Ñim Lo'onatac 'Enauacna naỹamaxate' so Salomón
1Qaq so Salomón co'ollaq imat da no'oxoosheguem aso atamnaxaqui maye lalamaqte Ñim Nataxala', qataq so maiche lma', qataq 'enauac som laỹepi maye ỹo'otpi somaye, 2nache Ñim Nataxala' qaltaq nachaxana somaye, 'eeta'am co'ollaq nachaxana huaña ye Gabaón, 3nache 'eeta':
«Aỹem, sa'aqchigui so 'anqouagaxaunaxac qataq so 'anachoxonnaxac. Qaq ana'ana atamnaxaqui maye 'ano'oxoosheguem, anamaye seỹotauga da yaqto' nache hueta'a qome da ỹe'enaxat, qataq nache 'eetai'salo naua na'axa'te da huetalec da imeenaxanaxac, qataq da iquiyaqteỹaxac. 4Qaq 'am, da 'ano'onaxat da 'arataxac da 'eeta'am co'ollaxa so 'arta'a David, da ỹataqta nalochiguiñi da lquiyaqteỹaxac, qataq ỹaỹamaqchiguiñi da lataxac, nache da ỹataqta 'auo'ot na 'am samaxalecpi, qataq 'aualaxagueta naua iqataxaco, qataq naua llapaxayiñi lataxaco, 5nache Aỹem saishet qome da seraxanai' da 'aro'onataxanaxac, da 'am nta'a da 'aulo'ogue na Israel le'ecpi, nache sepacchigui so ỹa'aqtac maye sanem co'ollaxa so 'arta'a David, co'ollaq sheeta': Saishet da saqca ñaqa'en qome ca 'oonolec na 'aỹa'alaqpi da nso'ongui añi so'onaxaqui da ilo'ogue na Israel le'ecpi. 6Qalaxaye qami' qataq na qaỹa'alquipi da Aỹem qoquiỹa'ai, qataq da saishet da qaualaqaigueta naua ỹamaxasoxonaxaco, qataq naua iqataxaco maye qami' sanema, maye nacherata da qanqo'oñiỹa na ỹaqa'a atamnaxala'pi nache qanatamñiitacot, 7nache Aỹem, ñeqateeguesop qome na Israel le'ecpi ne'ena 'alhua maye sanem co'ollaxa. Qaq ana'ana atamnaxaqui maye seỹotauga co'ollaxa da yaqto' hueta'a da ỹe'enaxat, qalaq sheca'ai qome, huaña nache na ỹotta'a't shiỹaxauapi ne'eetapigui qome na Israel le'ecpi. 8Qaq ana'ana atamnaxaqui nlachiguiñi qome, nache choche lapootasheguem, qaq da huo'o ca nlectot nache huo'o da la'aalaxa qome, nache denataxaatac, 'eeta': ¿Chaq ta'ainco' Ñim Nataxala' da 'eetec de'era ne'ena 'alhua, qataq aso atamnaxaqui? 9Nache qaỹasateguet qome, qoỹeeta': ‹Qomye namayepi ca'ai Ñim Nataxala', Ñim Natamnaxala' maye nqateeguesop co'ollaxa ye Egipto som hua'au lta'alpi namayepi, nache ca'ata da natamnot na ỹaqa'a atamnaxala'pi, ỹoqo'oye Ñim Nataxala' talec naqa'en da qauem namayepi.›»
Nam laỹepi ỹo'otpi so Salomón
10Qaq ivi' soua veinte vi'iye co'ollaxa, da so Salomón no'oxootapiguisheguem aso atamnaxaqui maye lalamaqte Ñim Nataxala', qataq so lma' lta'araic maye lo'onataxanaqa' somaye, 11qaq so Jirán, maye lta'a so netaña ye Tiro, ye ỹanem co'ollaxa so Salomón so qalota 'epaqpi cedro, qataq pino, qataq so qalota oro maye iỹaxanaique somaye. Nache so nta'a Salomón, ỹanem co'ollaxa so Jirán so veinte huaqta'a't nỹecpi maye ỹotta'a't naua nañalo ye Galilea. 12Qalaxaye so Jirán, co'ollaq chegoqchiguiña ye Tiro da demeenaxana se'eso huaqta'a't nỹecpi maye ỹanem co'ollaxa so Salomón, nache somaye sa nqopita, 13nache 'enapeco':
«'Am ỹaqaỹa, ¿ta'ainco' da aỹem 'aỹa'anem ne'ena huaqta'a't nỹecpi maye ỹataqta qauem?» Ỹoqo'oye ỹanagui da Cabul, yi'iye 'alhua nache ivitta'a nagui da le'enaxat de'era. 14Qaq asa'aso oro maye so Jirán ỹamaxa co'ollaxa so nta'a Salomón, ivi' tres mil novecientos sesenta kilos. 15Qaq se'eso qapa'atta no'onatacpi maye damaxasoxoolec co'ollaxa so nta'a Salomón, nacheso so huo'omshe laỹona't so 'onataxanaxaicpi da ỹo'ot aso atamnaxaqui maye lalamaqte Ñim Nataxala', qataq so lma' lta'araic maye lo'onataxanaqa' somaye, qataq so nqa'aic lta'araic maye qaimeelec, qataq so lpaqtaxanaxat ye Jerusalén, qataq ye huaqta'a't nỹecpi ye Jazor, Meguido qataq ye Guézer. 16Qaq so faraón, maye nta'a ye Egipto, somaye iloquiaxan co'ollaxa, nache loxonec so huaqta'a't nỹecpi ye Guézer, nache ỹavigaxat, qataq ỹalauat so cananeopi maye netaigui co'ollaxa somaye. Qaq co'ollaq qaỹoqtegue nache somaye ỹanem da nme naqa'en aso llale maye lhua so nta'a Salomón. 17Qaq ỹoqo'oye so Salomón qaltaq no'oxoosheguem so Guézer, Bet Jorón maye npa'aỹañi, 18qataq Baalat qataq ye Tamar maye naña ye toolec 'alhua ye Judá. 19Qaq so Salomón nataqa'en no'oxoosheguem so huaqta'a't nỹecpi, da yaqto' naỹamaqtaxanaqa' da qaỹaỹamaxat na nallec, qataq ỹo'ot so lma'pi aso naigonapi maye alaataxaquipi, qataq so caipi, qataq 'enauac so laỹepi maye no'oxoosheguem somaye, maye naña ye Jerusalén qataq ye Líbano, qataq 'enauac so 'alhuapi maye ilotague' somaye. 20Qaq 'enauac so nhuo' le'ecpi maye no'onaña co'ollaxa yemaye, som amorreopi, hitiitapi, ferezeopi, heveopi, qataq so jebuseopi, maye saishet da Israel le'ecpi, 21qataq som chegoxoguetpi somayepi maye no'onalec se'eso 'alhua, maye so Israel le'ecpi sa ỹañoxot co'ollaxa da nmatchiguiñi da ỹalauat, nache so Salomón ỹamaxalec somayepi na no'onatac maye ỹataqta qapa'atta, qaq choche ivitta'a nagui. 22Qalaxaye so Salomón, saishet da huo'o ca ỹaneguet da nlatac so Israel le'ecpi, nachaqrata da ỹauo'o nalleppi somaye, qataq huo'o so ltauapi, qataq ỹauo'o so huataxanaq lta'alpi, qataq so lataxala' so alleppi maye netangui aso alaataxaquipi naigonapi, qataq som netalec so caipi. 23Qaq so Salomón ỹauo'o so ilotague'pi, qataq nauaatalec som no'onatacpi, qaq somayepi ivi' quinientos cincuenta, qaq somayepi nache ilotague' som shiỹaxauapi maye do'onataxaatac. 24Qaq aso llale so faraón, co'ollaq ca'ai so huaqta'a't nỹecpi maye lalamaxat so David, da yaqto' nqochena so lma' lta'araic maye no'oxoosheguem co'ollaxa so Salomón da lalamaxat naqa'en asomaye, nache somaye imeelec so pa'aỹa'ague da nala' lliguisheguem so huaqta'a't nỹecpi. 25Qaq ye 'oonolec vi'i, nache so Salomón tres da ỹe'eguelaxalec da ỹaneuo ana lachetaqtaxanaqte qaỹavigaxatta, qataq ana qanhuaachigui, ỹachalec naxa aso nca'atoxonaxalate maye no'oxoosheguem somaye da yaqto' lalamaqte Ñim Nataxala', qataq nataqa'en ỹavigaxat naxa so nchenaxanaxat, huaña so lanataqa' Ñim Nataxala'. Qaq 'era da 'eetec co'ollaq ime da qano'oxoosheguem aso atamnaxaqui.
26Qaq so nta'a Salomón nataqa'en ỹo'ot co'ollaxa aso notaxaquipi da qanayiguingui na 'etaxat, huaña ye Ezión Guéber, maye huaqta'ai' ye Elat, yem loigue aso Auaxai Togaxarai, ye 'alhua Edom. 27Qaq so Jirán, ỹamaq co'ollaxa so lamaxashecpi, maye ỹataqta ỹaỹaten da ñiguingui asa'aso notaxaquipi, qataq ỹaỹaten da quetangui na 'etaxat, nache nnaictague' so lamaxashecpi so Salomón, 28nache somayepi taỹa ye Ofir, yem ỹachegoxotchiguiña da ỹache so catorce mil kilos so oro, nache ira'a so nta'a Salomón.
