaxanaxaicpi maye lma' da pa'aigue da nala' lliguisheguem qataq so Egipto le'ecpi. 31Qaq somaye ỹataqta ỹaanaxanaxaic, napacalec so laỹepi shiỹaxauapi, napacalec da laỹaanec so Etán maye chegoxoguet so Zeraj, qataq so Hemán, Calcol, qataq so Dara, som llalqa so Majol. Qaq ỹoqo'oye da llo'oxoyec so Salomón, ivira'alo 'enauaque naua hueta'alo so ỹotta'a't shiỹaxauapi. 32Qaq somaye ivi' tres mil som ỹa'ara't la'aqtacpi, qataq mil cinco som ỹo'ot lo'onecpi. 33Nataqa'en ỹa'axattac ana qo'oipaqpi, chegoqtot naqa'en ana cedro maye naña ye Líbano, nache ivitta'a ana hisopo maye ñaxaalec so npaqtaxanaxat coma'. Nataqa'en ivira'a da ỹa'axattac na shiguiỹacpi, maỹopi, qataq nam hualectapigui'pi, qataq na nỹaqpi. 34Qaq 'enauac so ỹotta'a't shiỹaxauapi qataq so nta'alpi maye ilotague' so 'alhuapi, som hua'aqteguelec co'ollaxa de'era laỹaanec so Salomón, ỹauo'o co'ollaxa so lamaxashecpi da taỹa somaye, da yaqto' na'axaỹaxana naqa'en de'era laỹaanec somaye.
