So Samuel qataq so Saúl
1Qaq so llalaqpi so Benjamín huo'o so ỹale le'enaxat Cis, somaye llalec co'ollaxa so le'enaxat Abiel, qataq laual so Seror, qataq lapi'sa so Becorat, som llalec co'ollaxa so Afía. Qaq se'eso Cis, somaye ỹataqta 'amaqtaqaic, 2qaq huo'o co'ollaxa so llalec, nsoq maye ỹataqta nalochiguiñi da lataxac, le'enaxat Saúl. Qaq somaye ỹataqta qaica ca 'ena'am da lyacỹaxac, napacalec 'enauac so Israel le'ecpi, qataq qaica ca ivi' ye lalogaxa.
3Qaq huo'o so na'a'q, nache so Cis daqat aso lalopi 'ashenapi. Nache 'enapego' so llalec Saúl, 'eeta':
'Anaỹamaxat qome, nache 'anmitaique aca 'ashenapi. Qaq 'auauo'o ca 'auauec na qaramaxashecpi.
4Nache so Saúl qataq so lamaxashec je'c, ỹa'axasoxoorelec aye qasoxonaxapi ye Efraín, qataq taỹalec yem 'alhua Salisa, qalaxaye saishet da ỹanata aso 'ashenapi. Qataq nataqa'en taaleco' ye 'alhua Sagalin qataq yem na'alhua so Benjamín, qalaxaye ñaqaiyeta saishet da ỹanata. 5Qaq co'ollaq ivita ye 'alhua Zuf, nache so Saúl 'enapego' so lamaxashec maye nnaictague', 'eeta':
Qolaq, she'eguelaxasoq, ten ca ita'a yo'oqta da mashe ỹaguec da taỹapigui lauel qomi', qaq mashe saishet da taỹapigui lauel cam 'ashenapi souaxat qomi'.
6Nache som lamaxashec 'enapeco':
Ne'ena huaqta'a't nỹecpi huo'o ñi ỹale maye la'aqtaxanaxanec Ñim Lo'onatac 'Enauacna, qaq ñimaye ỹataqta 'enauac da huo'o naq 'enec qanqa'en, cha'aye 'enauac nam la'aqtaxanaxacpi ỹataqta tachigui. Qaq qolaq ñeqo'onaxaua'a, shapegueto' da qomi' da'aqtaxanema ca saqteuga.
7Nache so Saúl, 'enapeco':
Qolaq ñeqo'onaxa, qalaxaye ¿negue'to' cam seroxoua'a que'eca ỹale? Ye mashe qaca aso qaya'aco nauolepi, mashe qui'itchigui na qarachoxonaxaqui. Qaq qaica ca ishet da samiaxai' qome que'eca na'aqtaxanaxanec.
8Nache som lamaxashec 'enapeco':
Huo'o aye aỹom saq 'amaqtaq plata, da samiaxai' qome que'eca na'aqtaxanaxanec, da yaqto' qomi' ỹachaxaneguelo ca saqteuga.
9Qaq cha'aye co'olloxocheye yi'iye Israel, da huo'o naxa nam nshetaique da ichemaxata Ñim Lo'onatac 'Enauacna, nache 'enapec naxa: «Ñeqo'onaxaua'a ñim huo'oi naua l-loxoco», cha'aye nache 'eetec co'ollaxa da qaitaxaỹa nam nagui «na'aqtaxanaxanec».
10Nache so Saúl, 'enapeco':
Qolaq ñeqo'onaxaua'a camaxa.
Nache soomaye nqo'ooreua'a som huaqta'a't nỹecpi maye netaña co'ollaxa se'eso la'aqtaxanaxanec Ñim Lo'onatac 'Enauacna. 11Qaq co'ollaq mashe quetegueto som ñiguisheguem maye taỹasheguema som huaqta'a't nỹecpi, nache nateera'aguet so qa'ampi maye ñi'iguenaxaama na 'etaxat, nache inattraco' asomayepi, 'eeta':
¿Peta'a nachena ne'ena nam naña cam huo'oi naua l-loxoco?
12Nache asomayepi, 'enapeco':
«Aja', qalaxaye ña qaỹatasheguema ye naña. Qalaxaye qauỹalliỹapigui' qome, cha'aye camaxa netaña ye huaqta'a't nỹecpi, cha'aye nagui laloxoqui da qoỹaneuo aca nachetaqtaxanaxatpi, huaña ye qaỹoqotcheguema atamnaqa'. 13Qaq qom choche qaviyiiua'a yemaye nache qanmichiỹaique camaxa, qom saxanaxa da tasheguema ye qaỹoqotcheguema atamnaqa' da yaqto' deque'e, cha'aye na shiỹaxauapi saishet da deque'e da saxanaxa da qaila'a da nvi' camaye, cha'aye nacheca naxa cam nqouagaxaueelec na nachetaqtaxanaxatpi, qaq da ime, nache cheta'ague da deque'e nam qaicoyeguenpi da yaqto' huanaxauapi. Qaq ỹoqo'oye nache qoqui nagui yaqto' qaviyiỹalec qome.»
14Nache soomaye qaltaq je'c da taresheguema se'eso huaqta'a't nỹecpi. Qaq co'ollaq mashe ivildeua'a se'eso huaqta'a't nỹecpi, nache nateera'aguet so Samuel, da mashe taỹasheguema som huaña so atamnaqa'.
15Qaq se'eso hua'au lỹa na'a'q co'ollaq ñaq natauo so Saúl, nache Ñim Nataxala' mashe sogote da ỹaỹaanaxanaxanec so Samuel da 'eeta': 16«'Anaỹamaxattai' qome cha'aye qonte', qom mashe 'eeta'am nagui ye ñichiguiña añi nala', nache 'am ñamaxaua'a ca nsoqolec maye chegaqa'a yem na'alhua so Benjamín, qaq camaye nacheca qome ca 'aucorelec da yaqto' lta'a na ỹalamaxat nhuo' Israel le'ecpi. Qaq camaye nacheca qome ca isoueeguesop namayepi da lamaxasoxonaxac na filisteopi, cha'aye aỹem ỹataqta huo'o da ichoxonnataxanaxa souaxat da aỹem iviro'ot da lashelaxanaxac namayepi.»
17Nache so Samuel co'ollaq ila'aguet so Saúl, nache Ñim Nataxala' 'enapego' somaye, 'eeta': «'Enacha'aguet na ỹale maye sogote da 'am sa'aqtaxaatapeguem. Namaye nachena qome na ilo'ogue na ỹalamaxatpi.»
18Qaq co'ollaq mashe ivireua'a so ñegueuo so huaqta'a't nỹecpi, nache so Saúl nqo'ona so Samuel da inat, 'eeta':
Ñaq aỹem 'anqouaguec qome da aỹem 'auachaxana ca lma' cam huo'oi naua l-loxoco.
19Nache so Samuel, 'enapeco': «Qomye nachaỹem. Qalaxaye nagui qolaq ñeqo'onaxasheguema ye atamnaqa', nache aỹem qarquia'axauai huaña yemaye. Qaq nato' qonte' nte'eta, nache 'am sa'axatem 'enauac na 'archemaqtaxanaxacpi, qaq qom ime, nache 'am sasheetec da 'avi'eguelaq. 20Qaq acam 'arelopi 'ashenapi maye mashe tres na'axa'te da daqat, qalaq saishet da tatapigui 'arhuel qome, cha'aye mashe sogote da qaỹanata. Cha'aye dam ỹoqta nqopittaique 'enauac na Israel le'ecpi, damaye ỹataqta 'am taalec qataq na 'arhuo' le'ecpi.»
21Nache so Saúl 'enapeco':
Aỹem sachegoxoguet na lauo' le'ecpi so Benjamín, qaq namayepi nachena nam maiche nhuo' maye ỹataqta sa lamai'pi na Israel le'ecpi! Qataq yem maiche ỹalamaxat ỹaqaỹañicpi qalaq ỹataqta qaica ca la'amaqchec da ỹalectaigui na laỹepi lauo' le'ecpi so Benjamín. Qalaq ¿ta'ainco' da aỹem 'aua'aqtaxaateguem 'enauac de'era?
22Huaña nache so Samuel ỹauegueuo so Saúl qataq so lamaxashec, nache ỹauegueua'a so pa'auo so nỹec, nache nso'onaxanaxaaña so so'onqa' maye ỹataqta pa'ateuo, qaq se'eso huanaxauapi shiỹaxauapi ivi' treinta. 23Ime, nache so Samuel 'enapega so nhuoshaxanaxanec, 'eeta':
'Andouo cam lapat maye 'am sanem caillaye, qataq 'am shenapega da 'auỹotauga.
24Nache so nhuoshaxanaxanec sa naỹaloxon da nqatsheguem so lallac no'oitai', nache ỹami' so Saúl. Qaq so Samuel 'enapego' somaye, 'eeta':
'Ena nam mashe qaiỹotauga da qaỹauotaique da 'oq. 'Auaconeguet nache qollec, cha'aye aỹem seỹotauga namaye da yaqto' qollec nagui da aỹem secoyeguen na shiỹaxauapi da yaqto' iquia'axauapi.
Nache so Saúl lquia'axaua so Samuel se'eso na'a'q. 25Qaq co'ollaq mashe ñe'eguelaxayiñi chegoqrasheguema so huaña so atamnaqa' da nayiña se'eso huaqta'a't nỹecpi, nache qaiqataxanai' so lmala' so Saúl, huetasheguemec qanqa'en na l-laq so nỹec, 26nache so Saúl nnaañi. Qaq so lỹa na'a'q, nache so Samuel iỹaxaasheguemec so Saúl maye huetasheguemec na l-laq so nỹec. Nache 'enapega, 'eeta':
Qoñisheguem qome, ime, qaq qojec 'avi'eguelaq.
Nache so Saúl ñisheguem. Qaq co'ollaq ime, nache huenoxoorec lỹatrec so Samuel da tareuga so nqa'aic. 27Qaq co'ollaq mashe netraña so pa'auec so huaqta'a't nỹecpi, nache so Samuel 'enapego' so Saúl, 'eeta':
Qonapega qome da 'aramaxashec da hua'auta, qaq 'am cara'ac da 'anca'ataxaatac, cha'aye 'am sa'aqtaxanem da la'aqtac Ñim Lo'onatac 'Enauacna.
