So Samuel icorelec so Saúl da ỹanagui nta'a
1Nache so Samuel ỹacona aso ncoraxanaqte maye laỹe' so aceite, nache icorelec na lqaic so Saúl, ime, qaq napigoxoi' nache 'enapega, 'eeta':
Ñim Nataxala', 'am lca'aguishec nagui da yaqto' 'aulo'ogue na lalamaxat nhuo' Israel le'ecpi. 2Qaq nagui qom choche aỹem qoca'ai, nache 'anatena'agueta qome caua dos ỹale't qom huaña ye Selsa, yem sa qaỹapeque añi nhuachiqui aso Raquel, maye huaigui ye na'alhua so Benjamín. Nache caamaye 'am da'aqtaxaarem qome da mashe qaỹanata aca 'ashenapi maye 'anmittaique, qataq cam 'arta'a mashe saishet da ỹoqochetaique acamayepi, nda'a't da qami' qochetrapigui, qataq sa ỹaỹaten ca 'eetec da yaqto' qami' ỹanatalo. 3Qaq qom qaltaq qojec, nache da mashe 'avita ara qo'oipaq encina maye naña ye Tabor, nache qaltaq 'anateetegueta caua tres ỹale't maye tairasheguema ye Betel da yaqto' ỹo'oxore'n Ñim Lo'onatac 'Enauacna. Qaq ca 'oonolec caamaye ỹacheta'ape caua tres quetaq, qaq ca lỹa ỹacheta'ape caua tres nauole 'ayiiña, qaq ca lỹa qalaq ỹachetac aca lo'oc huetagui ca lataxa. 4Qaq caamaye qom ime da 'am iqui'n, nache 'am ỹanema caua dos nauole 'ayiiña, qaq 'auaconegueta qome. 5Qaq qom ime, nache 'anqo'ona ye Gabaa maye lalamaxat Ñim Lo'onatac 'Enauacna, maye naña ye lanataqa' yem alleppi filisteopi. Qaq qom choche 'aunoxoneua'a ye huaqta'a't nỹecpi, nache 'anatena'aguet qome ca na'aqtaxanaxanecpi dasottagui, chegoqtasheguema yem huaña ye atamnaqa'. Qaq nca'attaueegue ca ỹalleppi maye iviqueetapigui aca lviquepi, lhuaxanapi qataq aca lasheerepi. 6Qaq huaña qome nache so Saqcha'a La'añaxac Ñim Nataxala' 'am nvita, nache nataqa'en 'aua'aqtaxaatac qoneta'am camayepi, nache 'am naralaxat qataq dalaxaic naqa'en qome da 'arataxac. 7Qaq qom ivita da ipacchigui 'enauac de'era 'am sa'aqtaxanem nagui, nache 'auo'ot qome ca 'aupeta'a da ỹaỹamaqchiguiñi, cha'aye Ñim Lo'onatac 'Enauacna 'am hueta'aguet qome. 8Ime nache 'aua'auta qome da 'anqo'ona ye Gilgal, nache aỹem 'auataique caua siete na'axa'te, qaq huaña, nache qaltaq 'am ñauane' qome, da yaqto' 'am ñenaicapegue' qom so'ot aca nachetaqtaxanaqte qaỹavigaxatta, qataq aca nachetaqtaxanaqte qanhuaachigui da sanot Ñim Nataxala'. Qaq aỹem 'auata'aguet qome yaqto' 'am sa'aqtaxanem cam 'auo'ot qome da 'am nta'a.
9Qaq so Saúl co'ollaq choche ncoyeguene' so Samuel da jec, nache Ñim Lo'onatac 'Enauacna naralaxat da lataxac somaye, qaq se'eso na'a'q ỹataqta ipacchigui 'enauac nam ỹa'axatta'api co'ollaxa so Samuel. 10Nache so Saúl qataq so lamaxashec co'ollaq ivitra ye Gabaa, nache so na'aqtaxanaxanecpi dasottac, nache ca'atta'agueta soomaye. Huaña nache so Saqcha'a La'añaxac Ñim Lo'onatac 'Enauacna nvita so Saúl, nache somaye ỹalectaigui somayepi da da'aqtaxaatac, nache 'eeta'am somayepi. 11Qalaxaye 'enauac som nale'ena da ỹauatton somaye, co'ollaq ỹauaachigui da dasottac ỹalectaigui so na'aqtaxanaxanecpi, nache maiche detaqtega't, 'eeta': «¿Chaq 'eetec de'era huaigui da Saúl dam llalec so Cis? ¿Peta'a nataqa'en na'aqtaxanaxanec?»
12Qaq huo'o so 'oonolec so maiche lma' yemaye ỹauo'o da la'aqtac, 'eeta': «¿Chaq negue't cam lataxala' namayepi?» Qaq nache huaña nache huo'o da na'aqtacaic naxa 'eeta': «¿Qache nataqa'eno' so Saúl da na'aqtaxanaxanec?»
13Qaq so Saúl co'ollaq iviresheguema so qaỹoqotcheguemec atamnaqa', nache ime da da'aqtaxaatac. 14Nache so ntesoqo' inattac somaye qataq so lamaxashec, 'eeta':
¿Hua'ague ca qoviita'ague?
Nache so Saúl 'enapeco':
Qomye ñimitaqtaique aca 'ashenapi maye deqat, qalaxaye saishet da sanataxa, nache ñeqo'onaxa so Samuel.
15Nache se'eso ntesoqo' so Saúl 'enapeco':
¿Qaq ca 'eetec ca la'aqtac co'ollaxa ca Samuel? Ñaq aỹem 'anqouaguec da aỹem 'aua'aqtaxanem.
16Nache so Saúl da'aqtaxanem so ntesoqo', 'eeta':
Ñimaye qomi' da'aqtaxaatema da mashe qaỹanata acam 'ashenapi.
Qalaxaye so Saúl saishet da ỹa'axat dam la'axaỹaxac maye ỹachegoxoto'ot so Samuel, da somaye qaỹauotaique da nta'a. 17Qaq co'ollaq ime, de'era nache so Samuel iỹaxanegue 'enauac so Israel le'ecpi, da yaqto' natamnot naqa'en Ñim Nataxala' da huaña ye Mispá; 18qaq huaña yemaye da, 'enapega co'ollaxa somayepi, 'eeta':
«Ñim Nataxala', maye Natamnaxala' na Israel le'ecpi, 'eeta': ‹Aỹem qami' ñeqateeguesopa co'ollaxa ye Egipto, qami' Israel le'ecpi, qataq qami' sesoueeguesopa da la'añaxac ye egipciopi, qataq 'enauac som ỹotta'a't shiỹaxauapi maye qami' ỹachoxoreeta'ape. 19Qalaxaye nagui qami' qauo'otañi Ñim Qanatamnaxala'ai, maye qami' isoueeguesopa co'ollaxa 'enauac so lqalaiguesat, qataq so qanque'eenaxaqui, qaq nagui qami' qauo'otañi Ñimaye, cha'aye souaxat da qauỹaxañiỹaique ca qarta'ai da yaqto' qami' ilo'oguelo. Qaq ỹoqo'oye nagui qauanaqui, nache qanachaachiuo, qataq ñi 'oonolec ỹataqtac ca maiche lauo' le'ecpi qataq ca maiche llalaqpi.›»
20Qaq co'ollaq ime, nache so Samuel ỹamaxalec da nquigueuo 'enauac som maiche nalamaxat nhuo' le'ecpi maye chegoxoguetpi so Israel, nache so alletaxac taalec so lauo' le'ecpi so Benjamín. 21Ime, nache 'enapega da nquigueuo som lauo' le'ecpi so Benjamín, nache ñi 'oonolec somayepi ỹataqtac so maiche llalaqpi, nache so alletaxac taalec so llalaqpi so Matri, nache somayepi taalec da qaiỹaxana so Saúl, som llalec so Cis. Qalaxaye co'ollaq qanmitaique somaye nache sa qaỹanata, 22qaq ỹoqo'oye qaltaq qainat Ñim Nataxala', da yaqto' qaỹaỹaten da ỹalectauo so Saúl. Nache Ñim Nataxala' ỹa'axat da so Saúl ỹalectauo', qalaxaye nqañoxottaigui so ña'acpi. 23Huaña nache qanqalgoqta'a som netaña da nqañoxottañi, nache qaỹauegueua'a so laiñi som netaña so nhuo' le'ecpi, nache 'enauac somayepi ila'a da so Saúl qaica ca napacalec da lalogaxa. 24Nache so Samuel inato' 'enauac somayepi, 'eeta':
¿Mashe qauloita'a da lca'aguishec Ñim Nataxala' da yaqto' nta'a? ¡Qaq ỹataqta qaica ca 'oonolec so Israel le'ecpi da 'eeta'am somaye!
Nache so Israel le'ecpi 'enapeco': ¡Nachera qome da qarta'a!
25Nache so Samuel ỹataqta da'aqtaxaatem so shiỹaxauapi nam lataxacpi de'era lo'onataxanaxac ca nta'a, nache ỹerelec aso nere, ime qaq ỹaỹamaxat asomaye, ỹachaigui aso atamnaxaqui maye lalamaqte Ñim Nataxala'. Qaq co'ollaq ime de'era, nache so Samuel 'enapega 'enauac somayepi da ỹe'eguelaxalo naua lma'ate. 26Nataqa'en so Saúl ỹe'eguelaxa so lma' maye naña ye Gabaa. Nache Ñim Lo'onatac 'Enauacna ỹanem da lhuennataxac so 'añaxaicpi da yaqto' ca'ategue somaye. 27Qalaxaye sa qoue naxa nam shiỹaxauapi maye qauema naua la'aqtaqa, nache 'eetaco': «¿Qache nacheso' so qaỹauotaique da qomi' nca'alaxatrec se'eso?» Nache ỹataqta qaỹo'otaatac, qataq saishet da qaỹo'oxoren, qalaxaye so Saúl saishet da iqocha'a somayepi.
