So Salomón naỹamaxate' so Jirán
1Qaq so Jirán, maye lta'a so netaña ye Tiro, somaye ỹataqta nauochaxaua co'ollaxa so David, qaq ỹoqo'oye co'ollaq ỹaỹaten da so Salomón qoỹanagui da lo'onataxanaxac so lta'a David, nache ỹamaxa somaye so ltaxaỹaxanaxanecpi. 2Nache so Salomón ỹamaxa da la'aqtac so Jirán, 'eeta': 3'Am, 'auaỹateeta da so ita'a David, saishet co'ollaxa da nauaxaỹaxaasheguem aca atamnaxaqui da yaqto' qaỹo'oxoren Ñim Nataxala', souaxat da nalaataxac co'ollaxa somaye, qaq ivitta'a da Ñim Nataxala' ỹanem da loxonec so mpa'aguenaxauapi somaye. 4Qalaxaye nagui Ñim Nataxala' maye Ñatamnaxala', qomi' ỹanema da qal-lagaxayec da ñeuoonaqte' 'enauac nam pa'aiguelo nam shiỹaxauapi. Qaq cha'aye qaica ca ñepa'aguenaqtague' nache saishet da sho'oqtaique ca qauem. 5Qaq ỹoqo'oye nagui, iuennataxa da ño'oxoosheguem aca atamnaxaqui da yaqto' qaỹo'oxoren Ñim Nataxala' maye Ñatamnaxala', cha'aye nachera da la'aqtac Ñimaye maye ỹanem co'ollaxa so ita'a David, 'eeta': «Cam 'aỹa'alec maye talec qome ñaqa'en da 'aro'onataxanaxac da nta'a, nacheca qome ca nauaxaỹaxaasheguem que'eca nỹec da yaqto' Aỹem qaỹo'oxoren.» 6Qaq ỹoqo'oye nagui, 'auamaxasoxoolec qome da qaiquesoq ana qo'oipaq cedro maye huaña ye Líbano. Qaq na ỹamaxashecpi samaq qome da itauan ca 'aramaxashecpi, qaq maicheye aca 'auỹaxanaique lasheue ca 'aramaxashecpi, nachaca qome aca 'am sanem da sesheeten camayepi, cha'aye 'auaỹaten da na souaqta'a qomi' qaica ca ỹaỹaten da ỹo'ot na 'epaq, da 'eeta'am na sidooniopi. 7Qaq so Jirán co'ollaq hua'axaỹa de'era la'aqtac so Salomón, nache ỹataqta machiguiñi, nache 'eeta': «¡Ỹataqta qaỹo'oxoren nagui Ñim Nataxala', cha'aye ỹanem so David ñi 'oonolec llalec maye ỹataqta ỹaanaxanaxaic, da ilo'ogue ne'ena nhuo' le'ecpi maye ỹataqta qalota!» 8Huaña nache so Jirán ỹamaxa da la'aqtac so Salomón, 'eeta':
«Aỹem, mashe saconeguet da aỹem 'anamaxa 'ara'aqtac, qaq sepacchigui qome da so'ot damaye, nache 'am samaxa ca 'auỹaxanaique 'epaqpi cedro qataq pino. 9Nache na ỹamaxashecpi ỹachegoxotchiguiña qome ñaqa'en ye Líbano da iraxaama aso auaxai que'eca 'epaqpi. Nache ỹaxara't da yaqto' quetangui naqa'en na 'etaxat, da ỹauega cam 'ecapiguiña, qaq nache huaña camaye da qaisogui nache 'auacona. Qaq 'am, no'on qome da 'aupacchigui da 'anamaq ca nallec, da yaqto' aloq na hueta'a na ima' maye ỹo'onataxanaqa'.» 10Nache so Jirán, ỹamaxa so Salomón 'enauac so 'epaqpi maye chegaqaigui na cedro, qataq pino maye iỹaxanaique co'ollaxa somaye. 11Qaq so Salomón, qalaq nache 'enauaque soua vi'iye co'ollaxa da ỹamaqtega na nallec so Jirán, da yaqto' aloq so netaña so lma' maye lo'onataxanaqa'. Qaq 'ena na lcata so ỹamaq naxa somaye: cuatro millones cuatrocientos mil kilos so trigo, qataq cuatro mil cuatrocientos litros so ỹataqta no'on lli'i ana Olivo. 12Qaq 'era da 'eetec Ñim Nataxala' da ipacchigui so la'aqtac maye ỹachaxanapeguem co'ollaxa so Salomón, da ỹanem da laỹaanec. Nache so Jirán qataq so Salomón, ỹo'o't co'ollaxa da naỹamaxataxa'c, nache ỹataqta huo'o da l-lagaxaye'c soomaye. 13Huaña nache so nta'a Salomón, lapaxañi da lataxac da lo'onataxanaxac, nache ỹamaq da do'onataxan so treinta mil ỹalleppi Israel le'ecpi. 14Qalaxaye nqo'onaxattagui da ỹamaxa ye Líbano, ye 'oonolec ca'agoxoic ỹamaq so diez mil, qaq yi'iye 'oonolec ca'agoxoic nache hueta'a ye Líbano da do'onataxaatac. Ime, qaltaq dos ca'agoxoiqa da hueta'alo naua lma'ate. Qaq so ilotague' de'era lo'onataxanaxac somayepi, le'enaxat Adonirán. 15Qaq so Salomón nataqa'en ỹauo'o so setenta mil ỹalleppi da iỹoqtac so no'onataxanaxatpi, qataq ochenta mil so ichectac so coma', hueta'a añi qasoxonaxa, 16qataq tres mil trescientos so ilotague' da no'onataxanaxac, qataq som 'onataxanaxaicpi. 17Nache so nta'a damaxasoxoolec da qairouo so lta'araicpi coma', qataq ỹataqta no'on, qataq som qaichecta coma'pi da yaqto' lo'oxonaxala' qanqa'en aso atamnaxaqui. 18Qaq so lo'onataxanaxanec nỹec lo'opi so Salomón qataq so Jirán, qataq so Gebal le'ecpi, nacheso so ichectac co'ollaxa so 'epaqpi qataq so coma'pi, da yaqto' qano'oxoosheguem aso atamnaxaqui.
